އިޓާލިއަން ލީގުގައި ހުކުރު ދުވަހުގެރޭ ކުޅުނު މެޗުން ފުލުގައި އޮތް ސަލެނިޓާނާ ބަލިކޮށް އެންމެ ފަހުގެ ޗެމްޕިއަން އިންޓަ މިލާނުން ތާވަލުގެ އެއްވަނައިގައި ހަތަރު ޕޮއިންޓުގެ ލީޑެއް ނަގައިފިއެވެ.

ރަށުން ބޭރުގައި ކުޅުނު މެޗުން އިންޓަ މޮޅުވީ ސަލެނިޓާނާ އަތުން ފަސޭހަކަމާއެކު 5-0 ގެ ނަތީޖާއަކުންނެވެ.

މި މެޗު ފަށައިގެން 11 ވަނަ މިނެޓުގައި ހަކަން ޗަޅަނޯލޫ ނެގި ކޯނަަރަކުން އިވާން ޕެރިސިޗް ވަނީ އިންޓައަށް ލީޑު ނަގައިދީފައެވެ. އަދި އޭގެ ފަހުން ފުރަތަމަ ހާފު ނިމުމުގެ ކުރިން އިންޓައިން ލީޑު ފުޅާކުރިއިރު، އެޑިން ޒެކޯ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޑެންޒެލް ޑަމްފްރީސްއެވެ.

މި މެޗުގެ ދެވަނަ ހާފުގައިވެސް އިންޓައިން މޮޅު ކުޅުމެއް ދެއްކިއިރު، މި ހާފު ފަށައިގެން ހަތްވަނަ މިނެޓުގައި ޗަޅަނޯލޫ ދިން ބޯޅައަކުން އެލެކްސިސް ސަންޗޭޒް ވަނީ އެ ޓީމުގެ ތިންވަނަ ލަނޑު ޖަހައިދީފައެވެ. ދެން މި މެޗުގައި އިންޓައިން ކާމިޔާބުކުރި އަނެއް ދެ ލަނޑު ޖަހައިދިނީ ލަޓަރޯ މާޓިނޭޒް އާއި ބަދަލު ކުޅުންތެރިއެއްގެ ގޮތުގައި ކުޅެން އެރި ރޮބާޓޯ ގަގްލިއާޑިނީއެވެ.

މި މޮޅާއެކު އިންޓައިން ތާވަލުގެ އެއްވަނައިގައި ހަތަރު ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުން 18 މެޗުން 43 ޕޮއިންޓް ލިބިފައެވެ. ދެވަނައިގައި އޮތް އޭސީ މިލާނަށް 17 މެޗުން 39 ޕޮއިންޓް ލިބިފައިވާއިރު، ތިންވަނައިގައި އޮތް އެޓަލާންޓާއަށް ވަނީ 17 މެޗުން 37 ޕޮއިންޓް ލިބިފައެވެ. އެހެންކަމުން ލީގުގައި އާދީއްތަ ދުވަހުގެރޭ މިލާނުން ނާޕޮލީއާ ދެކޮޅަށް ކުޅޭ މެޗުގެ ނަތީޖާ ނުކުންނަ ގޮތަކުން އިންޓަގެ ލީޑު ހަނިވުމުގެ ފުރުސަތު އެބައޮތެވެ.