ރައީސް ނަޝީދު ނުރަސްމީ ދަތުރުފުޅެއްގައި އިނގިރޭސިވިލާތަށް!
25 ޑިސެމްބަރު 2021 | ހޮނިހިރު 08:49އެމަނިކުފާނު ފުރާވަޑައިގެންނެވީ ހޮނިހިރު ދުވަހުގެ ވަގުތެއްގައި
ރައީސް މުހައްމަދު ނަޝީދު ފުރާވަޑައިގަންނަވަނީ،
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ނުރަސްމީ ދަތުރުފުޅެއްގައި އިނގިރޭސިވިލާތަށް ފުރާވަޑައިގެންފިއެވެ.
އެމަނިކުފާނު ފުރާވަޑައިގެންނެވީ ހޮނިހިރު ދުވަހުގެ ވަގުތެއްގައެވެ. މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް ދިން ބޮމުގެ ހަމަލާއާ ގުޅިގެން އެމަނިކުފާނުގެ ހަށިކޮޅަށް 10 ރޭޒާފުށް ވަދެ މުހިންމު ގުނަވަންތައް ފޫއަޅުވާލިއެވެ. ސައިކަލެއްގައި އައިއީޑީއެއް ހަރުކޮށްގެން ގޮއްވާލުމަށްފަހު ދިން މިހަމަލާގައި ލިބިވަޑައިގެންނެވި ޒަޚަމްތަކުން އެމަނިކުފާނުގެ ފުރާނަފުޅު ސަލާމަތްކުރުމަށް އޭޑީކޭގެ ޑޮކްޓަރުންގެ ޓީމުން ވަނީ 16 ގަޑިއިރުގެ ދިގު އޮޕަރޭޝަނެއް ކޮށްފައެވެ. އެއަށްފަހު އިތުރު ފަރުވާ ހޯއްދެވުމަށް މެއި މަހުގެ 13 ވަނަ ދުވަހު ރައީސް ނަޝީދު ވަނީ ޖަރުމަނުވިލާތަށް ވަޑައިގެންފައެވެ.
ޖަރުމަނުވިލާތުގައި ވެސް އިތުރު އޮޕަރޭޝަންތަކެއް ކޮށްފައިވެއެވެ. އެގޮތުން ފައިގެ އޮޕަރޭޝަނެއް ކުރެވިފައިވާކަމަށް ރައީސް ނަޝީދުގެ އާއިލާއިން ވަނީ ބުނެފައެވެ. ޖަރުމަނުވިލާތުން ފަރުވާ ހޯއްދެވުމަށްފަހު ދެން ވަޑައިގެންނެވީ އިނގިރޭސިވިލާތަށެވެ.
ގާތްގަނޑަކަށް ފަސް މަހެއްހާ ދުވަހު ރާއްޖެއިން ބޭރުގައި ހުންނެވުމަށްފަހު އެނބުރި ވަޑައިގެންނެވީ 11 އޮކްޓޫބަރު 2021 ގައި ދުބާއީ މަގުންނެވެ. ރައީސް ނަޝީދަށް އެއަރޕޯޓުން މަރުހަބާ ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހެވެ. ރައީސް ނަޝީދު އެނބުރި ވަޑައިގެންނެވިއިރު އެއަރޕޯޓްގައި ސެކިޔުރިޓީގެ ކަންކަން ވަރަށް ވަރުގަދަ ކުރިއެވެ. ފަރުވާއަށް ފަހު އެނބުރި ވަޑައިގެން ވާހަކަފުޅު ދައްކަވަމުން ރައީސް ނަޝީދު ވިދާޅުވެފައިވަނީ ހަމަލާއެއްގެ ބިރު އަދިވެސް އެބައޮތްކަމަށެވެ.
އެމަނިކުފާނުގެ ހާލުކޮޅާއި ގުޅޭގޮތުން އެންމެފަހުން ވިދާޅުވެފައިވަނީ ސިއްހަތު ރަނގަޅުކަމަށާއި އެހެންނަމަވެސް އަދި ވަރަށް ބޮޑަށް ރަނގަޅުވާންޖެހޭކަމަށެވެ. އަދި ކަނާއަތުގެ ތިން އިނގިލީގައި އައްސިކަން ހުންނާތީ އެތިން އިނގިލީގެ ބޭނުން ނުހިފޭކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދަށް ދިން ހަމަލާއާ ގުޅިގެން އެމަނިކުފާނުގެ ސެކިޔުރިޓީ ފެއިލްވި ގޮތުގެ އިންކުއަރީއެއް ރައްޔިތުންގެ މަޖިލީހުގެ 241 ކޮމިޓީން ވަނީ ކުރިޔަށް ގެންގޮސްފައެވެ. އަދި ރިކޮމެންޑޭޝަންތަކެއް ވެސް ވަނީ ސަރުކާރުގެ ކަމާބެހޭ ފަރާތްތަކަށް ހުށަހަޅާފައެވެ.
ރައީސް ނަޝީދަށް ހަމަލާދިނުމުގައި ބައިވެރިވާ މީހުން ހައްޔަރުކޮށް ޝަރީއަތް ފާށާފައިވާއިރު، ވ. ތިނަދޫ، ހިޔާ، އަދުހަމް އަހުމަދު ރަޝީދުގެ މައްޗަށް 23 އަހަރުގެ ޖަލު ހުކުމެއް 14 ޑިސެންބަރު 2021 ގައި އިއްވާފައިވެއެވެ. ހުކުމް އިއްވުމަށް ބޭއްވި އަޑު އެހުމުގައި އަދުހަމް ބުނީ، އެ ހަމަލާގައި ބައިވެރިވެވުނީ ދީނި ގޮތުން ގަބޫލު ކުރެވުނު ކަންތައްތަކެއްގެ ސަބަބުން ކަމަށާއި، އެއީ ކުރެވުނު ވަރަށް ބޮޑު ކުށެއް ކަމަށެވެ. އަދި މިކަހަލަ ކަމެއްގައި މީގެ ފަހުން ބައިވެރި ނުވާނެ ކަމަށާއި، ހަމަލާގައި އަނިޔާވި ރައީސް ނަޝީދާއި، ދިވެހި ރައްޔިތުންގެ ކިބައިންވެސް މައާފަށް އެދޭ ކަމަށް އަދުހަމް ބުންޏެވެ.
