ހދ. ހަނިމާދޫ މޮނިޓަރިންގެ ހާލަތުން ނަގައިފިއެވެ.

ހަނިމާދޫ މޮނިޓަރިންއަށް ލާފައިވަނީ ކޮވިޑް ކޭސްތަކެއް ފެނުމާ ގުޅިގެން މި މަހު 12 ވަނަ ދުވަހުއެވެ.

އެރަށް މޮނީޓަރިންގެ ހާލަތުން އުވާލާފައިވަނީ ބުދަ ދުވަހުގެ މެންދުރުއެވެ. އެރަށް މޮނީޓަރިންގެ ހާލަތަށް ގެނެސްފައިވަނީ މި މަހު ފަސްވަނަ ދުވަހު ރޯގާގެ އަލާމާތްތައް ހުރެގެން އެ ރަށު ސިއްހީ މަރުކަޒަށް ދެއްކި މީހަކު، މި މަހު 6 ވަނަ ދުވަހު ކޮވިޑް-19 އަށް ޕޮޒިޓިވްވެ، އެ ކޭހާ ގުޅިގެން ކޮންޓެކްޓް ޓްރޭސިންގެ ގޮތުގައި ފާހަގަވި 40 މީހަކު ޕޮޒިޓިވްވުމާ ގުޅިގެންނެވެ.

އެރަށުން ފުރަތަމަ ޕޮޒިޓިވްވީ އެރަށު ކެފޭއެއްގައި މަސައްކަތް ކުރާ އަންހެނެކެވެ. އެއާއެކު އެ ކެފޭއިން އޭނާގެ ޑައިރެކްޓް ކޮންޓެކްޓުންގެ ގޮތުގައި ކެފޭގައި މަސައްކަތް ކުރާ އިތުރު 3 މީހަކު ވަނީ ޕޮޒިޓިވް ވެފައެވެ.

ހަނިމާދޫގެ އިތުރުން ހދ. އަތޮޅުގެ 4 ރަށެއްގައި އަންނަނީ ކޮވިޑް ކޭސްތައް ފެންނަމުންނެވެ. އެއީ ކުޅުދުއްފުށީ، ކުރިނބީ، ނޮޅިވަރަންފަރު އަދި ނައިވާދޫއެވެ.