އިންޑޮނީޝިޔާގެ އިރުމަތީ ބިތުން ޕެސިފިކް ސަރަހައްދަށް ރިކްޓަރ މިންގަނޑުން 7.2 ގެ ބާރުމިނުގައި ބިންހެލުމެއް އަތުވެއްޖެ

އިންޑޮނީޝިޔާގެ އިރު ދެކުނު ބިތުން ޕެސިފިކް ކަނޑުގެ އަޑިޔަށް ރިކްޓަރ މިންގަނޑުން 7.2 ގެ ބާރުމިނުގައި ބުދަދުވަހުގެ ރޭ ބިންހެލުމެއް އަތުވެއްޖެއެވެ. ބިންހެލުމުގެ އަސްލު ހުރީ ކަނޑުގެ 200 ކިލޯމީޓަރ އަޑީގައެވެ.

ބިންހެލުން އައިސްފައިވަނީ އިރުމަތީ ޓިމޯރާއި ޕަޕުއާ ނިއުގިނީ އަދި އޮސްޓްރޭލިޔާއާ ވެސް ކައިރި ހިސާބަކަށް ވުމުން އިންޑޮނީޝިޔާގެ އިތުރުން އެ ތިން ގައުމަށްވެސް ލޮޅުންތަކެއް އަރާފައިވެއެވެ. އެންމެ ފަހުގެ ހެލުމާއި ގުޅިގެން އިންޑޮނީޝިޔާގެ ރަސްމީ އިދާރާތަކުން ސުނާމީ އިންޒާރު ވަނީ ނެރެފައެވެ. މި ހެލުމާ ގުޅިގެން ލިބުނު ގެއްލުންތަކުގެ ތަފްސީލު އަދި ސާފެއް ނުވެއެވެ.

ބުދަދުވަހުގެ ރޭ އިންޑޮނީޝިޔާއަށް ބާރުގަދަ ހެލުމެއް އައިސްފައި މިވަނީ ޑިސެމްބަރު 14 ވަނަ ދުވަހުވެސް އިންޑޮނީޝިޔާގެ އައްސޭރިން ފްލޯރެސް ކަނޑުގެ އަޑިޔަށް ރިކްޓަރ މިންގަނޑުން 7.4 ގެ ބާރު މިނުގައި ބިން ހެލުމެއް އައިސް ގެއްލުންތަކެއް ވެފައި ވަނިކޮށެވެ. މިރޭގެ ހެލުން މިއައީ މީގެ 17 އަހަރު ކުރިން 26 ޑިސެމްބަރު 2004 ގައި އިންޑޮނީޝިޔާގެ ސުމަޓްރާ ޖަޒީރާގެ ހުޅަނގުން އިންޑިޔާ ކަނޑުގެ އަޑިޔަށް ރިކްޓަރ މިންގަނޑުން 9.1 ބާރުމިނުގައި އައި ހެލުމުގައި އުފެދުނު ބިރުވެރި ސުނާމީގެ ހަނދާންތައް އިންޑިޔާ ކަނޑުގެ ގައުމުތަކުން އައުކުރި ހަފުތާގައެވެ.

އިންޑޮނީޝިޔާ އޮންނަނީ ދުނިޔޭގެ އެންމެ ނުރައްކާތެރި ފޯލްޓްލައިނުގެ މަތީގައެވެ. އެހެންކަމުން އިންޑޮނީޝިޔާގެ ދެބިތުން ޕެސިފިކް ކަނޑާއި އިންޑިޔާ ކަނޑަށް އަދި އިންޑޮނީޝިޔާގެ ޖަޒީރާތަކަށްވެސް ވަރަށް ގިނަ ބިންހެލުންތައް އާދެއެވެ، މިރޭގެ ހެލުމަކީ އިންޑޮނީޝިއާގެ ޖަޒީރާތަކުގެ އިރުމަތީ ބިތުން ޕެސިފިކް ކަނޑަށް އައި ހެލުމަކަށްވާތީ ސުނާމީއެއް އުފެދުނަސް އޭގެ ނުރައްކާ އިންޑިޔާ ކަނޑުގެ ޖަޒީރާތަކަށް ފޯރުމުގެ ބިރެއް ނެތްކަމަށް ތަޖުރިބާކާރުން ބުނެއެވެ.