ދަރުމަވަންތަ ހޮސްޕިޓަލުގެ 90 އިންސައްތަ ބޭނުންކުރަމުންދާ ކަމަށާއި، ހޮސްޕިޓަލުގެ ތިއޭޓަރެއް ހަލާކު ނުވާ ކަމަށް އިންދިރާގާނދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ސީއީއޯ އިބްރާހިމް ސަލީމް ވިދާޅުވެއްޖެއެވެ.

ރާއްޖެއެމްވީއަށް ދެއްވި ޚާއްސަ އިންޓަވިޔުއެއްގައި ސަލީމް ވިދާޅުވީ ދަރުމަވަންތަ ކޮންޕްލެކްސްއާ ގުޅޭ ގޮތުން ސޯޝަލް މީޑީއާގައި ދައުރުވާ ވާހަކަތަކަކީ ހަގީގަތެއް ނޫން ކަމަށާއި، ދަރުމަވަންތައިގެ 90 އިންސައްތަ ބޭނުން ކުރަމުންދާ ކަމަށެވެ. އަދި ވިދާޅުވީ 24 ފްލޯ ހުންނައިރު، 20 ފްލޯ ބޭނުން ކުރަމުންދާ ކަމަށެވެ.

ދަރުމަވަންތައިގައި އޮޕަރޭޝަން ހަތަރު ތިއޭޓަރެއް ހުންނަކަން ފާހަގަކުރައްވައި ސަލީމް ވިދާޅުވީ ހުޅުމާލެ މެޑިކަލް ފެސިލިޓީ، އޮރެންޖް ހިޔާއަށް ބަދަލުކުރުމުގެ މަސައްކަތް ކުރަމުންދާތީ ކޮވިޑްގެ އައިސީޔޫ ވަގުތީ ގޮތުން ހިންގަމުންދަނީ ޑީއެޗް11 ގައި ކަމަށާއި، އެއީ ވަގުތު ނަގާނެ ކަމެއް ކަމަށެވެ. އަދި ވިދާޅުވީ ކޮވިޑަށް ޕޮޒިޓިވްވާ މާބަނޑު އަންހެނުންނާއި، ކުޑަ ކުދިންނަށް ވެސް ޚާއްސަ ފްލޯއެއް ހަމަޖައްސާފައިވާ ކަމަށާއި، އެތަނުގައި އެމީހުންނަށް ފަރުވާ ދެމުންދާ ކަމަށެވެ.

ސަލީމް ވިދާޅުވީ ދަރުމަވަންތަ ހޮސްޕިޓަލްގެ އެއްވެސް ތިއޭޓަރެއް، މެޝިނެއް ވެސް ހަލާކުނުވާ ކަމަށާއި، އެ ހުރިހާ ވަސީލަތްތަކަކީ ބޭނުން ކުރެވޭ ގޮތަށް ހުރި އެއްޗެހި ކަމަށެވެ. އަދި ވަރަށް ގާތުން ދަރުމަވަންތަ ހޮސްޕިޓަލް ކަންކަން ބަލަމުންދާކަން ފާހަގަކުރެއްވިއެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ބޮޑު ހޭދައެއް ކޮށްގެން ހަދާފައިވާ 25 ބުރީގެ ދަރުމަވަންތަ ހޮސްޕިޓަލް ހަދާފައި ވަނީ ޒަމާނީ ގިނަ ވަސީލަތްތަކާއި ސްވިމިން ޕޫލެއް ވެސް ހިމެނޭ ގޮތަށެވެ. އަދި އެ ތަނުގެ ބައެއް މެޑިކަލް ކޮލެޖަށް ވެސް ޚާއްސަކޮށްފައިވެއެވެ.

ސިންގަޕޫރުގެ ޝެންހުއާ ކޮންސްޓްރަކްޝަނާ ހަވާލުކޮށްގެން ޖޫން، 5، 2016 ގައި، މަސައްކަތް ފެށި ދަރުމަވަންތައަށް ދައުލަތުގެ ބަޖެޓުން 140 މިލިއަން ޑޮލަރު (2.1 ބިލިއަން ރުފިޔާ) ހޭދަކޮށްފައިވެއެވެ.