ރިޔާސީ އިންތިޚާބުގައި ރައީސް ޔާމީން ބަލިވީ ވޯޓު ނުލިބުމުން، އިންތިޚާބު އޮޅުވާލައިގެން ނޫން - ޝަރީފް
އިދިކޮޅު ކޯލިޝަން މިހާރު ފެންނަނީ ގޮތް ހުސްވެފައިވާ ކަހަލަ ގޮތަކަށް
އަހުމަދު ޝަރީފް - އިލެކްޝަންސް ކޮމިޝަންގެ ކުރީގެ ރައީސް
އެންމެ ފަހުން ބޭއްވި ރިޔާސީ އިންތިޚާބުގައި ރައީސް ޔާމީން ބަލިވީ އިންތިޚާބު އޮޅުވާލައިގެން ނޫން ކަމަށާއި، އެމަނިކުފާނު އިންތިޚާބުގައި ބަލިވީ ވޯޓު ނުލިބުމުން ކަމަށް އިލެކްޝަންސް ކޮމިޝަންގެ ކުރީގެ ރައީސް އަހުމަދު ޝަރީފް ވިދާޅުވެއްޖެއެވެ.
އެންމެ ފަހުން 2018ވަނަ އަހަރު ބޭއްވި ރިޔާސީ އިންތިޚާބުގައި ވޯޓު އޮޅުވާލާފައިވާކަމަށް ބުނެ، އިދިކޮޅުން އަންނަނީ އަނެއްކާވެސް އިލެކްޝަންސް ކޮމިޝަންގެ ކުރީގެ ރައީސް ޝަރީފަށް ތުހުމަތުތައް ކުރަމުންނެވެ.
ޝަރީފް ވިދާޅުވީ ރިޔާސީ އިންތިޚާބު އޮޅުވާލުމަށް އެއްވެސް ކަމެއް ކޮށްފައި ނުވާނެ ކަމަށާއި، އެއްވެސް ނުފޫޒަކަށް ތަބާވެފައި ނުވާނެ ކަމަށެވެ. އިދިކޮޅުން ދައްކަނީ އެއްވެސް ހަގީގަތެއް އޮއްޓަރެއް ނެތް ވާހަކަތަކެއް ކަމަށެވެ. އަދި ވޯޓުގެ ނަތީޖާ ފާޅުކޮށްފައިވަނީ ރައްޔިތުން ވޯޓުލީ ގޮތަށް ކަމަށެވެ. ގާނޫނާއި ގަވައިދުގެ ބޭރުން އެެއްވެސް ކަމެއް ހިނގާފައި ނުވާނެ ކަމުގެ ޔަގީންކަން ޝަރީފު ދެއްވިއެވެ. ވޯޓުގެ ނަތީޖާއަކީ އީސީގެ ބާރު އޮންނަ އެއްޗެއް ނޫން ކަމަށާއި، ވޯޓުލާ މަރުކަޒުތަކުގައި ގުނާ ވޯޓުތަކަށްވެސް އީސީގެ ބާރެއް ނޯންނަކަމަށެވެ.
އެންމެ ފަހުން އޮތް ރިޔާސީ އިންތިޚާބަކީ ރެކޯޑް އަދަދަކަށް މީހުން ވޯޓުގުނާތަނަށް ދިޔަ އިންތިޚާބެއްކަން ފާހަގަކުރައްވަމުން ޝަރީފް ވިދާޅުވީ، އިދިކޮޅުން ދައްކަނީ އެއްވެސް އަސާސެއް ނެތް ވާހަަކަތަކެއްކަމަށެވެ.
އަނެއްކާވެސް ކުއްލިއަކަށް އިދިކޮޅުން ޝަރީފަށް އަމާޒުކޮށް ބަހުގެ ހަމަލާތައް ދޭންފެށީ އިދިކޮޅުގެ ކްރައުޑް ހިފަހައްޓަން ކަމަށް ޝަރީފް ވިދާޅުވިއެވެ. ޝަރީފް ވިދާޅުވީ، އިދިކޮޅު ކޯލިޝަން މިހާރު ފެންނަނީ ގޮތް ހުސްވެފައިވާ ކަހަލަ ގޮތަކަށް ކަމަށެވެ.
2018ވަނަ އަހަރުގައި އޮތް ރިޔާސީ އިންތިޚާބުގެ ރަސްމީ ނަތީޖާ ދައްކާގޮތުން ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީން އަބްދުލްގައްޔޫމަށް ލިބިވަޑައިގެންފައިވަނީ 96،052 ވޯޓެވެ. އަދި އެމްޑީޕީގެ ކެންޑިޑޭޓް އިބްރާހީމް މުހައްމަދު ސާލިހަށް ލިބިވަޑައިގެންފައިވަނީ 134،705 ވޯޓެވެ.
