ސަސް ބަލިކޮށް މާޒިޔާއަށް ރަނގަޅު ފެށުމެއް

ޕްރެޒިޑެންޓްސް ކަޕުގައި ހޯމަ ދުވަހުގެ ހަވީރު ކުޅުނު މެޗުގައި ސުޕަ ޔުނައިޓެޑް ސްޕޯޓްސް (ސަސް) ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަނުން ފެށުން ރަނގަޅުކޮށްފިއެވެ.

ގައުމީ ފުޓުބޯޅަ ދަނޑުގައި ކުޅުނު މެޗުން މާޒިޔާ މޮޅުވީ ސަސް އަތުން 2-0 ގެ ނަތީޖާއަކުންނެވެ.

މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 21 ވަނަ މިނެޓުގައި މާޒިޔާގެ ބިދޭސީ ފޯވާޑް ކޮނޭލިއަސް ސްޓެވާޓް (ކޯނޭ) އަށް ވަނީ ރަނގަޅު ފުރުސަތެއް ލިބިފައެވެ. އެކަމަކު އޭނާ ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ. އޭގެ ފަހުން އޭރިއާ ބޭރުން މާޒިޔާގެ މިޑްފީލްޑަރު އިބްރާހިމް އައިސަމް ފޮނުވާލި ހަމަލާއެއް ސަސްގެ ގޯލްކީޕަރު މުޙައްމަދު ޝަފީއު (ޗެކް) ވަނީ މަތަކޮށްފައެވެ.

މި މެޗުގެ ފުރަތަމަ ހާފުގައި މާޒިޔާއިން ލީޑު ނެގިއިރު، މެޗުގެ 28 ވަނަ މިނެޓުގައި މުޙައްމަދު އުމެއިރު ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު ސަމޫހު އަލީ (ސަމުއްޓެ) އެވެ.

މި މެޗުގެ ދެވަނަ ހާފު ފަށައިގެންވެސް ދެ ޓީމުގެ ފަރާތުން އާދައިގެ ކުޅުމެއް ފެނިގެންދިޔައިރު، މެޗުގެ 60 ވަނަ މިނެޓުގައި ސަސްގެ ޔަސްފާދު ހަބީބް (މުލަކޭ) އަށް ވަނީ ރަނގަޅު ފުރުސަތެއް ލިބިފައެވެ. އެކަމަކު އޭނާ ހުހަށްހުރެ ފޮނުވާލި ހަމަލާއެއް މާޒިޔާގެ ބިދޭސީ ގޯލްކީޕަރު ކިރަން ކުމާރް ލިމްބޫ ވަނީ ދިފާއުކޮށްފައެވެ.

މި މެޗުގައި މާޒިޔާއިން ލީޑު ފުޅާކޮށްފައިވަނީ މެޗު ނިމެން ދެ މިނެޓަށް ވެފައި ވަނިކޮށެވެ. އިބްރާހީމް އައިސަމް ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ގައުމީ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) އެވެ. މި މެޗުގައި އަކޫ ލަނޑު ޖެހިއިރު، މިއީ މި ސީޒަނަށް މާޒިޔާއާ އަލުން ގުޅުމަށްފަހު އަކޫ އެ ޓީމަށް ކުޅެދިން ފުރަތަމަ މެޗެވެ.

މި މެޗުން މާޒިޔާ މޮޅުވިއިރު، މި މެޗު ފެށުމުގެ ކުރިން އެ ޓީމަށް ވަނީ މިދިޔަ ސީޒަނުގެ ދިވެހި ޕްރިމިއާ ލީގުގެ ޝީލްޑް ހަވާލުކޮށްފައެވެ. މާޒިޔާއަށް މިިދިޔަ ސީޒަނުގެ ލީގު ޗެމްޕިއަންކަން ލިބުނީ ކޮވިޑް-19ގެ ސަބަބުން ލީގުގެ ތިންވަނަ ބުރު ނުކުޅޭ ގޮތަށް ނިންމުމުންނެވެ. އެއާއެކު ހޯމަ ދުވަހުގެ މެޗުގ ފެށުމުގެ ކރުިން މާޒިޔާއާ ޝީލްޑް ހަވާލުކޮށްދެއްވީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލެވެ.

މީގެ އިތުރުން މި މެޗު ފެށުމުގެ ކުރިން ވަނީ ހޯމަ ދުވަހު އަވަހާރަވި ނިޝާން ޢިއްޒުދީންގެ އިއްޒަތުގެ ވެރިޔާ އުމަރު ޒާހިރުގެ ހަނދާނުގައި ސުކޫތެއް ގެނެސްފައެވެ. އަދި އުމަރު ޒާހިރު ކުޅިވަރަށް ކޮށްދެއްވި ޚިދުމަތުގެ އަގުވަޒަންކޮށް އެކަން ދަނޑުގައި އިއުލާނުކުރިއެވެ.