އަންގާރަ ދުވަހުގެ ހެނދުނު ރިކްޓަރ މިންގަނޑުން 7.4 މެގްނިޓިއުޑްގެ ބާރު މިނުގައި އިންޑޮނީޝިއާއަށް އައި ބިންހެލުމާއެކު ދިން ސުނާމީގެ އިންޒާރު ނަގައިފިއެވެ.

ބީބީސީގައި ބުނެފައިވަނީ ބިންހެލުން އައިސްފައިވަނީ އިންޑޮނީޝިއާގެ ގަޑިން ހެނދުނު 10:30 ގައި ކަމަށެވެ. އެ ގައުމުގެ އީސްޓް ނުސާ ޓެންގާރާ ސަރަހައްދުގެ ފްލޯރޭސް އައިލެންޑަށް އައި މި ބިންހެލުމުގެ ސަބަބުން އެއްވެސް މީހަކަށް އަނިޔާއެއް ނުވާކަމަށް ބީބީސީން ބުނެފައިވެއެވެ. ނަމަވެސް ބިންހެލުމުގެ އަސަރު ވަރަށް ބޮޑަށް އިހްސާސް ކުރެވުނު ކަމަށް އާންމުން ވަނީ ބުނެފައެވެ.

7.4 މެގްނެޓިއުޑްގެ ބާރުމިނުގައި އައި ބިންހެލުމާއި ގުޅިގެން ސުނާމީއެއް އަރާފާނެކަމުގެ އިންޒާރު ނެރުނެވެ. ނަމަވެސް ފަހުން އެ އިންޒާރުވަނީ ނަގާފައެވެ. ބިންހެލުމާއެކު ދައުރުވަމުންދާ ފޮޓޯތަކާއި ވީޑިއޯތަކުން ފެންނަ ގޮތުގައި ބިންހެލުމާއެކު މީހުން އިމާރާތްތަކުން ނުކުމެ ދުވާތަން ފެނެއެވެ. އަދި ހޮސްޕިޓަލްތަކުގައި ތިބި މީހުން ވެސް އިމާރާތުން ބޭރަށް ނުކުންނަތަނާއި، ބިންހެލުމެއް އަތުވެއްޖެކަމަށް އާންމުންގެ މީހަކު ގޮވަމުން ދިޔަ އަޑު ރެކޯޑް ކުރެވިފައިވެއެވެ.

ބިންހެލުމުގެ ސަބަބުން ބައެއް އިމާރާތްތަކަށް ކޮންމެވެސް ވަރެއްގެ ގެއްލުމެއް ވަނީ ލިބިފައެވެ. ސުނާމީގެ އިންޒާރު ނަގާފައިވީ ނަމަވެސް އާންމުން ތިބީ އަދިވެސް ބިރުވެރިކަމެއްގެ ތެރޭގައެވެ. ނަމަވެސް ހާލަތު އާންމު ހާލަތަކަށް ބަދަލުވަމުން އަންނަ ކަމަށް ބައިނަލްއަގުވާމީ މީޑިއާތަކުގައި ވަނީ ރިޕޯޓްކޮށްފައެވެ.

އިންޑޮނީޝިއާއަށް ބާރުގަދަ ބިންހެލުމެއް އައިސްފައި މިވަނީ އެގައުމުގެ ޖާވާ އައިލެންޑުގައި ހުންނަ ސެމެރޫ ނަމަކަށް ކިޔާ އަލިފާން ފަރުބަދަ ގޮވާ 48 މީހުން މަރުވިތާ 10 ވަރަކަށް ދުވަސް ފަހުންނެވެ.