ކޮމަންޑޫ ދާއިރާގެ ބައި-އިލެކްޝަން ބޭއްވުމަށް ފަސް ދުވަހުގެ ތެރޭގައި އިއުލާންކުރާނެ
ގާނޫނު ބުނާގޮތުގެމަތިން 60 ދުވަސްތެރޭގައި ބައި-އިލެކްޝަން ބާއްވައި ނިންމާނެ
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު ހުސައިން ވަހީދު އަވަހާރަވުމާގުޅިގެން, އެދާއިރާގެ ބައި އިލެކްޝަން ބޭއްވުމަށް ފަސް ދުވަހުގެ ތެރޭގައި އިއުލާންކުރާނެކަމަށް އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގު ވިދާޅުވެއްޖެއެވެ.
ކޮމަންޑޫ ދާއިރާގެ ގޮނޑި ހުސްވުމާއެކު، އެދާއިރާގެ ބައި އިލެކްޝަންގެ ކަންކަން ކުރިޔަށްދާގޮތާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ފުއާދު ވިދާޅުވީ، މިހާރުވެސް އިދާރީ މަސައްކަތްތައް ފަށާފައިވާކަމަށެވެ. އަދި ގާނޫނު ބުނާގޮތުގެމަތިން 60 ދުވަސްތެރޭގައި ބައި-އިލެކްޝަން ބާއްވާ ނިންމާނެކަމަށް ފުއާދު ވިދާޅުވިއެވެ. އެގޮތުން އިންތިޚާބު އިއުލާންކޮށް ކެމްޕެއިން ކުރުމުގެ ފުރުސަތު ކެންޑިޑޭޓުންނަށް ހުޅުވާލާނެކަމަށް ފުއާދު ވިދާޅުވިއެވެ. މީގެއިތުރުން ބައި-އިލެކްޝަން ބޭއްވުމަށްޓަކައި ވޯޓުލާން ބޭނުންވާ ފަރާތްތަކަށް އެފުރުސަތު ހުޅުވާލާނެކަމަށް ފުއާދު ވިދާޅުވިއެވެ. އިންތިޚާބުގެ ވޯޓުލުން މާލެ އާއި ކޮމަންޑޫ ދާއިރާގެ ތިން ރަށުގައި އޮންނާނެކަމަށް ފުއާދު ވިދާޅުވިއެވެ.
މެމްބަރު ހުސައިން ވަހީދު އަވަހާރަވެފައިވަނީ ކެންސަރު ބައްޔަށް ފަރުވާ ހޯއްދަވަމުން ގެންދަވާތާ ވަނީ ގިނަ ދުވަސްތަކެއް ވެފައިވަނިކޮށެވެ. ހުސައިން ވަހީދު އަވަހާރަވީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ދަނިކޮށް، ހޯމަ ދުވަހުގެ މެންދަމު 1:25 އެހާއިރުއެވެ.
މެންބަރު ހުސައިން ވަހީދު ވަނީ ދުބާއީގައި ގިނަ ދުވަސްތަކެއް ވަންދެން ކެންސަރު ބައްޔަށް ފަރުވާ ހޯއްދަވާފައެވެ. އޭނާ ވަނީ 17 ވަނަ ރައްޔިތުންގެ މަޖިލީހުގެ މެމްބަރުކަންވެސް ކުރައްވާފައެވެ.
ހުސައިން ވަހީދަކީ ވިޔަފާރީގެ ރޮނގުންވެސް ފާހަގަ ކޮށްލެވޭ ބޭފުޅެކެވެ.
ހުސައިންގެ ޖަނާޒާ އޮތީ އަންގާރަ ދުވަހުގެ މެންދުރު ނަމާދުގެ ފަހުން އިސްލާމީ މަރުކަޒުގައި ކުރެވުނު ކަށުނަމާދަށްފަހު އާސަހަރާގައެވެ. މެންބަރުގެ ޖަނާޒާގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި ނާއިބުރައީސް ފައިސަލް ނަސީމާއި ސަރުކާރުގެ އިސްވެރިންގެ އިތުރުން ގިނަ ބަޔަކު ބައިވެރިވިއެވެ.
