ރަސޫލާގެ އީދުމީލާދު ފާހަގަކުރަން ބޭއްވި ހަފްލާގައި ބޮމެއް ގޮއްވާލައި 40 މީހުން މަރާލައިފި

ކީރިތި ރަސޫލާގެ އީދު މީލާދު ފާހަގަ ކުރުމަށް އަފްގާނިސްތާނުގެ ވެރިރަށް ކާބުލްގައި ބޭއްވި ހަފްލާއެއްގައި ހަށިގޮއްވާލައިގެން ދިން ހަމަލާއެއްގައި ގިނަ ބަޔަކު މަރުވެއްޖެއެވެ.

އަފްގާނިސްތާނުގެ ހެލްތު މިނިސްޓްރީގެ ތަރުޖަމާނު، ވާހިދު މަޖްރޯ ވިދާޅުވީ، މި ހަފްލާގައި ދީނީ އިލްމުވެރިންގެ ތެރެއިން ފާހަގަކޮށްލެވޭ ގިނަ ބޭފުޅުންތަކެއް ބައިވެރިވެވަޑައިގަތް ކަމަށާއި، ހަމަލާ އަމާޒުކޮށްފައިވަނީ އެ ފަރާތްތަކަށް ކަމަށް ޤަބޫލުކުރެވޭ ކަމަށެވެ. އޭނާ ވިދާޅުވީ މި ހަމަލާގައި މަރުވެފައިވާ މީހުންގެ އަދަދު މިހާރު ސާޅީހަށްވުރެ މައްޗަށް އަރާފައިވާ ކަމަށާއި، ޒަޚަމްވި މީހުންގެ އަދަދު ފަސްދޮޅަހަށްވުރެ ގިނަ ކަމަށެވެ. އަދި މި އަދަދު އިތުރުވެގެންދާނެ ކަމަށް ލަފާކުރެވޭ ކަމަށް ވާހިދު ވިދާޅުވިއެވެ.

އަފްގާނިސްތާނުގެ އިންޓީރިއަރ މިނިސްޓްރީގެ ތަރުޖަމާނު، ނަޖީބް ދާނިޝް ވިދާޅުވީ، ހަމަލާ ދީފައިވަނީ ހަފްލާ ކުރިއަށްދިޔަ ޙޮލުގެ ތެރޭގައި ކަމަށާއި، ހަމަލާ ދިނީ ހަމަލާ ދިން މީހާގެ ގައިގައި ހަރުކޮށްފައިވާ ގޮވާއެއްޗެހިތަކެއް ގޮއްވާލައިގެން ކަމަށެވެ.

މި ހަފްލާ ކުރިއަށްދިޔަ ޔުރޭނަސް ވެޑިންގ ޕެލެސް އަކީ ކައިވެނީގެ ހަފްލާތަކުގެ އިތުރުން ސިޔާސީ އެއްވުންތަކާއި އެހެނިހެން ޖަލްސާތައް ބޭއްވޭނެ އިންތިޒާމް ހަމަޖައްސާފައިވާ ހޯލެކެވެ. އެ ތަނުގެ މެނޭޖަރަކު އޭއެފްޕީއަށް މައުލޫމާތުދެމުން ބުނެފައިވަނީ ހަމަލާދިން މީހާ ހަށިގޮއްވާލާފައިވަނީ ހަފްލާގައި ތިބި މީހުންގެ މެދުގައި ހުރެކަމަށެވެ.

މި ހަމަލާގެ ޒިންމާ މިހާތަނަށް އެއްވެސް ފަރާތަކުން ނަގާފައި ނުވި ނަމަވެސް މި ދުވަސްވަރަކީ އިސްލާމިކް ސްޓޭޓް (އައިސިސް)ގެ ނަމުގައި ހަރަކާތްތެރިވާ ހަނގުރާމަވެރި ދައީޝް ޖަމާއަތާއި، ތާލިބާން ޖަމާއަތުން ކާބުލްގައި ހަމަލާދިނުން އިތުރުކޮށްފައިވާ ދުވަސްވަރެކެވެ.