ކީރިތި ރަސޫލާ މުޙައްމަދު (ސޢވ)އަށް ހަޖޫޖެހުން އެއީ މިނިވަންކަމާއެކު ވާހަކަ ދެއްކުމެއް ނޫން ކަމަށް ރަޝިޔާގެ ރައީސް ވްލަޑްމިއަރ ޕުޓިން ވިދާޅުވެއްޖެއެވެ.
ރަޝިއާގެ ރިޔާސީ ގަނޑުވަރު ކްރެމްލިނުން ބާއްވާ ނޫސްވެރިންގެ އަހަރީ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުން ޕުޓިން ވިދާޅުވީ، ޚިޔާލުފާޅުކުރުމާއި މިނިވަންކަމަކީ ވަކި ހައްދެއް އޮންނަ ކަންކަން ކަމަށާއި، އެހައްދުން ބޭރުވެ އެހެނިހެން ހައްގުތަކަށް ބުރޫ އަރައިގެން ނުވާނެ ކަމަށެވެ. އަދި މުޙައްމަދު (ސޢވ)އަށް ހަޖޫޖެހުން އެއީ މިނިވަންކަމާއެކު ވާހަކަ ދެއްކުން ނޫންކަމަށް ޕުޓިން ވިދާޅުވިއެވެ.
ޕުޓިން ވިދާޅުވީ މުޙައްމަދު (ސޢވ)އަށް ހަޖޫޖެހުމަކީ އިސްލާމް ދީނަށާއި، އަދި އިސްލާމީ އުންމަތަށް ވެވޭ ވަރަށް ބޮޑު އަނިޔާއެއް ކަމަށާއި، މިފަދަ ކަންކަމުގެ ސަބަބުން ހަރުކަށި ފިކުރުގެ ހަމަލާތައް އިތުރުވާ ކަމަށް ޕުޓިން ވިދާޅުވިއެވެ. އެކަލޭގެފާނަށް ފުރައްސާރަކުރުމުން އުފެދޭނީ ރުޅިވެރިކަމާއި ނަފްރަތުގެ އޮއިވަރެއް ކަމަށާއި، ޚިޔާލު ފާޅުކުރުން، އާންމުންގެ މެދުގައި ނަފްރަތު އުފައްދާ އެއްޗަކަށް ވެގެންނުވާނެ ކަމަށެވެ. އަދި އެފަދަ ކަންކަމަށް ތާއީދުނުކުރައްވާ ކަމަށާއި، އެކަންކަން ހުއްޓުވަން ޖެހޭ ކަމަށް އޭނާ ވިދާޅުވިއެވެ.
ރަޝިޔާ މީހުންނަށް އިޝާރަތް ކުރައްވައި ޕުޓިން ވިދާޅުވީ، ރަޝިޔާ ގިނަ މީހުންނަކީ އެހެން ފިކުރުތަކާއި ވިސްނުމަށް އިހުތިރާމްކުރާ ބައެއް ކަމަށެވެ. ރަޝިޔާގައި ރަސޫލާ މުޙައްމަދު (ސޢވ)އަށް ފުރައްސާރަކޮށް ބަދުބަސްބުނުމަކީ އާންމު ކަމެއް ނޫން ކަމަށް ޕުޓިން ވިދާޅުވިއެވެ.
