އަވަހާރަކޮށްލާފައިވާ އުނގޫފާރު ދާއިރާގެ ކުރީގެ މެމްބަރ އަދި ދީނީ އިލްމުވެރިޔާ ޑރ އަފްރާޝީމް އަލީގެ ހަނދާނުގައި އުނގޫފާރުގައި ބިނާކޮށްފައިވާ އިސްލާމީ މަރުކަޒު ހުޅުވައިފިއެވެ.
ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރުކަމުގައި ހުންނަވަނިކޮށް އަފްރާޝީމް އަވަހާރަކޮށްލާފައިވަނީ 2012 ވަނަ އަހަރުގެ ސެޕްޓެމްބަރ މަހުގެ 30 ވަނަ ދުވަހުގެ ރޭ މެންދަމުއެވެ. އަފްރާޝީމްގެ ހަނދާނުގައި ބިނާކުރި އިސްލާމީ މަރުކަޒާއި އެ އެތަނުގެ މިސްކިތް، "މަސްޖިދުއް ދުކްތޫރު އަފްރާޝީމް އަލީ" ހުޅުވުމަށް ހުކުރު ދުވަހު އުނގޫފާރުގައި ބޭއްވި ރަސްމިއްޔާތެއްގައި އެތަން ހުޅުއްވައި ދެއްވީ އިސްލާމިކް މިނިސްޓަރު ޑރ. އަހުމަދު ޒާހިރެވެ. އެ ރަސްމިއްޔާތުގައި އަފްރާޝީމްގެ އާއިލާ އާއި އުނގޫފާރުގެ ގިނަ އަދަދެއްގެ ބަޔަކު ބައިވެރިވިއެވެ.
މިސްކިތް ހުޅުއްވައިދެއްވުމަށްފަހު ހުކުރު ނަމާދު އިމާމުވެ ކުރެއްވީ އިސްލާމިކް މިނިސްޓަރ ޑރ އަހުމަދު ޒާހިރެވެ.
އުނގޫފާރު އިސްލާމީ މަރުކަޒު ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން އިސްލާމިކް މިނިސްޓަރު ޑރ. އަހުމަދު ޒާހިރު ވިދާޅުވީ، އެ ތަން ޑިޒައިންކޮށްފައި ހުންނަނީ ގިނަ ޚިދުމަތްތަކެއް ލިބޭ ގޮތަށް ކަމަށާއި އެ ޚިދުމަތްތަކުގެ ބޭނުން އެންމެ ފުރިހަމައަށް ހިފާނެ ކަމަށް އުއްމީދު ކުރައްވާ ކަމަށެވެ. މިނިސްޓަރު ވިދާޅުވީ އުނގޫފާރު އިސްލާމިކް ސެންޓަރުގައި ކްލާސްތައް ހިންގަން އިސްލާމިކް ޔުނިވާސިޓީ އާއި ގުރުއާނާ ބެހޭ މަރުކަޒުން ވެސް ޝައުގުވެރިވާ ކަމަށެވެ. އެ ތަނުގެ ހުރިހާ ކްލާސްރޫމެއް އިސްލާމިކް ޔުނިވާސިޓީއަށް ދޫކުރަން އެ ޔުނިވާސިޓީން އެދުނު ކަމަށާއި ނަމަވެސް، ގުރުއާނާ ބެހޭ މަރުކަޒަށް ފުރުސަތު ނޯންނަ ގޮތަކަށް ޖާގަ ނުދެއްވާނެ ކަމަށް މިނިސްޓަރ ވިދާޅުވިއެވެ.
އިސްލާމީ ތައުލީމް ދޭ މަރުކަޒެއް ބިނާކުރުމުގެ މަގުސަދުގައި އިމާރާތްކޮށްފައިވާ މި މިސްކިތުގައި 4 ކުލާސް ރޫމް، ލައިބްރަރީ، ޕޭންޓްރީ، އެޑްމިން އޮފީސް، ޖަލްސާކުރާ ހޯލެއް ހިމެނެއެވެ. ދެ ފަންގިފިލާއަށް ހަދާފައިވާ މި މިސްކިތުގައި ނަމާދު ކުރުމަށް ކަނޑައަޅާފައިވާ 5380 އަކަފޫޓު ސަރަޙައްދުގައި އެއްފަހަރާ 900 މީހުންނަށް ނަމާދުކުރެވޭނެއެވެ. ހަމައެހެންމެ މި މިސްކިތުގައި އަންހެނުންނަށް ވަކިން ވުޟޫކުރުމާއި ނަމާދު ކުރެވޭނެ އިންތިޒާމްވަނީ ހަމަޖައްސާފައެވެ.
މިސްކިތް ހެދުމުގެ އެއްބަސްވުމުގައި އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާއެކު ސަރުކާރުން ސޮއިކުރައްވާފައިވަނީ 02 މާރިޗު 2017 ގައެވެ. މިސްކިތް ޢިމާރާތްކުރުމުގެ ޢަމަލީ މަސައްކަތް ފަށާފައިވަނީ 02 މާރިޗު 2017 އަދި ނިމިފައިވަނީ 10 ޖަނަވަރީ 2020 ގައެވެ.
