ތިލަފުށީގެ ވެލިގަނޑުގެ ޓެސްޓުތައް ހަދައި ބެލިއިރު ކަންބޮޑުވާ އެތައް ކަމެއް އެބަހުރިކަމަށް މިނިސްޓަރ އޮފް އެންވާރަމެންޓް، ކްލައިމެޓް ޗޭންޖް އެންޑް ޓެކްނޮލޮޖީ، އާމިނަތު ޝައުނާ ވިދާޅުވެއްޖެއެވެ.

ކުނިން ހަކަތަ އުފެއްދުމާ، ހަކަތަ މެނޭޖުކުރުމުގެ މަސައްކަތް އިފްތިތާހުކުރުމުގެ ރަސްމިއްޔާތުގައި ވާހަކަ ދައްވަމުން މިނިސްޓަރ ވިދާޅުވީ މި މައްސަލަތއް ހައްލު ކުރުމަށް މިހާރު މަސައްކަތް ކުރަމުން އަންނަ ކަމަށެވެ.

އަދި ތިލަފުށިން އަރާ ވިހަ ދުމުގެ އަސަރު މާލެއާ, މާލޭ ސަރަހައްދުގެ ހުރިހާ ރަށަކަށްވެސް ކުރާކަން ފާހަގަކުރައްވައި، މިނިސްޓަރ ވިދާޅުވީ މިކަމުގެ ސަބަބުން ހަމައެކަނި ގެއްލުންވަނީ މާލެ ސަރަހައްދަށް ނޫން ކަމަށެވެ. މިނިސްޓަރ ވިދާޅުވީ ތިލަފުށި ފުރި ބާރުވެ, އިތުރަށް އެތަނަށް ކުނި ޖަމާ ނުކުރެވޭ މިންވަރަށް ކަންކަން ގޯސްވުމުގެ ސަބަބުންނާއި، ރާއްޖޭގެ އެކި ސަރަހައްދު ތަކުގައި ކުނި މެނޭޖް ކުރާނެ މަރުކަޒުތަކެއް ނެތުމުގެ ސަބަބުން، ރާއްޖޭގެ ކޮންމެ ރަށެއްގައި މިހާރު މި ވަނީ ހަމަ ތިލަފުށީގެ މިސާލު ފެންނަން ފަށާފައެވެ.

ތިލަފުށީގައި ދުވާލަކު 500 ޓަނުގެ ކުނި ޕްރޮސެސްކޮށް، އަށް މެގަވޮޓާއި، 8.5 މެގަވޮޓްގެ ކަރަންޓް އުފެއްދޭނެއެވެ. މި ފެސިލިޓީ އޮޕަރޭޓް ކުރުމުގައި ހިންގުމަށް ދާ ޚަރަދު ހޯދުމަށް ހަމަޖެހިފައިވަނީ މިފެސިލިޓީން އުފައްދާ ކަރަންޓާއި އަދި ކުނި އަންދައިގެން ލިބޭ އަޅި ބޮޓޮމް އޭޝް (އަޅި) ރިސައިކަލްކޮށް ވިއްކައިގެންނާއި އެހެނިހެން ގޮތްގޮތުން ލިބޭފައިސާ އިންކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ މި ފަށައިގަނެވުނީ ކުންޏަކީ އާމްދަނީ ލިބޭ ވަސީލަތަކަށް ހެދުމުގެ އަމާޒަށް ވާސިލުވުމަށް ކުރަންޖެހޭ މަސައްކަތް ކަމަށެވެ.

މީގެ އިތުރުން މިމަޝްރޫއުގެ ދަށުން ގާއިމްކުރާ ނިޒާމަކީ ވަށައިޖެހޭ އަދި ދެމެހެއްޓެނިވި ގޮތެއްގައި ކުރިއަށް ގެންދެވޭނެ ނިޒާމެއްކަން މިނިސްޓަރ ފާހަގަ ކުރެއްވިއެވެ. މިނިސްޓަރ ވިދާޅުވީ މި މަޝްރޫއުގެ ސަބަބުން ދިވެހިރާއްޖޭގެ ކަނޑުފަޅުގެ ރައްކާތެރިކަން ކަށަވަރު ކުރެވިގެންދާނެ ކަމަށެވެ. އަދި ދެމެހެއްޓެނިވި އުސޫލުން ރޭވިގެން ކުނި މެނޭޖް ކުރެވޭނެ ކަމަށެވެ.

މާލެ ސަރަހައްދުގެ ގެތަކުންނާއި, ސިއްހީ މަރުކަޒު ތަކުންނާއި, ރިސޯޓުތަކުން އަދި ފައިބަރު ދޯނީގެ ބޯޓު ޔާޑުތަކުންނާއި, އުޅަނދުތަކާއި, ކެމިކަލް އާއި, ބެޓަރީ އަދި އިމާރާތްތައް ތަޅާލުމުން އުފެދޭ ކުނިތައް 1991 ވަނަ އަހަރުން ފެށިގެން ޖަމާ ކުރަމުން އައީ ތިލަފުއްޓަށެވެ.