އަންނަ އަހަރު ސިރިންޖުގެ ދަތިކަން ކުރިމަތިވެދާނެތީ ސިއްޙަތު ޖަމިއްޔާއިން ކަންބޮޑުވުން ފައުޅުކޮށްފި

ކޮވިޑް ވެކްސިން ޖަހަން ބޭނުންވާ ސިރިންޖުގެ ދަތިކަން އަންނަ އަހަރު ކުރިމަތިވެދާނެ ކަމަށް ލަފާކޮށް ދުނިޔޭގެ ސިއްހަތު ޖަމިއްޔާއިން ކަންބޮޑުވުން ފާޅުކޮށްފިއެވެ.

ޑަބްލިއުއެޗްއޯގެ އޮފިޝަލް ލީސާ ހެޑްމޭން ވިދާޅުވީ ކޮވިޑްގެ ބަލިމަޑުކަމުގެ ކުރީކޮޅު ފެނުނު ފަދަ މަންޒަރެއް ސިރިންޖުގެ ދަތިކަމާ ހެދި ފެނިދާނެ ކަމަށް ބަލައި، ގައުމުތަކުން ފިޔަވަޅު އަޅަން ޖެހޭ ކަމަށެވެ. ވެކްސިން ޖަހަން ބޭނުންވާ ސިރިންޖުގެ ދަތިކަން މުޅި ދުނިޔެއަށް ކުރިމަތިވެ ވެކްސިން ޕްރޮގްރާމްތަކަށް ހުރަސް އެޅިދާނެ ކަމުގެ ކަންބޮޑުުން ލިސާ ވަނީ ފާޅުކޮށްފައެވެ. އެގޮތުން މުއްސަނދި ގައުމުތަކުން އެއްފަހަރާ ބޮޑެތި ސްޓޮކް ގަތުން ފަދަ ކަންކަން ކުރިމަތިވުން އެކަށީގެންވާކަމަށެވެ.

ސިރިންޖުގެ ދަތިކަން މާ ބޮޑަށް ކުރިމަތިވެއްޖެނަމަ ކުޑަކުދިންނަށް ގަވާއިދުން ދޭން ޖެހޭ ވެކްސިންތަކަށް ވެސް ހުރަސްއެޅިދާނެ ކަމަށް އެ ޖަމިއްޔާއިންވަނީ ލަފާކޮށްފައެވެ. އަދި ފަގީރު ގައުމުތަކުގައި ތަކުރާރުކޮށް އެއް ސިރިންޖު ބޭނުން ކުރުމުގެ ނުރައްކާ އޮވެދާނެ ކަމަށް ވެސް އެ ޖަމިއްޔާއިން ބުނެފައިވެއެވެ.

މިހާތަނަށް ކޮވިޑް ވެކްސިންގެ 6.8 ބިލިއަން ޑޯޒް ދީފައި ވާއިރު، ކުންފުނިތަކަށް ލިބިފައި ވަނީ އަހަރަކު 6 ބިލިއަން ސިރިންޖު އުފެއްދުމުގެ ގާބިލްކަމެވެ. ކޮވިޑް ވެކްސިންގެ އިތުރުން ގަވާއިދުން ކުޑަކުދިންނާއި އެހެން މީހުންނަށް ދޭން ޖެހޭ ވެކްސިންތަކަށް ވެސް ސިރިންޖު ބޭނުންވެއެވެ.

ސިއްޙަތު ޖަމިއްޔާއިން ބުނެފައިވަނީ، ސިރިންޖު އުފެއްދުމުގެ ކެޕޭސިޓީއަށް ބަލާއިރު 2022 ވަނަ އަހަރުގެ ތެރޭގައި ދެ ބިލިއަން ސިރިންޖުގެ ދަތިކަމާ ދިމާވާނެ ކަމަށް ލަފާކުރެވޭ ކަމަށެވެ. އެކަން ހައްލު ވާނީ ސިރިންޖު އުފެއްދުމުގެ ކެޕޭސިޓީ އިތުރުކޮށްގެން ކަމަށެވެ.