މި މަހުގެ 22 ވަނަ ދުވަހު ސެކިޔުރިޓީގެ ބޭނުމަށް ވެލާނާ އިންޓަރނޭޝަނަލް އެއަރޕޯޓުގެ މަގާއި ފަޅުތެރެ ބަންދުކުރަން ނިންމާފައިވާކަމަށް އެމްއޭސީއެލްއިން ބުނެފިއެވެ.

މި މަހުގެ 22 ވަނަ ދުވަހު ބަނގްލަދޭޝްގެ ބޮޑުވަޒީރު ޝައިޚް ހަސީނާ ރަސްމީ ދަތުރުފުޅެއްގައި ރާއްޖެ ވަޑައިގެންނެވުމަށް ވަނީ ހަމަޖެހިފައެވެ.

އެހެންކަމުން އެކަމަނާގެ ރައްކާތެރިކަން ކަށަވަރުކުރުމަށްޓަކައި ހުޅުލޭގެ ބޮޑު ސަރަަހައްދެއް ބަންދުކުރަން ނިންމާފައިވާއިރު، އެމްއޭސީއެލްއިން ބުނީ 22 ޑިސެންބަރު ވަނަ ދުވަހުގެ ވަކި ވަގުތުތަކެއްގައި ހުޅުލޭގެ އިންޓަރނޭޝަނަލް ޓަރމިނަލްގެ އުތުރު ކަންމަތިން ފެށިގެން ކާގޯ ބިލްޑިންގގެ ދެކުނު ކަންމައްޗާ ހަމައަށް ހުޅުލޭގެ އެއްގަމާއި ފަޅުތެރޭގައި އެއްވެސް ބާވަތެއްގެ އުޅަނދެއް ދުއްވުން މަނާވާނެ ކަމަށެވެ.

އެގޮތުން މެންދުރު 12:00 އިން ހަވީރު 4:00 އަށް އެ ސަރަހައްދުގެ ފަޅުތެރެއަށް އެއްވެސް އުޅަނދެއް ވަދެ ނުކުތުން އަދި ފަޅުތެރޭގައި ބޭއްވުން މަނާވާނެ ކަމަށް އެމްއޭސީއެލްއިން ބުނެފައިވެއެވެ. މި ވަގުތުތަކުގައި ކަނޑު އުޅަނދުފަހަރަށް ބޭނުންކުރެވޭނީ ހަމައެކަނި ހުޅުލޭގެ އެންމެ ދެކުނުގައިވާ ނެރު ކަމަށް އެމްއޭސީއެލްއިން ވަނީ ބުނެފައެވެ.

އެ ދުވަހުގެ މެންުދުރުފަހު 2:00ން 4:00ށް އެ ސަރަހައްދުގައި އެއްވެސް ބާވަތެއްގެ ވެހިކަލެއް ދުއްވުން މަނާވާނެކަމަށް އެމްއޭސީއެލްއިން ބުނެފައިވެއެވެ. މި ވަގުތުތަކުގައި ފުލުހުންގެ އިރުޝާދާ އެއްގޮތަށް އިންޓަރނޭޝަނަލް ޓަރމިނަލްގެ އުތުރު ކަންމަތި ކައިރިން އާންމު އުޅަނދުފަހަރު އަނބުރާލެވޭ ގޮތަށް ހަމަޖެހިފައިވާކަމަށް އެމްއޭސީއެލްއިން ވަނީ ބުނެފައެވެ. އަދި ފުލުހުން އިރުޝާދު ދޭ ގޮތެއްގެ މަތިން ހިނގާ އުޅެވޭނެ ކަމަށް ވެސް އެމްއޭސީއެލްއިން ބުނެއެވެ. އެހެންނަމަވެސް ދުއްވާ އެއްޗެއްސާއި ހިނގައި އުޅުން މުޅިން މަނާ ވަގުތުކޮޅެއް ވެސް އަންނާނެ ކަމަށް އެމްއޭސީއެލްއިން ބުނެފައިވެއެވެ.

މިމަހުގެ 22ން 23ށް ޝައިޚް ހަސީނާ ރާއްޖެއަށް ކުރައްވާ މި ދަތުރުފުޅަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް، މި އަހަރުގެ މާރޗް މަހު ބަންގްލަދޭޝްއަށް ކުރެއްވި ދަތުރުފުޅުގެ ތެރެއިން ދެއްވި ދައުވަތަކަށް ކުރައްވާ ދަތުރުފުޅެކެވެ.

އެ ކަމަނާގެ މި ދަތުރުފުޅުގައި ރައީސުލްޖުމްހޫރިއްޔާއާ ބައްދަލުކުރައްވައި ރަސްމީ ވާހަކަފުޅުތައް ބޭއްވެވުމަށް ވަނީ ހަމަޖެހިފައެވެ. މި ވާހަކަފުޅުތަކުގައި، ދެ ޤައުމުގެ ދެމެދުގައި އެކި ދާއިރާތަކުން އިތުރަށް ގުޅުން ބަދަހި ކުރެއްވުމާ ބެހޭގޮތުން މަޝްވަރާކުރައްވާނެއެވެ. އަދި ދެ ޤައުމުގެ ދެމެދު، އެކި ދާއިރާތަކުން ގުޅުން ބަދަހިކުރުމުގެ ގޮތުން ފަހުމުނާމާތަކެއްގައި ސޮއިކުރުމަށް ވަނީ ހަމަޖެހިފައެވެ. މަސްވެރިކަމާއި މީހުން ބިނާކުރުމާއި ތަޢުލީމަކީ މިހާރުވެސް ދެ ޤައުމުގެ ދެމެދު ގާތް ގުޅުމެއް އޮންނަ ބައެއް ދާއިރާތަކެވެ. ދެ ޤައުމު ދެމެދު ސޮއިކުރެވޭ މި އެއްބަސްވުންތަކާއެކު ދެ ޤައުމުގެ މެދުގައި އޮތް ގުޅުން އިތުރަށް ވަރުގަދަވެ ހަރުދަނާވެގެންދާނެއެވެ.

މީގެއިތުރުން ޝައިޚް ޙަސީނާގެ މިދަތުރުފުޅުގައި ރައްޔިތުންގެ މަޖިލީހަށް ޒިޔާރަތްކުރައްވައި ރައްޔިތުންގެ މަޖިލީހުގައި ތަޤުރީރު ކުރެއްވުމަށް މަޖިލީހަށް ވަޑައިގެންދެއްވުމަށް ދަޢުވަތު އެރުވުމަށް މަޖިލީހުން ވަނީ ފާސްކޮށްފައެވެ.