އެފްއޭއެމުގައި މުސާރަ ނުދޭ މުވައްޒަފަކު ނުހުންނާނެ: ޖަވާ
29 ޑިސެމްބަރު 2021 | ބުދަ 16:53މުސާރަ ދިނުމުގައި ލަސްތަކެއް ހުރިކަން ގަބޫލުކުރައްވާ ކަމަށް ވިދާޅުވި
ފުޓްބޯލް އެސޯސިއޭޝަން އޮފް މޯލްޑިވްސްގެ ޖެނެރަލް ސެކެޓްރީ ހުސެއިން ޖަވާޒް (ޖަވާ)
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގައި މުސާރަ ނުދޭ މުވައްޒަފަކު ނުހުންނާނެ ކަމަށް އެ އިދާރާގެ ޖެނެރަލް ސެކެޓްރީ ހުސެއިން ޖަވާޒް (ޖަވާ) ވިދާޅުވެއްޖެއެވެ.
ޖަވާ މިހެން ވިދާޅުވެފައިވަނީ ރާއްޖޭގެ އޮންލައިން ނޫސް "މިހާރު" ގައި އެފްއޭއެމުގެ މުވައްޒަފުންނަށް މުސާރަ ނުދޭތާ ދެ މަސްވެފައިވާ ކަމަށް ރިޕޯޓުކޮށްފައިވަނިކޮށެވެ.
ރާއްޖެ އެމްވީއަށް ޖަވާ ވިދާޅުވީ އެފްއޭއެމުގައި މުސާރަ ނުދޭ މުވައްޒަފަކު ނުހުންނާނެ ކަމަށާއި، އެހެންނަމަވެސް މުސާރަ ދިނުމުގައި ލަސްތަކެއް ހުރި ކަމަށް ގަބޫލުކުރައްވާ ކަމަށެވެ. އަދި މުސާރަ ދިނުމުގައި ލަސްތަކެއް ހުރީ ކޮންކޮން ސަބަބުތަކަކާހުރެކަން އެފްއޭއެމުގެ މުވައްޒަފުންނަށް އެގޭނެ ކަމަށް ޖަވާ ވިދާޅުވިއެވެ.
ޖަވާ ވިދާޅުވީ، ނޮވެމްބަރު މަހާއި ޑިސެމްބަރު މަހުގެ މުސާރަވެސް މުވައްޒަފުންނަށް ދީފައިވާނެ ކަމަށެވެ. އަދި ވިދާޅުވީ، މިއީ ވަކި ނޫހަކުން އެފްއޭއެމުގެ އަގު ވައްޓާލާ ހަގީގަތާއި ހިލާފު ވާހަކަތަކެއް ދެއްކުމުގެ ބޭނުމުގައި ކުރަމުންދާ ކަމެއް ކަމަށާއި، މިއީ ފުޓުބޯލަ އާއިލާއިން ވަކި ނޫހަކާ މެދު ހިތްހަމަ ނުޖެހޭ ސަބަބުކަމަށް ވެދާނެ ކަމަށެވެ.
ޖަވާގެ ފޭސްބުކް ސްޓޭޓަސްގައި ވިދާޅުވީ، ހަގީގަތާ ޚިލާފު ވާހަކަ ފެތުރުމަކީ ނޫސްވެރިކަމެއް ނޫން ކަމަށާއި، އެކަން ފުޓުބޯޅަ އާއިލާއިން ކުށްވެރިކުރާ ކަމަށެވެ.
މީގެ ކުރިން އެފްއޭއެމުގެ ރައީސް ބައްސާމް އަދީލް ޖަލީލްވެސް ވަނީ މިހާރު ނޫސްއިން ފުޓުބޯޅަ ކްލަބްތަކަކީ ގޭންގުތައް ކަމަށް ދޭހަވާ އިބާރާތް ބޭނުންކުރަމުން ދާތީ އެކަން ކުށްވެރި ކުރައްވާފައެވެ.
ފުޓުބޯޅަ ކުލަބުތަކުން "މިހާރު" ނޫސް ބޮއެކޮޓް ކޮށްފައިވަނިކޮށް ބައްސާމް ސޯޝަލް މީޑިއާގައި ވިދާޅުވީ ކުލަބުތަކަކީ ދިވެހި ފުޓުބޯޅައިގެ މައިބަދަ ކަމުގައެވެ. އަދި ކުލަބުތަކަށް ދިމާވާ އެކިކަހަލަ ގޮންޖެހުންތަކާއެކު ވެސް ކުރަމުންގެންދާ މަސައްކަތް ފާހަގަކުރައްވާ ކަމަށް ބައްސާމް ވިދާޅުވިއެވެ.
ދާދިފަހުން ފުޓުބޯޅަ ކުލަބުތަކުން ވަނީ "މިހާރު" ނޫސް ބައިވެރިވާ ނޫސްވެރިންގެ ބައްދަލުވުންތައް ބޮއެކޮޓް ކުރުމަށް ނިންމާފައެވެ. އަދި ފުރަތަމަ ޑިވިޝަނުގެ ބައެއް ކޯޗުން ވަނީ ނޫސްވެރިންގެ ބައްދަލުވުންތަކުގައި ކޯޗުން ދައްކާ ވާހަކަ ބަދަލުކޮށްގެން "މިހާރު" ނޫހުން ގެނަސްދެމުންދާ ކަމަށް ބުނެފައެވެ.
"ރާއްޖެ.އެމްވީ" އަށް އެނގިފައިވާ ގޮތުން ކުލަބުތަކުން މިހާރު ނޫސް ބޮއިކޮޓްކުރީ އެ ނޫހުގައި ކޮލަމް ލިޔުއްވަމުން ގެންދަވާ ހާމިދު އަބްދުލްޣަފޫރު ލިޔުއްވާ ކޮލަމާ މެދު ހިތްހަމަނުޖެހިގެންނެވެ.
