ބައިބައިވުމުން ދުރުވެ ތިބުމަށް، އެމްޑީޕީއާއި އެމްޑީޕީގެ ވާދަވެރިންނަށް ނަޝީދު ގޮވާލައްވައިފި
އެމްޑީޕީއާއި އެމްޑީޕީގެ ވާދަވެރިންވެސް، ބައިބައިވުމާއި ނަފުރަތު އުފެދޭ ކަންކަމާ ދުރުވެ، ސުލްހަވެރި ސިޔާސީ ހަރަކާތުގައި ދެމިތިބުމަށް ގޮވާލެއްވި
އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ބައިބައިވުމާއި ނަފުރަތު އުފެދޭކަންކަމުން ދުރުވެ ތިބުމަށް، އެމްޑީޕީއަށާއި އެޕާޓީގެ ވާދަވެރިންނަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގޮވާލައްވައިފިއެވެ.
ރާއްޖޭގައި ފާހަގަކުރަމުންދާ އެއްބައިވަންތަކަމުގެ ދުވަހާ ގުޅިގެން އެމަނިކުފާނު ކުރެއްވި ޓްވީޓެއްގައި ވިދާޅުވީ، 2004 ވަނަ އަހަރުގެ ސުނާމީގެ ބިރުވެރި ހާދިސާއަށްފަހު ރާއްޖޭގައި މިދުވަސް ފާހަގަކުރަންފެށީ އެއްބައިވަންތަކަމުގެ ދުވަހުގެ ގޮތުގައިކަމަށެވެ. އެމްޑީޕީއާއި އެމްޑީޕީގެ ވާދަވެރިންވެސް، ބައިބައިވުމާއި ނަފުރަތު އުފެދޭ ކަންކަމާއި ދުރުވެ ސުލްހަވެރި ސިޔާސީ ހަރަކާތުގައި ދެމިތިބުމަށް ގޮވާލައްވާކަމަށް އެމަނިކުފާނު ވިދާޅުވިއެވެ.
ގައުމީ އެއްބައިވަންތަކަމުގެ ދުވަހާ ގުޅުވައި ނަޝީދު މިމޭރުމުން ޓްވީޓްކުރެއްވިއިރު، އެމްޑީޕީގެ އެތެރޭގައި ނަޝީދަށް ތާއީދުކުރާ މީހުންނާއި ރައީސް ސާލިހަށް ތާއީދުކުރާ މީހުންގެ ދެމެދު ފެކްޝަން އުފެދި އެކަން ވަރަށް ބޮޑަށް ފެންނަ ހިސާބަށްވެސް ކަންކަން ގޮސްފައިވެއެވެ. ވަކިން ޚާއްސަކޮށް ނަޝީދު ބަރުލަމާނީ ނިޒާމެއް ގެންނަން ބޭނުންފުޅުވުމާއި ރައީސް ނަޝީދަށް އަމާޒުކޮށް، ދިން ބޮމުގެ ހަމަލާގައި ޕާޓީގެ ތެރޭގައި ދެ ފެކްޝަންގެ މެދުގައި ބަހުގެ ހަމަލާތައް ބަދަލުކުރެވެމުން ދިޔަތަން ފެނުނެވެ. ސޯޝަލް މީޑިޔާގެ އިތުރުން ރައްޔިތުންގެ މަޖިލީހުގެ ތަޅުމުންވެސް އެކަން ވަނީ ފެނިގެންގޮސްފައެވެ. ނަމަވެސް އޭގެފަހުން މިހާރު މަސްރަހުން ފެންނަމުންދަނީ ކަންކަން ހައްލުވެފައިވާކަމެވެ.
ކޮންމެ އަހަރެއްގެވެސް ޑިސެމްބަރު 26 ވަނަ ދުވަސް މީގެ 17 އަހަރު ކުރިން ފެށިގެން ރާއްޖޭގައި ފާހަގަ ކުރަމުން އަންނަނީ ގައުމީ އެއްބައިވަންތަކަމުގެ ދުވަހުގެ ގޮތުގައެވެ. ދުވަސް ނިސްބަތްވަނީ 26 ޑިސެންބަރު 2004ގައި ރާއްޖެއަށް ކުރިމަތިވި ގުދުރަތީ އެންމެބޮޑު ކާރިސާއަށެވެ. 2004 ވަނަ އަހަރު ހިނގައިދިޔަ ސުނާމީ ކާރިސާގައި ރާއްޖޭގެ ގިނަ ރަށްރަށަށް ވަނީ އެކި ވަރުގެ ގެއްލުން ލިބިފައެވެ. 9 ރަށެއް ފިޔަވައި އެހެން ހުރިހާ ރަށަކަށް ސުނާމީގެ އަސަރު ކޮށްފައިވާއިރު، މި ހާދިސާގައި 82 މީހަކު ނިޔާވެ، 24 މީހަކު ވީނުވީއެއް ނޭނގި ގެއްލިފައިވާކަމަށް ވަނީ ރިޕޯޓުކޮށްފައެވެ.
އެއްބައިވަންތަކަމުގެ ދުވަސް ފާހަގަ ކުރެވެނީ ހިތާމަޔާއި ބިރުވެރިކަމުގެ އެދުވަހު އެންމެހައި ދިވެހިން ގުޅިގެން ދެއްކި އެއްބައިވަންތަކަމުން ފިލާވަޅު ލިބިގަނެ ގައުމީ ޖޯޝާއި އެއްބައިވަންތަަކަން އިތުރުކޮށް ދެމެހެއްޓުމަށް ބާރުއަޅައި ހިތްވަރު ދިނުމަށެވެ.
