ކޮވިޑް-19 ބައެއް ސަރަހައްދުތަކުގައި 2024 ވަނަ އަހަރާ ހަމައަށް ދިގުދެމިގެން ހިނގައިދާނެ: ފައިޒަރ
ބައެއް ހިސާބުތަކުގައި ކުރިޔަށް އޮތް ދެ އަހަރުވެސް މިހާރު ކޮވިޑް-19ގެ ކޭސްތައް ފެންނަމުންދާ ގޮތަށް އެމިންވަރަށް ކޭސްތައް ފެންނަމުންދާނެކަމަށް ބެލެވޭ
ފައިޒަރ ވެކްސިން ޖެހުމަށް ތައްޔާރުވަނީ
2020 ވަނަ އަހަރުން ފެށިގެން ދުނިޔެ ތަޖުރިބާކުރަމުންމިދާ ކޮވިޑް-19 ޕެންޑަމިކް ކުރިޔަށް އޮތް ދެ އަހަރު ދުވަހުގެ މުއްދަތަށް ބައެއް ހިސާބުތަކުގައި ދެމިއޮންނާނެކަމަށް ބެލެވޭ ކަމަށް ކޮވިޑް-19ށް ވެކްސިން އުފައްދާފައިވާ ފައިޒަރ ކުންފުނިން ބުނެފިއެވެ.
ފައިޒަރ ކުންފުނީގެ ޗީފް ސައިންޓިފިކް އޮފިސަރ މައިކަލް ޑޮލްސްޓެން އިންވެސްޓަރުންނާ ބައްދަލުކޮށް ޕްރެޒެންޓޭޝަން ދެއްވަމުން ވިދާޅުވީ އެކުންފުނިން ދެކޭގޮތުގައި ބައެއް ހިސާބުތަކުގައި ކުރިޔަށް އޮތް ދެ އަހަރުވެސް މިހާރު ކޮވިޑް-19ގެ ކޭސްތައް ފެންނަމުންދާ ގޮތަށް އެމިންވަރަށް ކޭސްތައް ފެންނަމުންދާނެކަމަށް ބެލެވޭކަމަށެވެ. ނަމަވެސް ހަމަ މިމުއްދަތުގެ ތެރޭގައި އަނެއް ބައި ހިސާބުތަކުގައި ކޭސްތައް ފެންނަ މިންވަރު ދަށްވެ ޕެންޑަމިކަކުން އެންޑަމިކަކަށް ބަދަލުވާނެކަމަށް ބެލެވޭކަމަށެވެ. 2024 ވަނަ އަހަރުގެ ފަހުން ކޮވިޑް-19 ޕެންޑަމިކެއްގެ ގޮތުގައި އޮންނާނެކަމަށް ނުފެންނަކަމަށްވެސް ފައިޒަރ ގެ ޗީފް ސައިންޓިސްޓް ވިދާޅުވިއެވެ.
އެކުންފިނުން އަންދާޒާކުރާ ގޮތުގައި 2024ގެ ފަހުން މުޅި ދުނިޔޭގައިވެސް ކޮވިޑް-19 ވާނީ އެންޑަމިކަށެވެ.
ޗީފް ސައިންޓިސްޓު ވިދާޅުވީ މިކަންވާނެ އިރަކާއި ވާނެގޮތެއް ކަނޑައަޅާނީ ކޮވިޑް-19 ބަދަލުވަމުން އަންނަ ގޮތެއްގެ މައްޗަށެވެ. މުޖުތަމައުގައި ދިރިއުޅޭ ބަޔަކު ވެކްސިން ޖަހާ މިންވަރާއި ބަލިން ރައްކާތެރިވުމަށް އަޅާފިޔަވަޅުތަކާއި ބޭސްފަރުވާގެ ނިޒާމާއި ވެކްސިން ލިބެން ހުންނަ މިންވަރެއްގެ މައްޗަށްކަމަށެވެ. އަދި ކޮވިޑް-19ގެ އައު ވޭރިއަންޓްތައް ފެންނަ މިންވަރުވެސް ޕެންޑަމިކް ނިމުމަކަށް އައުމުގައި އިސް ދައުރެއް އަދާކުރާނެކަމަށް އޭނާ ވިދާޅުވިއެވެ.
