އަތޮޅުތަކުން ޕޮޒިޓިވްވި 87 މީހުންނާއެކު، އިތުރު 131 މީހުން ކޮވިޑް-19ށް ޕޮޒިޓިވްވެއްޖެ

އިތުރު 131 މީހުން ކޮވިޑް-19ށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެފަހުން އާންމުކޮށްފައިވާ ތަފާސްހިސާބުތަކަށް ބަލާއިރު، ޕޮޒިޓިވްވި 131 މީހުންގެ ތެރެއިން މާލެ ސަރަހައްދުން ޕޮޒިޓިވްވެފައިވަނީ 22 މީހުންނެވެ. އަތޮޅުތަކުން 87 މީހުން ޕޮޒިޓިވްވިއިރު ހިނގަމުންދާ ރިސޯޓްތަކުން 22 މީހުން ކޮވިޑަށް ޕޮޒިޓިވްވިއެވެ. މިއާއެކު މުޅި ރާއްޖެއިން ކޮވިޑް-19ށް ޕޮޒިޓިވްވި މީހުންގެ އަދަދު ވަނީ 93،864ށް އަރާފައެވެ. މީގެތެރެއިން 91،573 މީހުން ބަލިން ރަނގަޅުވެފައިވާއިރު، އެކްޓިވް ކޭހުގެ ގޮތުގައި ގުނަމުންދަނީ 2019 ކޭހެވެ. މީގެތެރެއިން ހޮސްޕިޓަލްތަކުގައި އެޑްމިޓްކޮށްގެން 15 މީހަކަށް އަންނަނީ ފަރުވާދެމުންނެވެ.

ރާއްޖެއިން މިބަލީގައި 259 މީހަކު ވަނީ ނިޔާވެފައެވެ

ރާއްޖެއިން ފެންނަމުންދާ ކޮވިޑް-19ގެ ކޭސްތަކަށް ބަލާއިރު، މާލެ ސަރަހައްދުން ފެންނަ ކޭސްތަކުގެ އަދަދު މަދުނަމަވެސް އަތޮޅުތަކުން ފެންނަ ކޭސްތަކުގެ އަދަދު މަތީގައި ހުންނަތާ ވަނީ ދުވަސްތަކެއް ވެފައެވެ.

ރާއްޖޭގެ ކޮވިޑްގެ ހަލާތަށް ބަލާއިރު، ދުނިޔޭގައި މިހާރު ފެތުރެމުން އަންނަ ކޮވިޑް-19ގެ އައު ވޭރިއެންޓްކަމުގައިވާ އޮމިކްރޯންގެ އިތުރު 4 ކޭސް ރާއްޖެއިން ވަނީ ފެނިފައެވެ. އެކަމުގެ އިތުރު ތަފްސީލް ދެއްވަމުން އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ، އޮމިކްރޯނަށް ޕޮޒިޓިވްވެފައި ވަނީ ރާއްޖެއަށް ޒިޔާރަތްކުރި ފަތުރުވެރިންތަކެއް ކަމަށެވެ. އަދި މި މީހުންނަކީ އެފްރިކާގެ ދެކުނު ގައުމުތަކަށް މިފަހުން ދަތުރުކޮށްފައިވާ މީހުން ކަމަށެވެ.

މިކަމާ ގުޅިގެން ރިސްކް އެސެސްމެންޓްތައް މިހާރު ހަދަމުން އަންނަކަން ފާހަގަކުރައްވައި ޑރ. އަފްޒަލް ވިދާޅުވީ، އިތުރަށް އަޅަން ޖެހޭ ފިޔަވަޅުތަކާމެދު މިހާރު މަޝްވަރާ ކުރެވެމުން އަންނަ ކަމަށެވެ.