މެންބަރުން ވަކިކުރުމުގެ ގާނޫނީ ބާރެއް ދަރުބާރު ފެކްޝަނަށް ލިބިގެންނުވޭ: ރައީސް މައުމޫން

ޕީޕީއެމުން މެންބަރުން ވަކިކުރުމުގެ ގާނޫނީ ބާރުވެރިކަމެއް "ދަރުބާރު" ފެކްޝަނަށް ލިބިގެންނުވާ ކަމަށް އެ ޕާޓީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ.

ރައީސް މައުމޫން މިފަދައިން ވިދާޅުވެފައިވަނީ، ޕީޕީއެމްގެ މެންބަރުކަމުން އެމަނިކުފާނު ވަކިކުރެއްވުމަށް، ރައީސް އަބްދުﷲ ޔާމީން ފެކްޝަނުގެ ޕީޕީއެމް ކައުންސިލުން އާދިއްތަ ދުވަހު ފާސްކޮށްފައިވަނިކޮށެވެ. ރައީސް މައުމޫން "ދަރުބާރު" ފެކްޝަން ނިސްބަތް ކުރައްވާފައިވަނީ ރައީސް ޔާމީނުގެ ޕީޕީއެމް ފެކްޝަނަށެވެ. ރައީސް ޔާމީނުގެ ފެކްޝަނަށް "ދަރުބާރު" ފެކްޝަން ކިޔަން ފެށީ، އެ ފެކްޝަނުން ދަރުބާރުގެ ނަގައިގެން އެތަނުގައި ހަރަކާތްތައް ބާއްވަމުންދާތީ އެވެ.

ރައީސް މައުމޫން ކުރެއްވި ޓްވީޓެއްގައި ވިދާޅުވީ "ދަރުބާރު" ފެކްޝަނަށް ޕާޓީން މެންބަރުން ވަކިކުރުމުގެ ގާނޫނީ ހައިސިއްޔަތެއް އަދި ބާރުވެރިކަމެއް ލިބިގެންނުވާ ކަމަށެވެ. އަދި މާތް ﷲގެ ވާގިފުޅާއެކު އެމަނިކުފާނަކީ އަދިވެސް ޕީޕީއެމްގެ މެންބަރެއް ކަމަށާއި އަދި ޕާޓީގެ ރައީސް ކަމަށް ވެސް ވިދާޅުވެފައިވެ އެވެ.

ރައީސް މައުމޫން ޕީޕީއެމުން ވަކިކުރުމަށް ކައުންސިލުން ފާސްކޮށްފައިވަނީ، އިނގުރައިދޫ ދާއިރާގެ މެންބަރު އިބްރާހިމް ފަލާހު ހުށަހެޅުއްވި ގަރާރަކާ ގުޅިގެންނެވެ. ރައީސް ޔާމީނު ރިޔާސަތު ބެލެހެއްޓެވި އެ ބައްދަލުވުމުގެ އިއްތިފާގުން ރައީސް މައުމޫން ޕާޓީން ވަކިކުރުމަށް ފާސްކޮށް، އެ މައްސަލަ ސުލޫކީ ކޮމެޓީ އަށް ވަނީ ފޮނުވާފަ އެވެ.