މި މަހު ފަށާ ސެންޓްރަލް ޒޯން ވޮލީބޯޅަ މުބާރާތުގައި ވާދަކުރުމަށް ރާއްޖޭގެ ގައުމީ އަންހެން ވޮލީބޯޅަ ޓީމު ބަންގްލަދޭޝްއަށް ފުރައިފިއެވެ.
މި ފަހަރުގެ މުބާރާތް އޮންނާނީ މި މަހުގެ 23 ވަނަ ދުވަހުން ފެށިގެން 28 ވަނަ ދުވަހުގެ ނިޔަލަށް ބަންގްލަދޭޝްގައެވެ. މި މުބާރާތުގައި ވާދަކުރުމަށް އަންހެން ޓީމު ބަންގްލަދޭޝްއަށް ފުރާފައިވަނީ އަންގާރަ ދުވަހުގެ ހެނދުނުގެ ވަގުތެއްގައެވެ. އެ މުބާރާތުގައި އަންހެން ޓީމާއެކު ފިރިހެން ޓީމުވެސް ވާދަކުރަން ހަމަޖެހިފައިވީ ނަމަވެސް، ކޮވިޑް-19 އަށް ޑައިރެކްޓް ކޮންޓެކްޓުވި ބަޔަކު ޓީމުގައި ތިބުމުން އަންގާރަ ދުވަހުގެ ގައުމީ ފިރިހެން ވޮލީބޯޅަ ޓީމަށް ބަންގްލަދޭޝްއަށް ފުރިފައެއް ނުވެއެވެ.
މި ފަހަރުގެ ސެންޓްރަލް ޒޯން އަންހެން މުބާރާތުގައި ރާއްޖެއާއެކު ވާދަކުރާނީ ބަންގްލަދޭޝް އާއި، ނޭޕާލާއި، ސްރީ ލަންކާ އާއި، ކިރްގިސްތާން އަދި އުޒްބެކިސްތާނެވެ. މި މުބާރާތުގައި ރާއްޖޭގެ އަންހެން ޓީމުން ކުޅޭ ފުރަތަމަ މެޗުގައި އަންނަ ބުރާސްފަތި ދުވަހު އުޒްބެކިސްތާނާ ދެކޮޅަށް ނުކުންނައިރު، ދެވަނަ މެޗުގައި ހުކުރު ދުވަހު ނުކުންނާނީ ނޭޕާލާ ދެކޮޅަށެވެ.
އަދި ތިންވަނަ މެޗުގައި ހޮނިހިރު ދުވަހު ލަންކާއާ ދެކޮޅަށް ނުކުންނައިރު، ހަތަރުވަނަ މެޗުގައި އާދީއްތަ ދުވަހު ރާއްޖެ ނުކުންނާނީ ކިރްގިސްތާނާ ދެކޮޅަށެވެ. އަދި މުބާރާތުގެ ފަހު މެޗުގައި ހޯމަ ދުވަހު ރާއްޖެ ނުކުންނާނީ ބަންގްލަދޭޝްއާ ދެކޮޅަށެވެ. މި މުބާރާތް ރާވާފައިވާ ގޮތުން ހަ ގައުމުގެ މެދުގައި ލީގު އުސޫލުން ކުޅުމަށްފަހު، ފައިނަލުގައި ކުޅޭނީ ރޭންކިންގެ ކުރީގައި އޮންނަ ދެ ޓީމެވެ.
ދެ އަހަރުގެ މެދުކެނޑުމަކަށްފަހު ސެންޓްރަލް ޒޯން މުބާރާތް މި ފަހަރު ބާއްވާއިރު، މި މުބާރާތުގައި ވާދަކުރާ އަންހެން ވޮލީބޯޅަ ޓީމަށް ވަނީ ބޮޑެތި ބަދަލުތަކެއް އައިސްފައެވެ. އެގޮތުން މީގެ ކުރިން ގައުމީ އަންހެން ވޮލީ ޓީމުގައި ހިމެނޭ ސީނިއާ ބައެއް ކުޅުންތެރިން މި ފަހަރުގެ ޓީމުގައި ނުހިމެނެއެވެ. މި ފަހަރުގެ މުބާރާތާ އަންހެން ޓީމު ކުރިމަތިލާނީ މީގެ ކުރިން ދިވެހި ސިފައިންގެ ކުލަބުގެ ކޯޗުގެ މަގާމު އަދާކުރި މުމްތާޒް އަލީ (މުންތޭ) ގެ އިރުޝާދުގެ ދަށުންނެވެ.
