އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ރާއްޖޭގެ ގައުމީ ފިރިހެން ވޮލީބޯޅަ ޓީމުން ކުޅޭ ފަހު މެޗު ބަލަންދާ ސަޕޯޓަރުންގެ މެދުގައި ނެގޭ ލަކީ ޑްރޯއަކުން ހޮވޭ ދެ މީހަކަށް، މި މަހު ބަންގްލަދޭޝްގައި ފަށާ ސެންޓްރަލް ޒޯން ވޮލީބޯޅަ މުބާރާތުގެ މެޗެއް ބަލާލަން ދިޔުމުގެ ފުރުސަތު ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ހުޅުވާލައިފިއެވެ.
ހައިދަރުއާބާދު ސްޕައިކާސްއާ ދެކޮޅަށް ދެކޮޅަށް ރާއްޖޭން ކުޅޭ ފަހު މެޗު ފަށާނީ ހޮނިހިރު ދުވަހު ހަވީރު 16:30 ގައެވެ. ވީއޭއެމުން ބުނީ މި މެޗު ބަލަން ޒުވާނުންގެ މަރުކަޒަށްދާ ސަޕޯޓަރުންނަށް ވައުޗަރެއް ދޭނެ ކަމަށާއި، އެ ވައުޗަރު އެ ތަނުގައި ބެހެއްޓިފައި ހުންނަ ފޮއްޓަށް ލުމުން ގުރުއަތުލުމުގައި ބައިވެރިވެވުނީ ކަމަށެވެ. އަދި މެޗު ނިމުމުން ލަކީ ޑްރޯތަކުގެ މެދުގައި ގުރުއަތުލުން ބާއްވާނެ ކަމަށް ވީއޭއެމުން ބުނެއެވެ.
ގުރުއަތުލުމުން ހޮވޭ ދެ ސަޕޯޓަރަކު ސެންޓްރަލް ޒޯން ވޮލީބޯޅަ މުބާރާތުގައި ގައުމީ ޓީމު ކުޅޭ މެޗެއް ބަލާލުމަށް ބަންގްލަދޭޝަށް ދިޔުމުގެ ދެކޮޅު ޓިކެޓާއި ހުރުމުގެ ކަންކަން ހަމަޖައްސައިދޭނެ ކަމަށް ވީއޭއެމުން ބުނެއެވެ. މީގެ އިތުރުން ގައުމީ ވޮލީބޯޅަ ޓީމުގެ ދެ ޖާޒީ ސަޕޯޓަރަކަށް ދިނުމަށްވެސް ވަނީ ނިންމާފައެވެ.
ވީއޭއެމުން ބުނީ ސެންޓްރަލް ޒޯން މުބާރާތުގެ ކުރިން ގައުމީ ޓީމުން ކުޅޭ ފަހު މެޗަކީ މި މުބާރާތަށް ރާއްޖެއިންވާނެ އެންމެ ފަހުގެ ތައްޔާރީތައް ކަމަށެވެ. އެހެންކަމުން މި މެޗަށް ސަޕޯޓަރުން ގޮސް ގައުމީ ޓީމަށް ހިތްވަރުދީ، ޓީމުގެ ފަހަތުގައި ތިބުން އެއީ ޓީމަށް ލިބޭނެ ބޮޑު ހިތްވަރެއް ކަމަށްވެސް ވަނީ ބުނެފައެވެ.
ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވުމުގެ ގޮތުން ހައިދަރުއާބާދު ސްޕައިކާސްއާ ދެކޮޅަށް ރާއްޖޭން މިހާތަނަށް ދެ މެޗެއް ކުޅެފައިވާއިރު، އެ ދެ މެޗުންވެސް ރާއްޖެ ވަނީ 3-1 ސެޓުން މޮޅުވެފައެވެ. މި މެޗުތަކުގެ ކުރިން މި މަހު ރާއްޖެއިން ވަނީ ސްރީ ލަންކާއާ ދެކޮޅަށްވެސް އެކުވެރިކަމުގެ ތިން މެޗެއް ކުޅެފައެވެ. އެކަމަކު އެ ތިން މެޗުންވެސް ގައުމީ ފިރިހެން ވޮލީބޯޅަ ޓީމު ވަނީ ބަލިވެފައެވެ.
މި މަހުގެ 21 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށް ސެންޓްރަލް ޒޯން ވޮލީބޯޅަ މުބާރާތް ބަންގާޅުގައި ބާއްވާއިރު، ފިރިހެން މުބާރާތުގައި ވާދަކުރާ ގައުމުތަކަކީ ރާއްޖެ އާއި، ނޭޕާލާއި، ސްރީ ލަންކާ އާއި، އުޒްބެކިސްތާން އަދި ބަންގްލަދޭޝެވެ. އަދި އަންހެން މުބާރާތުގައި ރާއްޖެއާއެކު ވާދަކުރާނީ ކިރްގިސްތާނާއި، ނޭޕާލާއި، އުޒްބެކިސްތާން އަދި ބަންގްލަދޭޝެވެ.
