ފާއިތުވި 24 ގަޑިއިރު އަތޮޅުތަކުން ޕޮޒިޓިވްވީ 49 މީހުން
މާލެ ސަރަހައްދުން ޕޮޒިޓިވްވެފައިވަނީ 28 މީހުން
ކޮވިޑަށް ޓެސްޓު ކުރުމަށް ސާމްޕަލް ނެގުން
އިތުރު 93 މީހުން ކޮވިޑް-19ށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެފަހުން އާންމުކޮށްފައިވާ ތަފާސްހިސާބުތަކަށް ބަލާއިރު، ޕޮޒިޓިވްވި 93 މީހުންގެ ތެރެއިން މާލެ ސަރަހައްދުން ޕޮޒިޓިވްވެފައިވަނީ 28 މީހުންނެވެ. އަތޮޅުތަކުން 49 މީހުން ޕޮޒިޓިވްވިއިރު، ހިންގަމުންދާ ރިސޯޓްތަކުން 16 މީހުން ކޮވިޑަށް ޕޮޒިޓިވްވިއެވެ. މިއާއެކު މުޅި ރާއްޖެއިން ކޮވިޑް-19ށް ޕޮޒިޓިވްވި މީހުންގެ އަދަދު ވަނީ 93،957ށް އަރާފައެވެ. މީގެތެރެއިން 91،713 މީހުން ބަލިން ރަނގަޅުވެފައިވާއިރު، އެކްޓިވް ކޭހުގެ ގޮތުގައި ގުނަމުންދަނީ 1972 ކޭހެވެ. މީގެތެރެއިން ހޮސްޕިޓަލްތަކުގައި އެޑްމިޓްކޮށްގެން 14 މީހަކަށް އަންނަނީ ފަރުވާދެމުންނެވެ.
ރާއްޖެއިން މިބަލީގައި 259 މީހަކު ވަނީ ނިޔާވެފައެވެ.
ރާއްޖެއިން ފެންނަމުންދާ ކޮވިޑް-19ގެ ކޭސްތަކަށް ބަލާއިރު، މާލެ ސަރަހައްދުން ފެންނަ ކޭސްތަކުގެ އަދަދު މަދުނަމަވެސް އަތޮޅުތަކުން ފެންނަ ކޭސްތަކުގެ އަދަދު މަތީގައި ހުންނަތާ ވަނީ ދުވަސްތަކެއް ވެފައެވެ.