މި ފަހަރުގެ ސެންޓްރަލް ޒޯން މުބާރާތުގައި ވާދަކުރުމަށް ގައުމީ ފިރިހެން ވޮލީބޯޅަ ޓީމަށް ބަންގްލަދޭޝްއަށް ފުރިފައި ނުވި ނަމަވެސް، މި މުބާރާތަށް ތައްޔާރުވުމުގެ ގޮތުން ގައުމީ ފިރިހެން ވޮލީ ޓީމުން ވަނީ ވަރުގަދައަށް ތައްޔާރުވެފައެވެ. އެގޮތުން މުބާރާތުގެ ކުރިން ރާއްޖޭގައި ފިރިހެން ޓީމުން ވަނީ ލަންކާއާ ދެކޮޅަށް އެކުވެރިކަމުގެ ތިން މެޗެއް ކުޅެފައެވެ. އަދި އޭގެ ފަހުން ވަނީ އިންޑިއާގެ ހައިދަރުއާބާދު ސްޕައިކާސްއާ ދެކޮޅަށްވެސް ތިން މެޗެއް ކުޅެފައެވެ.
މި ފަހަރުގެ މުބާރާތާ ފިރިހެން ޓީމު ކުރިމަތިލާނީތަޖުރިބާކާރު ކޯޗު މުޙައްމަދު ސާޖިދު (ކާއްޓޭ) ގެ އިރުޝާދުގެ ދަށުންނެވެ. އަދި މި މުބާރާތަށް ގައުމީ ފިރިހެން ވޮލީބޯޅަ ޓީމުގެ ކެޕްޓަނުގެ މަގާމަށް ތަޖުރިބާކާރު ވޮލީ ކުޅުންތެރިޔާ އިސްމާޢީލް ސާޖިދު (ކުޑަކާއްޓޭ) ވަނީ ހަމަޖައްސާފައެވެ.
ސެންޓްރަލް ޒޯން މުބާރާތުގައި ވާދަކުރުމަށް އަންގާރަ ދުވަހު އަންހެން ވޮލީ ޓީމު ބަންގްލަދޭޝްއަށް ފުރިއިރު، މި މުބާރާތް ކަވަރުކުރުމަށް އެ ޓީމާއެކު ރާއްޖެޓީވީ ސްޕޯޓްސްގެ ސީނިއާ ވީޑިއޯ ޖާނަލިސްޓް އަބްދުﷲ އަތޫފް އާތިފްވެސް ވަނީ ބަންގްލަދޭޝްއަށް ފުރާފައެވެ.
އަތޫފް ނޫސްވެރިކަމުގެ ދާއިރާއަށް ތައާރަފްވެގެންދިޔައީ 2019 ވަނަ އަހަރު ރާއްޖެ ޓީވީގައެވެ. އޭނާއަކީ ރާއްޖޭގައި ހިނގާ ކުޅިވަރު ހަރަކާތްތައް ޝައުގުވެރިކަމާއެކު ކަވަރުކުރާ ކުޅަދާނަ ނޫސްވެރިއެކެވެ. އެގޮތުން 2019 ވަނަ އަހަރު ނޭޕާލުގައި ބޭއްވުނު ސައުތު އޭޝިއަން ގޭމްސް އަތޫފް ވަނީ ކަވަރުކޮށްފައެވެ. އަދި އޭނާ އަކީ ރާއްޖެޓީވީގެ ސީނިއާ ވީޑިއޯ ޖާރނަލިސްޓެއްގެ ހައިސިއްޔަތުން ރާއްޖޭގައި ހިނގަމުން އަންނަ ތަފާތު އެކި ކަންކަން ކިޔުންތެރިންނާ ހަމަޔަށް ގެނެސްދިނުމަށްވެސް ވަރުބަލި ކަމެއްނެތި މަސައްކަތްކުރަމުން އަންނަ ނޫސްވެރިއެކެވެ.
