އިސްލާމް ދީނާއި ޓެރަރިޒަމް އާ ގުޅުވާތީވެ ސައުދީ އަރަބިޔާ އިން ކަންބޮޑުވުން ފާޅުކޮށް، ފުރާންސުން ރަސޫލާގެ ކާޓޫން ކުރެހި މައްސަލަ ކުށްވެރި ކޮށްފިއެވެ.
އަންގާރަ ދުވަހު ސައުދީގެ ދައުލަތުގެ މީޑިއާ އަށް ދެއްވި އިންޓަވިއުއެއްގައި ސައުދީގެ ފޮރިން މިނިސްޓްރީގެ އޮފިޝަލަކު ވިދާޅުވީ، ބަސް ބުނުމުގެ މިނިވަން ކަމަށް ތާއިދު ކުރާ ކަމަށާއި، ނަމަވެސް ނަފްރަތު އުފެދޭ ގޮތަށް އަދި ހަރުކަށި ކަންތައްތަކަށް ތާއިދެއް ނެތް ކަމަށެވެ.
އޮފިޝަލް ވިދާޅުވީ، ވަކި ބަޔަކަށް ނުބަލައި ޓެރަރިޒަމްގެ ހުރިހާ އަމަލުތަކެއް ސައުދީން ކުށްވެރި ކުރައްވާ ކަމަށެވެ. އޮފިޝަލް އިޝާރާތް ކުރެއްވީ ފްރާންސުގެ ޕެރިހުގެ ޓީޗަރަކު ކްލާހުގެ ދަރިވަރުންނަށް ކާޓޫން ދެއްކުމުން ލާއިންސާނީ ގޮތަކަށް ޓީޗަރުގެ ކަރުބުރިކޮށްލި ހާދިސާ އަށެވެ.
އެ ކާޓޫންގެ މައްސަލާ ގައި މުސްލިމް ގައުމުތަކުން ވަނީ ރުޅިގަދަވެފައެވެ.
އެކަމާއި ގުޅިގެން ފްރާންސުގެ އުފެއްދުންތައް ބޮއިކޮޓް ކުރަން ތުރުކީގެ ރައީސް ތައްޔިބް އުރުދުއާން ގޮވާލައްވާފައިވާއިރު ފްރާންސް ގައި ހުރި ޕާކިސްތާނުގެ އެންވޯއި އަނބުރާ ގެންދަން ޕާކިސްތާނުގެ ގާނޫނު ހަދާ މަޖިލީހުން ވަނީ ފާސްކޮށްފައެވެ.
އަރަބި ޓްރޭޑް އެސޯސިއޭޝަނުން ވެސް ވަނީ ފްރާންސްގެ އުފެއްދުންތައް ބޮއިކޮޓް ކުރަން ގޮވާލާފައެވެ.
އިރާގު އަދި ތުރުކީގެ އިތުރުން ގާޒާ ގައި ދަނީ ރަސޫލާގެ ކާޓުން ކުރެހި މައްސަލާ ގައި މުޒާހަރާ ކުރަމުންނެވެ. އިރާގުގެ ބަގްދާދުގައި ކުރަމުންދާ މުޒާހަރާގައި ފްރާންސްގެ ރައީސް އެމެނައުލަ މެކްރޯންގެ ފޮޓޯ އަންދާއި ފޮޓޯ އަށް އިހާނެތިކޮށް ހިތާފައިވެއެވެ.
ހޯމަ ދުވަހު ތުރުކީގެ ރައީސް އުރުދުއާން ވިދާޅުވީ މެކްރޯންގެ ނަފްސާނީ ހާލަތު ބަލަން ޗެކްއަޕެއް ހެއްދެވުން މުހިއްމު ކަމަށް ވިދާޅުވެފައެވެ. އުރުދުއާން އެހެން ވިދާޅުވީ، އިސްލާމްދީނަކީ މުޅި ދުނިޔޭގައި ބައިބައިވުން އުފައްދާ ދީން ކަމަށް ވިދާޅުވެ އިސްލާމް ދީނަށް ކުޑައީމިސްކޮށް ވާހަކަފުޅު ދައްކަވާފައިވާތި އެވެ.
