އަލްއަގްސާ މިސްކިތުގެ ހަރިންމަ ތެރެއަށް ވަދެ އިސްރާއީލް ސިފައިން ދިން ހަމަލާތަކުގައި ފަލަސްތީނުގެ 9 މީހަކަށް އެކިވަރުގެ އަނިޔާތައް ލިބިއްޖެއެވެ.
އިސްރާއީލް ސިފައިން އަގްސާ މިސްކިތުގެ ހަރިންމަތެރެއަށް ވަދެގަތީ ހުކުރު ނަމާދަށް އަގްސާ މިސްކިތަށް ދިޔަ މީހުން ނަމާދުކޮށް ނިންމުމަށްފަހު ކީރިތި ރަސޫލާ މުހައްމަދު ސައްލަﷲ އަލައިހި ވަސައްލަމް އަށް ފުރައްސާރަކޮށް އިސްރާއީލުގެ ކަނާތު ފިޔައިގެ ބަޔަކު ކުރިޔަށް ގެންދިޔަ ހަރަކާތަކާއި ދެކޮޅަށް މުޒާހަރާކުރުމަށް ތައްޔާރުވަމުން ދަނިކޮށެވެ.
މިސްކިތުގެ ހަރިންމަތެރޭގައި ފަލަސްތީނު މީހުން ޖަމާވެ މުޒާހަރާއަށް ފެށުމުގެ ކުރިން އިސްރާއީލްގެ ސިފައިން ވަނީ އެތަނަށް ވަދެފައެވެ.
ފަލަސްތީނުގެ ރެޑްކްރެސެންޓުން ބުނާގޮތުގައި 9 މީހަކަށް ވަނީ އެކިވަރުގެ އަނިޔާތައް ލިބިފައެވެ. ތިން މީހަކަށްވަނީ ހޮސްޕިޓަލްގައި އެޑްމިޓްކޮށްގެން ފަރުވާދީފައެވެ. އިސްރާއީލް ސިފައިން ވަނީ ފަލަސްތީނުގެ ރައްޔިތުންނާ ދެކޮޅަށް ރަބަރު އުންޑަޔާއި ކަރުނަގޭހާއި އަދި ސްޓަން ގްރެނޭޑް ބޭނުންކޮށްފައެވެ.
އިސްރާއީލް ސިފައިން ބުނީ މިސްކިތުގެ ހަރިންމަތެރެއިން ފަލަސްތީނުގެ 10 މީހުން ހައްޔަރުކޮށްފައިވާ ކަމަށެވެ.
ހައްދުފަހަނަޅާފައިވާ ޔަހޫދީން ވަނީ އަންގާރަ ދުވަހު މުޒާހަރާއެއް ބާއްވާފައެވެ. މިމުޒާހަރާގައި އެމީހުން ވަނީ "ޑެތް ޓު އަރަބް" ފަދަ ގޮވާލުންތައް ގޮވާފައެވެ. ފަލަސްތީނުގެ ރައްޔިތުން މުޒާހަރާކޮށްފައިވަނީ އިސްރާއީލުން ކުރިޔަށްގެންދިޔަ މި މުޒާހަރާގައި ބައިވެރިވި ބަޔަކު ރަސޫލާށް ފުރައްސާރަކުރާ ވީޑިއޯއެއް އާންމުވުމުންނެވެ.
އަނެއްކޮޅުން އިސްރާއީލް ސިފައިން ވަނީ ބުރާސްފަތި ދުވަހުގެ ރޭ ގާޒާއަށް އަމާޒުކޮށްވެސް ހަމަލާތަކެއް ދީފައެވެ. ގާޒާއަށް މިސައިލް ހަމަލާތަކެއް ފޮނުވާލާފައިމިވަނީ މީގެ މަހެއްހާ ކުރިން އިސްރާއީލާއި ހަމާސް އާ ދެމެދު 11 ދުވަސްވަންދެން ކުރިޔަށްދިޔަ ހަމަލާ ބަދަލުކުރުންތައް ހުއްޓާލުމަށް ދެ ފަރާތުން އެއްބަސްވެފައި ވަނިކޮށެވެ.