ފައިޒަރ އިން ވަނީ ޖަރުމަނުގެ ބައޯއެންޓެކާ ގުޅިގެން ކޮވިޑް-19ން ދިފާއުވުމަށް ފައިޒަރ ވެކްސިން އުފައްދާފައެވެ. އެކުންފުނިން މިހާރު އަންދާޒާކުރާ ގޮތުގައި އަންނަ އަހަރު 31 ބިލިއަން އެމެރިކާ ޑޮލަރު އެކުންފުންޏަށް ލިބޭނެއެވެ. އެކުންފުނިން އަންނަނީ އަންނަ އަހަރު 4 ބިލިއަން ވެކްސިން ޑޯޒް އުފެއްދުމުގެ މަސައްކަތްކުރަމުންނެވެ.
އަނެއްކޮޅުން ފައިޒަރ އިން އުމުރުން 2 އަހަރާއި 4 އަހަރާ ދެމެދުގެ ކުދިންނަށް އުފެއްދި ވެކްސިން ޑޯޒުން ކޮވިޑް-19 އާ ދެކޮޅަށް ދިފާއީ ނިޒާމު ރުކުރުވާލާ މިންވަރު ކުރިން ހީކުރި މިންވަރަށްވުރެ ދަށްކަމަށް އެކުންފުނިން ވަނީ ބުނެފައެވެ. އެހެންކަމުން އެޑޯޒް ބޭނުންކުރުމުގެ ހުއްދަ ލިބުމަށް އަދި ވަގުތުނަގާނެއެވެ.
މީގެއިތުރުން ފައިޒަރ އިން އަންނަނީ ކޮވިޑް-19 ޖެހިފައިވާ ބަލިމީހުންނަށް ދިނުމަށް ބޭސް ގުޅައެއް އުފައްދާ އޭގެ ޓްރަޔަލްތައްވެސް ކުރިޔަށް ގެންދަމުންނެވެ. ޕެކްސްލޮވިޑް ގެ ނަމުން ނަންދީފައިވާ މި ބޭސްގުޅަ ބޭނުންކުރުމުން ހޮސްޕިޓަލުގައި އެޑްމިޓްކުރުމުންނާއި މަރުވުމާ ހިސާބަށް ދިޔުމާއި ބަލީގައި ބޮޑުވަރުވުމުން ދުރުކޮށްދޭ މިންވަރު ހުރީ 90 އިންސައްތައިގައި ކަމަށް މިހާތަނަށް ކުރިޔަށް ގެންދިޔަ ކްލިނިކަލް ޓްރަޔަލް ތަކުން ވަނީ ހާމަވެފައެވެ.
ފައިޒަރ އިން ކޮވިޑް-19 ބައެއް ހިސާބުތަކުގައި ކުރިޔަށް އޮތް ދެ އަހަރު ދުވަހުވެސް ދިގުދެމިގެންދާނެކަމަށް ބުނެފައިމިވަނީ މިފަހަކުން ކޮވިޑް-19ގެ އައު ވޭރިއަންޓެއްކަމުގައިވާ އޮމިކްރޯން ވޭރިއަންޓް ފެނިފައިވަނިކޮށެވެ.
އޮމިކްރޯން ވޭރިއަންޓް ފެނުމުގެކުރިން އެމެރިކާގެ އިންފެކްޝަސް ޑިޒީސް އެކްސްޕާޓް އެންތަނީ ފައުޗީ ވިދާޅުވެފައިވަނީ ކޮވިޑް-19 ޕެންޑަމިކް 2022 ވަނަ އަހަރު ނިމޭނެކަމަށް ބެލެވޭކަމަށެވެ.
