ތަރައްގީ ގެނެސްދެއްވުމުގައި، މި 5 އަހަރަށްވުރެ އިތުރަށްވެސް ރައީސް ދެމިހުންނަވާނެ: އަސްލަމް
މި ދައުރުގައި 18 ބިލިއަން ރުފިޔާގެ އުމްރާނީ ތަރައްގީގެ މަސައްކަތް ކޮށް ނިމޭނެ
ކ. މާފުށީގައި އަލަށް އިތުރުކުރެވުނު ބިން އަދި ޕިކްނިކް އައިލެންޑް، ކައުންސިލާ ހަވާލުކުރުމުގެ ރަސްމިއްޔާތު
ރާއްޖެއަށް ބޭނުންވާ ތަރައްގީ ގެނެސްދެއްވުމުގައި, މި ދައުރަށްފަހު އިތުރު ދައުރެއްގައިވެސް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ރާއްޖޭގެ ވެރިކަމުގައި ހުންނަވާނެ ކަމަށް މިނިސްޓަރ އޮފް ޕްލޭނިން، ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
ކ. މާފުށީގައި އަލަށް އިތުރުކުރެވުނު ބިން އަދި ޕިކްނިކް އައިލެންޑް މާފުށި ކައުންސިލާ ހަވާލުކުރުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރ އަސްލަމް ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ވެރިކަމުގެ މި ދައުރުގައި 18 ބިލިއަން ރުފިޔާގެ އުމްރާނީ ތަރައްގީގެ މަސައްކަތް ކޮށް ނިމިގެންދާނެ ކަމަށެވެ.
އެހެންނަމަވެސް 18 ބިލިއަން ރުފިޔާގެ މަސައްކަތުން ރާއްޖޭގެ އުމްރާނީ ތަރައްގީގެ މަސައްކަތްތައް ކޮށް ނުނިމޭނެ ކަމަށް އަސްލަމް ވިދާޅުވިއެވެ. ތަރައްގީވަމުންދާ ވަރަކަށް އަބަދުވެސް އިތުރު އެހެން މަޝްރޫއުތަކަށް ބޭނުންވާނެ ކަމަށާއި، އަދި ކުރިން ކޮށްފައިހުރި މަސައްކަތްތަކުގެ އަޕްގްރޭޑިންގ މަސައްކަތްތައްވެސް ކުރިއަށްގެންދަންޖެހޭނެ ކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ ރާއްޖެއަކީ ތަރައްގީ ވެފައިއޮތް ގައުމަކަށް ވަންދެން އެ މަސައްކަތްތައް ކުރަމުން ދާނެކަމަށާއި، މި މަސައްކަތުގައި ދެމިތިބެން ބޭނުންފުޅުވާކަމަށެވެ. އަދި ރާއްޖެއަކީ ތަރައްގީވެފައިއޮތް ގައުމަކާ ހިސާބަށް ގެންދިއުމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ދެމިހުންނަވާނެކަމަށް ޔަގީންކުރައްވާކަމަށާއި، އިރާދަކުރެއްވިއްޔާ މި 5 އަހަރަށްވުރެ އިތުރަށް އެމަނިކުފާނު ރާއްޖޭގައި ވެރިކަން ކުރައްވާނެ ކަމަށް އަސްލަމް ވިދާޅުވިއެވެ.
މިނިސްޓަރ އަސްލަމް ވިދާޅުވީ ކޮވިޑް-19ގެ ހާލަތުގައިވެސް، ސަރުކާރުން ކުރަމުންދާ އުމްރާނީ ތަރައްގީގެ މަސައްކަތްތަކަށް އެއްވެސް ލަސްކަމެއް އައިސްފައިނުވާކަމަށެވެ. އެގޮތުން ކޮވިޑް-19ގެ ހާލަތުގައި 25 ބަނދަރުގެ މަސައްކަތް އެއްކޮށް ނިންމާފައިވާކަމަށާއި، 39 ބަނދަރެއްގެ މަސައްކަތް ކުރިއަށްގެންދާ ކަމަށާއި، 13 ރަށެއްގެ ބަނދަރު ކޮންޓްރެކްޓަރާ ހަވާލުކޮށް މޮބިލައިޒް ނުކުރެވި ވާކަމަށާއި، އަދި ޓެންޑަރ މަރުހަލާގައި 8 ރަށުގެ ބަނދަރު ހިމެނޭ ކަމަށް އަސްލަމް ވިދާޅުވިއެވެ.
ބިން ހިއްކުމުގެ މަސައްކަތުގެ ތެރެއިން، 4 ރަށެއްގެ ބިން ހިއްކައި ނިންމާފައިވާކަމަށާއި، 5 ރަށެއްގެ ބިން ހިއްކުމުގެ މަސައްކަތް ކުރިއަށްދާކަމަށް އަސްލަމް ވިދާޅުވިއެވެ. 4 ރަށެއްގެ ގޮނޑުދޮށް ހިމާޔަތްކުރުމުގެ މަސައްކަތް ނިންމާފައިވާކަމަށާއި، 11 ރަށެއްގެ ގޮނޑުދޮށް ހިމާޔަތްކުރުމުގެ މަސައްކަތް މޮބިލައިޒްކޮށް، ކުރިއަށްދާކަމަށެވެ. މީގެ އިތުރުން ކޮވިޑްގެ ހާލަތުގައި ތާރު އަޅައިގެން 5 ރަށެއްގެ މަގު ހަދައި ނިންމާފައިވާކަމަށް އަސްލަމް ވިދާޅުވިއެވެ. އަދި 12 ރަށެއްގެ މަގު ހެދުމުގެ މަސައްކަތް މިވަގުތު ކުރިއަށްދާކަމަށް ވިދާޅުވިއެވެ.
އަސްލަމް ވިދާޅުވީ ފެނުގެ ނިޒާމު ގާއިމްކުރުމުގެ މަސައްކަތް 64 ރަށެއްގައި ކުރިއަށްގެންދާކަމަށެވެ. އަދި 23 ރަށެއްގައި ފެނުގެ ނިޒާމު ގާއިމްކުރުމުގެ އެއްބަސްވުމުގައި ބުދަ ދުވަހު ސޮއިކުރެވިގެންދާނެ ކަމަށެވެ. 57 ރަށެއްގައި ނަރުދަމާގެ މަސައްކަތްތައް ކުރަމުންގެންދާކަމަށާއި، 16 ރަށެއްގެ ނަރުދަމާގެ އެއްބަސްވުމުގައި ބުދަ ދުވަހު ސޮއިކުރެވިގެންދާނެ ކަމަށް ވެސް އަސްލަމް ވިދާޅުވިއެވެ.
އަދި ބުދަ ދުވަހު ސޮއިކުރެވޭ އެއްބަސްވުންތަކާއެކު ރާއްޖޭގެ މީހުން ދިރިއުޅޭ ހުރިހާ ރަށެއްގައި ފެނާ ނަރުދަމާ ގާއިމްކުރުމުގެ މަސައްކަތް ފެށިގެންދާނެ ކަމަށެވެ. އަދި ކުރިއަށްއޮތް ދެ އަހަރުގެ ތެރޭގައި މި މަސައްކަތްތައް ނިންމަވާނެ ކަމަށް އަސްލަމް ވިދާޅުވިއެވެ.
