ކޮމަންޑޫ ދާއިރާގެ މަޖިލިސް މެންބަރު ހުސައިން ވަހީދުގެ ޖަނާޒާ ބާއްވައިފިއެވެ.
ހުސައިންގެ ޖަނާޒާ އޮތީ މިއަދު މެންދުރު ނަމާދުގެ ފަހުން އިސްލާމީ މަރުކަޒުގައި ކުރެވުނު ކަށުނަމާދަށްފަހު އާސަހަރާގައެވެ. މެންބަރު ހުސައިންގެ ޖަނާޒާގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި ނާއިބުރައީސް ފައިސަލް ނަސީމާއި ސަރުކާރުގެ އިސްވެރިންގެ އިތުރުން ގިނަ ބަޔަކު ބައިވެރިވިއެވެ.
ހުސައިން ވަހީދު އަވަހާރަވީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ދަނިކޮށް ހޯމަ ދުވަހުގެ މެންދަމު 1:25 އެހާއިރުއެވެ.
މެންބަރު ހުސައިން ވަހީދު ވަނީ ދުބާއީގައި ވެސް ގިނަ ދުވަސްތަކެއް ވަންދެން ކެންސަރު ބައްޔަށް ފަރުވާ ހޯއްދަވާފައެވެ. އެއަށްފަހު މާލެ މަޑައިގެންނެވީ މިއަހަރުގެ މާޗް މަހުގެ ތެރޭގައެވެ. އެއަށްފަހުވެސް ކެންސަރު ބައްޔަށް ފަރުވާ ހޯއްދަވަމުން ގެންދެވިއެވެ.
