އެރިކްސަންގެ އެއްބަސްވުން ދެ ފަރާތް އެއްބަސްވެގެން އުވާލައިފި

މި ސީޒަނުގެ އިޓާލިއަން ލީގުގައި ކުޅުމުގެ ހުއްދަ ނުލިބުމުން އިންޓަ މިލާނުން އެ ޓީމަށް ކުޅެމުން އައި ޑެންމާކުގެ މިޑްފީލްޑަރު ކްރިސްޓިއަން އެރިކްސަންގެ އެއްބަސްވުން ދެ ފަރާތް އެއްބަސްވެގެން އުވާލައިފިއެވެ.

މި އަހަރުގެ ޔޫރޯ ފުޓްބޯޅަ މުބާރާތުގައި ޑެންމާކުން ކުޅުނު ފުރަތަމަ މެޗުގައި އުމުރުން 29 އަހަރުގެ އެރިކްސަން ހިތް ހުއްޓިގެން ދަނޑު މައްޗަށް ވެއްޓުނެވެ. އެއާއެކު ދަނޑު މަތީގައި އެތައް އިރެއް ވަންދެން އެރިކްސަނަށް ފަރުވާދިންއިރު، އޭނާ ވަނީ ފަހުން ހޮސްޕިޓަލަށް ގެންގޮސް އޮޕަރޭޝަނެއް ކޮށްފައެވެ.

އެ އޮޕަރޭޝަނަކީ އެރިކްސަނުގެ ހިތަށް އިމްޕްލާންޓަބަލް ކާޑިއޮވާޓާ ޑެފިބްރިލޭޓާ (އައިސީޑީ) އެއް ލެއްވުމަށް ކުރި އޮޕަރޭޝަނެކެވެ. އެކަމަކު އައިސީޑީ ލައްވައިގެން ހުރެ އިޓަލީގައި ޕްރޮފެޝަނަލް ފުޓްބޯޅަ ކުޅުމަކީ މަނާ ކަމެކެވެ. އެހެންކަމުން އައިސީޑީ ނުލައްވައި އެރިކްސަނަށް އިޓާލިއަން ލީގުގައި ކުޅެވޭތޯ ބަލަން ޓެސްޓުތަކެއް ހެދިއިރު، މި ވަގުތުގެ ސިއްހީ ހާލަތު ހުރި ގޮތުން އޭނާއަށް މި ސީޒަނުގެ އިޓާލިއަން ލީގުގައި ނުކުޅެވޭނެ އިންޓައިން ވަނީ ބުނެފައެވެ. އެހެންކަމުން ހުރިހާ ބައެއްގެ މަޝްވަރާގެ މަތިން އެރިކްސަންގެ އެއްބަސްވުން އިންޓައިން މިހާރު ވަނީ އުވާލާފައެވެ.

އިންޓައިން އެރިކްސަންގެ އެއްބަސްވުން އުވާލިއިރު، މީގެ ކުރިން އޭނާ ވަނީ ޕްރޮފެޝަަނަލީ ފުޓްބޯޅައިން ކުރިއަށްދާން ނިންމައި، އައިސީޑީ ލައްވައިގެން ފަރިތަކުރުންތައް ފަށާފައެވެ. އެގޮތުން މީގެ ކުރިން އޭނާ ފަރިތަކުރުންތައް ކުރިއަށްގެންގޮސްފައިވަނީ ޒުވާން އުމުރު އޭނާ އެންމެ ފުރަތަމަ ކުޅުނު ކުލަބު ކަމަށްވާ ޑެންމާކުގެ އޮޑެންސީ ބޯލްޑްކްލުބް (އޯބީ) އިންނެވެ.

ރިޕޯޓުތައް ބުނާ ގޮތުން އައިސީޑީ ލައްވައިގެން ކުޅުމުގެ ފުރުސަތު ދޭ ޔޫރަޕުގައި ވަރުގަދަ އެއް ލީގަކީ ނެދަލެންޑްސްގެ ލީގެވެ. އެގޮތުން ނެދަލެންޑްސްގެ އަޔަކްސްގެ ތަރި ޑޭލީ ބްލިންޑް މީގެ ކުރިން ވަނީ އައިސީޑީ ލައްވައިގެން އެ ލީގުގައި ކުޅެފައެވެ. އެއާއެކު އަޔަކްސްއަށް ބަދަލުވާން އެރިކްސަން ބޭނުންވާ ކަމަށް ރިޕޯޓުތައް ބުނެއެވެ.

އެރިކްސަނަކީ މީގެ ކުރިން އަޔަކްސްއަށް ކުޅުނު ކުޅުންތެރިއެކެވެ. އެގޮތުން 2010 ވަނަ އަހަރުގެ ޖެނުއަރީ މަހު އަޔަކްސްގެ ސީނިއާ ޓީމުން ކެރިއަރު ފެށި އެރިކްސަން ވަނީ އެ ޓީމަށް ކުޅެދިން 162 މެޗުގައި 32 ލަނޑު ޖަހާފައެވެ. އަދި ވަނީ އެ ޓީމާއެކު ނެދަލެންޑްސް ލީގު ތިން ފަހަރު ކާމިޔާބުކޮށްފައެވެ.

އޭގެ ފަހުން ޓޮޓެންހަމް ހޮޓްސްޕާއަށް ބަދަލުވެ އެ ޓީމުގައި މޮޅު ކުޅުމެއް ދެއްކި އެރިކްސަން އިންޓައަށް ބަދަލުވީ މިދިޔަ އަހަރުގެ ޖެނުއަރީ މަހު 16.9 މިލިޔަން ޕައުންޑަށް ހަތަރު އަހަރާ ބައިގެ އެއްބަސްވުމެއްގެ ދަށުންނެވެ. އެކަމަކު އިންޓައަށް ބަދަލުވެ އެރިކްސަނަށް އެންމެ އެދެވޭ ކުޅުމެއް ނުދެއްކުނު ނަމަވެސް، އޭނާ ވަނީ އެ ޓީމާއެކު މިދިޔަ ސީޒަނުގެ އިޓާލިއަން ލީގު ކާމިޔާބުކޮށްފައެވެ.