ކ. މާލެ
|
23 ޑިސެންބަރ 2021 | ބުރާސްފަތި 09:47
ބިލްބާއޯ އާއި ރެއާލް ބައްދަލުކުރި މެޗުގެ ތެރެއިން
ބިލްބާއޯ އާއި ރެއާލް ބައްދަލުކުރި މެޗުގެ ތެރެއިން
ގެޓީ އިމޭޖަސް
ސްޕެނިޝް ލީގު
ބިލްބާއޯ ބަލިކޮށް ރެއާލަށް އަށް ޕޮއިންޓުގެ ލީޑެއް
ރެއާލް މޮޅުވީ ބިލްބާއޯ އަތުން 2-1 ގެ ނަތީޖާއަކުން
ތާވަލުގެ އެއްވަނައިގައި ރެއާލް އޮތީ 46 ޕޮއިންޓާއެކު

ސްޕެނިޝް ލީގުގައި ބުދަ ދުވަހުގެރޭ ކުޅުނު މެޗުން އެތުލެޓިކް ބިލްބާއޯ ބަލިކޮށް ތާވަލުގެ އެއްވަނައިގައި ރެއާލް މެޑްރިޑުން އަށް ޕޮއިންޓުގެ ލީޑެއް ނަގައިފިއެވެ.

ރަށުން ބޭރުގައި ކުޅުނު މެޗުން ރެއާލް މޮޅުވީ ބިލްބާއޯ އަތުން 2-1 ގެ ނަތީޖާއަކުންނެވެ.

މި މެޗު ފަށައިގެން ހަތް މިނެޓު ތެރޭ ރެއާލުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ ހަތަރުވަނަ މިނެޓުގައި ރެއާލުން ލިޑު ނެގިއިރު، ޓޯނީ ކްރޫސް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ކަރީމް ބެންޒެމާއެވެ. އޭގެ ތިން މިނިޓް ފަހުން ބެންޒެމާ ވަނީ އިތުރު ލަނޑެއް ޖަހައި، ރެއާލުގެ ލީޑު ފުޅާކޮށްދީފައެވެ.

މި މެޗުގައި ބެންޒެމާ ދެ ލަނޑު ޖެހިއިރު، މިއީ މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ބެންޒެމާ ލީގުގައި ކާމިޔާބުކުރި 15 ވަނަ ލަނޑެވެ. އަދި އޭނާ ވަނީ މި ސީޒަނުގެ ހުރިހާ މުބާރާތެއްގައި މިހާތަނަށް 20 ލަނޑު ހަމަކޮށްފައެވެ.

ބެންޒެމާގެ ދެ ލަނޑުން މެޗުގެ ކުރީކޮޅު ރެއާލުން ލީޑެއް ނެގި ނަމަވެސް، އޭގެ ތިން މިނެޓު ފަހުން ބިލްބާއޯއިން ވަނީ ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އޮއިހާން ސަންކޭޓެވެ. އޭގެ ފަހުން ނަތީޖާ އެއްވަރުކުރަން މެޗުގެ ދެވަނަ ހާފުގައި ބިލްބާއޯގެ އިނާކީ ވިލިއަމްސްއަށް ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ރެއާލުގެ ގޯލްކީޕަރު ތިބައޫ ކޯޓުއާ ވަނީ މަތަކޮށްފައެވެ.

މި މޮޅާއެކު ތާވަލުގެ އެއްވަނައިގައި ރެއާލުން އަށް ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުނު 19 މެޗުން 46 ޕޮއިންޓް ލިބިފައެވެ. ދެވަނައިގައި އޮތް ސެވިއްޔާއަށް 18 މެޗުން ލިބިފައިވަނީ 38 ޕޮއިންޓެވެ. އަދި ތިންވަނައިގައި އޮތް ރެއާލް ބެޓިސްއަށް 18 މެޗުން 33 ޕޮއިންޓް ލިބިފައިވާއިރު، ހަތަރުވަނައިގައި އޮތް ރަޔޯ ވަޔެކާނޯއަށް ވަނީ 18 މެޗުން ލިބިފައިވަނީ 30 ޕޮއިންޓެވެ.

އެންމެ ފަހުން އަޕްޑޭޓް ކުރީ: 3 މަސް ކުރިން
ރިވިއު ކުރީ: ހުސައިން ފަރިޔާޒް
- ކޮމެންޓް