ފައިޒަރ ވެކްސިންގެ 100,620 ޑޯޒް ރާއްޖެ ގެނެސްފި
18 ޑިސެމްބަރު 2021 | ހޮނިހިރު 18:52ބޫސްޓަރ ޑޯޒްގެ ގޮތުގައި ޖަހަމުން އަންނަނީ ފައިޒަރ ވެކްސިން
ރާއްޖެ ގެނައި ފައިޒަރ ވެކްސިންގެ ޑޯޒްތައް
އެމެރިކާއިން ރާއްޖެއަށް ހަދިޔާކުރި ފައިޒަރ ވެކްސިންގެ 100,620 ޑޯޒް ރާއްޖެ ގެނެސްފިއެވެ.
ކޮވެކްސް ފެސިލިޓީގެ ދަށުން އެމެރިކާއިން ރާއްޖެއަށް ހަދިޔާކުރި ވެކްސިން ޑޯޒްތައް ރާއްޖެ ގެނެސްފައިވާކަން ހާމަކޮށްފައިވަނީ ރާއްޖޭގައި ހުންނަ ޔުނިސެފް އޮފީހުން ކޮށްފައިވާ ޓްވީޓެއްގައެވެ. މިޑޯޒްތައް ލިބުމުން ރާއްޖޭގައި މިހާރު ކުރިޔަށްދާ ވެކްސިނޭޝަން ޕްރޮގްރާމްގައި ވެކްސިން ޖަހާ މީހުންނަށާއި, ބޫސްޓަރ ޑޯޒް ޖެހުމަށް މިވެކްސިން ޑޯޒްތައް ބޭނުންކުރެވޭނެކަމަށް ޔުނިސެފުން ބުނެއެވެ.
ރާއްޖޭގައި މިވަގުތު ބޫސްޓަރ ޑޯޒްގެ ގޮތުގައި ޖަހަމުން އަންނަނީވެސް ފައިޒަރ ވެކްސިނެވެ.
އެޗްޕީއޭއިން މިހާރު ބޫސްޓަރ ޑޯޒު ޖަހައި ދެމުންދަނީ ފްރަންޓްލައިންގައި މަސައްކަތްކުރާ ސިއްހީ ޚިދުމަތްތެރިންނަށާއި، 60 އަހަރުންމަތީގެ މީހުންނަށާއި، ދިފާއީ ނިޒާމު ބަލިކަށި މީހުންނަށެވެ. މީގެ ތެރޭގައި ހަށިގަނޑުގެ ގުނަވަނެއް ބަދަލުކޮށްފައިވާ މީހުންނާއި، ހަށިގަނޑުގެ ދިފާއީ ބާރު ދެރަކުރާ ފަދަ ބޭސްތައް ބޭނުންކުރާ މީހުން ހިމެނެއެވެ. ނަމަވެސް މިމަހުގެ 15ން ފެށިގެން ތިން ވަނަ ޑޯޒު އާންމުންނަށް ދޭން ފަށާނެ ކަމަށް މީގެ ކުރިން އެޗްޕީއޭއިން ބުނެފައިވެއެވެ.
ބޫސްޓަރ ޑޯޒު ޖަހައިދިނުން ލަސްވުމާގުޅޭގޮތުން އެޗްޕީއޭގެ އެޕިޑިއަމޮލަޖިސްޓް ޑރ. އިބްރާހީމް އަފްޒަލް ވިދާޅުވީ، ކަނޑައަޅާފައިވާ އަދަދަށް ވެކްސިން ލިބޭނެ ކަމަށާއި، ބައެއް ސަބަބުތަކާ ގުޅިގެން ވެކްސިން ލިބުން ލަސްވެދާނެ ކަމަށެވެ. އަދި ވެކްސިން ލިބުމާއެކު، އިތުރު ކެޓަގަރީތަކަށް ވެކްސިން ދިނުމުގެ މަސައްކަތް ފަށާނެ ކަމަށް ޑރ. އަފްޒަލް ވިދާޅުވިއެވެ.
ވެކްސިން ދިނުމާ ގުޅޭގޮތުން 27 ނޮވެމްބަރު 2021ވީ ހޮނިހިރު ދުވަހު ރައީސް އިބްރާހިމް މުހައްމަދު ސޯލިހު ވިދާޅުވެފައިވަނީ، އާންމުންނަށް ޑިސެމްބަރު މަހުގެ މެދު ތެރޭގައި ބޫސްޓަރ ޑޯޒް ޖަހަން ފަށާނެ ކަމަށެވެ. އަދި ބޫސްޓަރ ޑޯޒް ޖެހޭ މީހުން ވީ އެންމެ އަވަހަކަށް ވެކްސިން ޖެހުމަށް ރައީސް އިލްތިމާސް ކުރެއްވިއެވެ.
ބޫސްޑަރ ޑޯޒް މިހާރު ޖަހައިދެމުންދަނީ އެޕޮއިންޓްމެންޓް އުސޫލުންނެވެ. ބޫސްޓަރ ޑޯޒް ޖަހައިދެމުންދަނީ ހުޅުމާލެ ހޮސްޕިޓަލް، އައިޖީއެމްއެޗް އަދި ދަމަނަވެށިންނެވެ. އެޗްޕީއޭއިން ބުނީ މި ސެންޓަރުތަކަށް ބޫސްޓަރ ޑޯޒް ޖަހަން ދިއުމުގެ ކުރިން އެޕޮއިންޓްމެންޓް ހައްދަން ޖެހޭނެ ކަމަށެވެ.https://book.hpa.gov.mvއިން އެޕޮއިންޓްމެންޓް ހެއްދޭނެ ކަމަށް އެޗްޕީއޭއިން ބުނެފައިވެއެވެ. އަދި ބޫސްޓަރ ޑޯޒް ޖެހޭނީ ދެވަނަ ޑޯޒް ޖެހުމަށްފަހު 6 މަސްދުވަސް ވެފައިވާ ފަރާތްތަކަށެވެ.
އެޗްޕީއޭއިން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު، ރާއްޖޭގައި ކޮވިޑް-19ގެ ބޫސްޓަރ ޑޯޒް ޖެހި މީހުންގެ އަދަދު ވަނީ 22،093ށް އަރާފައެވެ. ވެކްސިންގެ ފުރަތަމަ ޑޯޒް 396،358 މީހުން ޖަހާފައިވާއިރު ދެ ވަނަ ޑޯޒް 366،165 މީހުން ވަނީ ޖަހާފައެވެ.
