އިރާޤުގެ ބޮޑުވަޒީރުކަމަށް މުޙައްމަދު ތައުފީޤް އައްލާވީ އައްޔަނުކޮށްފި

އިރާޤުގެ އާ ބޮޑުވަޒީރުކަށް މުހައްމަދު ތައުފީޤް އައްލާވީ އައްޔަނުކޮށްފި އެވެ.

ދެ މަސްދުވަހަށް ވުރެ ގިނަ މުއްދަތަކަށްފަހު އެގައުމުގެ ބޮޑުވަޒީރުކަަމަށް އާ ބޭފުޅަކު ރައީސް ބަރްހަމް ޞާލިހު މިއައްޔަނުކުރެއްވީ އެގައުމުގައި މެދުކެނޑުމެއްނެތި މުޒާހަރާތައް ކުރިޔަށްދަނިކޮށެވެ. އިރާޤުގެ ކުރީގެ ބޮޑުވަޒީރު އަދެލް އަބްދުލް މާހިދު އިސްތިޢުފާ ދެއްވީވެސް މުޒާހަރާތައް ކުރަމުންދިޔަ މީހުންގެ ޕްރެޝަރާހެދި އެވެ.

އޭގެފަހުންވެސް މުޒާހަރާކުރަމުންދިޔަ މީހުންދިޔައީ މެދުކެނޑުމެއްނެތި މުޒާހަރާކުރަމުންނެވެ. ކުރިޔަށް އޮތް މަސްދުވަސް ތެރޭގައި އައްލާވީ އެގައުމުގެ އައު ސަރުކާރު އެކުލަވާލައްވާނެ އެވެ. އަދި އިރާޤުގައި އިންތިޚާބެއް ބޭއްވެންދެން އެސަރުކާރު ކުރިޔަށްދާނެ އެވެ.

ހޮނިހިރު ދުވަހު ޓްވިޓަރ މެދުވެރިކޮށް ކުރެއްވި ޕޯސްޓެއްގައި އައްލާވީ ވިދާޅުވެފައިވަނީ ރައީސް ޞާލިހު އޭނާ ބޮޑުވަޒީރުކަމަށް އައްޔަނުކޮށްފައިވާ ކަމަށާއި މުޒާހަރާކުރަމުންދާ މީހުންގެ ގޮވާލުންތަކާ އެއްގޮތަށް އޭނާގެ ސަރުކާރު އެކުލަވާލާނެ ކަމަށެވެ. މީގެއިތުރުން އެގައުމުގެ އިގްތިޞާދު ޚަރުދަނާކުރުމަށާއި ކޮރަޕްޝަން ނައްތާލުމަށް މަސައްކަތްކުރައްވާނެ ކަމަށް އައްލާވީ ވަނީ އެވީޑިއޯގައި ވިދާޅުވެފަ އެވެ.

މީގެއިތުރުން އައްލާވީ ވަނީ މުޒާހަރާކުރަމުންދާ މީހުން މުޒާހަރާކުރުންތައް ކުރިޔަށް ގެންދިޔުމަށް ގޮވާލައްވާފަ އެވެ. އައްލާވީ އިރާޤުގުގެ އައު ބޮޑު ވަޒީރުކަމަށް އައްޔަނުކޮށްފައި މިވަނީ އެގައުމުގައި އުޅޭ އެހެން ޕާޓީތަކާވެސް މަޝްވަރާކުރުމަށްފަހު ކަމަށް އިރާޤުގެ އޮފިޝަލުން ބުނެއެވެ.

އައްލާވީ އުފަންވެވަޑައިގަންފައިވަނީ ބަޣްދާދަށެވެ. އަދި ކޮމިޔުނިކޭޝަން މިނިސްޓަރެއްގެ ގޮތުގައި 2006 ވަނަ އަހަރާއި 2010 ވަނަ އަހަރުން ފެށިގެން 2012 ވަނަ އަހަރާ ދެމެދު މަސައްކަތް ކުރެއްވި އެވެ.

އައްލާވީ ބޮޑުވަޒީރުކަމުގައި ބެހެއްޓުމާމެދު އިރާޤުގެ ޤާނޫނު ހަދާ މަޖިލީހުގައި ދެން އޮންނަ ބައްދަލުވުމުގައި ވޯޓަށް އަހާނެ އެވެ. އައްލާވީގެ ނަން ބޮޑުވަޒީރުކަމަށް އައުމާއެކު މުޒާހަރާކުރަމުންދާ މީހުންވެސް ވަނީ ދެ ބަޔަކަށް ބެހިފަ އެވެ. އެއް ބަޔަކު އައްލާވީ އަށް ތާޢީދުކުރާއިރު އަނެއް ބަޔަކު އަންނަނީ އައްލާވީ ބޮޑުވަޒީރުކަމުގައި ބަހައްޓަން ނުފެންނަކަމަށް ބުނަމުންނެވެ.