މަސްވެރިކަމުގެ ދާއިރާގައި ކުރިއަށް އޮތީ އުންމީދީ ދުވަސްތަކެއް
11 ޑިސެމްބަރު 2021 | ހޮނިހިރު 18:23ރާއްޖޭގައި ޖުމްލަ 17 އައިސް ޕްލާންޓެއް މިހާރު އެބަހުރި
މިފްކޯގެ މެނޭޖިންގ ޑިރެކްޓަރ އިސްމާއީލް ފައުޒީ
ރާއްޖޭގެ މަސްވެރިކަމުގެ ދާއިރާގައި ކުރިއަށް އޮތީ އުންމީދީ ދުވަސްތަކެއް ކަމަށް މިފްކޯގެ މެނޭޖިންގ ޑިރެކްޓަރ އިސްމާއީލް ފައުޒީ ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަދައްކަމުން ފައުޒީ ވިދާޅުވީ، ރާއްޖޭގެ މަސްވެރިކަން ކުރިއެރުވުމަށް މިހާރުގެ ސަރުކާރުން ގިނަ މަސައްކަތްތަކެއް ކުރަމުން އަންނަ ކަމަށެވެ. އަދި ރާއްޖޭގެ މަސްވެރިކަމުގެ ދާއިރާގައި ކުރިއަށް އޮތީ ވަރަށް އުންމީދީ ދުވަސްތަކެއްކަން، މި ސަރުކާރުން ކުރަމުން އަންނަ މަސައްކަތާއި މަސްވެރިންގެ ދުވަހުގެ ރަސްމީ ޖަލްސާގައި ރައީސް އިބްރާހީމް މުހައްމަދު ސާލިހު ދެއްކެވި ވާހަކަތަކުން އެނގޭކަމަށެވެ.
ފައުޒީ ވިދާޅުވީ ކުރިއަށް އޮތް ތަނުގައި ރާއްޖޭގެ އެކި ސަރަހައްދުތަކުގައި ޖުމްލަ 13ށްވުރެ ގިނަ އައިސްޕްލާންޓް އެޅުމަށް ހަމަޖެހިފައިވާ ކަމަށެވެ. މީގެ ސަބަބުން މަސްވެރިންނަށް އައިސް ހޯދުމުގައި ދިމާވާ ދަތިތަކަށް ވަރަށް ބޮޑުތަން ފަސޭހަ ވެގެންދާނެ ކަމަށެވެ.
ރާއްޖޭގައި ބާނާ މަހުގެ އަދަދު ގިނަވަމުން އަންނައިރު، ރަނގަޅަށް މަސްތައް ނުބެލެހެއްޓިއްޖެ ނަމަ މަހުގެ ކޮލިޓީ ދަށްވުމަކީ އެކަށީގެންވާ ކަމެއްކަން ފާހަގަ ކުރައްވައި ފައުޒީ ވިދާޅުވީ، ގިނަ އައިސް ޕްލާންޓްތަކަކާއެކު މި މައްސަލައަށް ރަނގަޅު ހައްލެއް ލިބިގެންދާނެ ކަމަށެވެ. އަދި މި މަސައްކަތުގައި މިފްކޯގެ ފަރާތުން ފުރިހަމަ އެއްބާރުލުން ލިބޭނެކަން ފައުޒީ ފާހަގަކުރެެއްވިއެވެ.
މަސްވެރިންގެ ދުވަހު ރާއްޖޭގެ ހަތަރު ރަށެއްގައި އައިސް ޕްލާންޓް ވަނީ ހުޅުވާފައެވެ. އެގޮތުން އައިސް ޕްލާންޓް ހުޅުވާފައި ވަނީ ހއ.ހޯރަފުށި، ކ.ގާފަރު، ރ. މަޑުއްވަރި އަދި ފެލިވަރުގައެވެ. މިއާއެކު ރާއްޖޭގައި ޖުމްލަ 17 އައިސް ޕްލާންޓެއް މިހާރު އެބަހުއްޓެވެ. އެހެންކަމުން ޖުމްލަ ކެޕޭސިޓީގެ އަދަދު ވަނީ 835 ޓަނަށް އަރާފައެވެ.
ރާއްޖޭގެ މަސްވެރިކަން ކުރިއެރުވުމަށްޓަކައި ސަރުކާރުން ވަނީ 50 ދޯންޏެއްގައި އާރްއެސްޑަބްލިއު ގާއިމު ކޮށްދިނުމަށް ނިންމާފައެވެ. ފައުޒީ ވިދާޅުވީ މީގެ ސަބަބުން ރާއްޖޭގެ މަސްވެރިކަމުގެ ސިނާއަތު ކުރިއެރުމަށް ވަރަށް ބޮޑަށް ފަސޭހަ ވެގެންދާނެ ކަމަށެވެ.
