މި ސީޒަނަށްފަހު ހާލަންޑް ޑޯޓްމުންޑް ދޫކޮށްލާނެ: އޭޖެންޓް

މި ސީޒަން ނިމުމުން ނޯވޭގެ ޒުވާން ތަރި އާލިއަން ބްރައުޓް ހާލަންޑް ބޮރޫޝިއާ ޑޯޓުމުންޑް ދޫކޮށްލާނެ ކަމަށް އޭނާގެ އޭޖެންޓް މިނޯ ރައިއޯލާ ބުނެފިއެވެ.

މިދިޔަ އަހަރުގެ ޖެނުއަރީ މަހު އާރްބީ ސާލްޒްބާގް ދޫކޮށް، އުމުރުން 21 އަހަރުގެ ހާލަންޑް ޑޯޓްމުންޑަށް ބަދަލުވީ ހަތަރު އަހަރާ ބައިގެ އެއްބަސްވުމެއްގެ ދަށުން، 20 މިލިޔަން ޔޫރޯއަށެވެ. އެހެންކަމުން ހާލަންޑުގެ އެއްބަސްވުން ހަމަވާނީ 2024 ވަނަ އަހަރުގެ ޖޫން މަހުއެވެ.

ދާދި ފަހުން ދިން އިންޓަވިއުއެއްގައި ރައިއޯލާ ވަނީ މި ސީޒަނަށްފަހު ހާލަންޑް ބަދަލުވެދާނެ ހަތަރު ކުލަބެއްގެ ނަން ހާމަކޮށްފައެެވެ. އެ ކުލަބުތަކަކީ ބަޔާން މިއުނިކް، ރެއާލް މެޑްރިޑް، ބާސެލޯނާ އަދި މެންޗެސްޓާ ސިޓީއެވެ. ރައިއޯލާ ބުނީ މި ސީޒަން ނިމުމުން ހާލަންޑް މިހާރު ހުރި ކުލަބު ކަމަށްވާ ޑޯޓްމަންޑް ދޫކޮށްލާނެ ކަމަށެވެ. އަދި އެއަށްފަހު ހާލަންޑް ބަދަލުވާނީ އެ ހަތަރު ކުލަބުގެ ތެރެއިން ކުލަބަކަށް ކަމަށްވެސް ވަނީ ބުނެފައެވެ.

ރައިއޯލާ ހާމަކުރި ލިސްޓުގައި ރެއާލާއި ބާސާ ހިމެނޭއިރު، މިދިޔަ އަހަރު ހާލަންޑުގެ އޭޖެންޓާއި އޭނާގެ ބައްޕަ ވަނީ ސްޕެއިނަށް ދަތުރެއް ކޮށްފައެވެ. އެ ދަތުރުގައި ބާސާގެ ރައީސް ޖޮއާން ލަޕޯޓާ އާއި ރެއާލުގެ ރައީސް ފްލޮރެންޓީނޯ ޕެރޭޒާއެކު އެ ދެ މީހުން ބައްދަލުކޮށް، ހާލަންޑުގެ ޓްރާންސްފާއާ ގުޅޭ ގޮތުން މަޝްވަރާކޮށްފައިވާ ކަމަށް ރިޕޯޓުތައް ބުނެއެވެ.

އެކަމަކު ރައިއޯލާ ހާމަކުރި ލިސްޓުގައި ނުހިމެނޭ ޗެލްސީންވެސް ހާލަންޑް ހޯދުމަށް މަސައްކަތްކުރަމުން އަންނަ ކަމަށް ރިޕޯޓުތައް ބުނެއެވެ. އެގޮތުން ލަންޑް ގަތުމަށް ޗެލްސީން މަސައްކަތްކުރަމުން އަންނަ ކަމަށް އެ ޓީމުގެ ކޯޗު ތޯމަސް ޓުޗެލް ދާދި ފަހުން ވަނީ އެއްބަސްވެފައެވެ. ޓުޗެލް ބުނީ ކުރިއަށް އޮތް ޓްރާންސްފާ ބާޒާރުގައި ހާލަންޑުގެ ސޮއި ހޯދުން އެއީ ޗެލްސީގެ އަމާޒެއް ކަމަށާއި، އެގޮތުން ހާލަންޑް ގަތުމަށް ޑޯޓުމުންޑާ ވާހަކަ ދައްކަމުން އަންނަ ކަމަށެވެ. އަދި ހާލަންޑަކީ ޗެލްސީގެ ގޭމް ޕްލޭނަށް ފައްކާވެފައިވާ ކުޅުންތެރިއެއް ކަމަށާއި، އެހެންކަމުން ޔުއެފާ ޗެމްޕިއަންސް ލީގު ދިފާއުކުރަން ހާލަންޑަކީ ޗެލްސީއަށް މުހިންމު ކުޅުންތެރިއަކަށްވާނެ ކަމަށްވެސް ވަނީ ބުނެފައެވެ.

ހާލަންޑް ގަތުމަށް ޔޫރަޕުގެ ބޮޑެތި ކުލަބުތަކުން މަސައްކަތްކުރި ނަމަވެސް، ހާލަންޑް ވިއްކާނަމަ އޭނާ ވިއްކަން ޑޯޓްމުންޑުން ކަނޑައަޅާފައިވާ އަގަކީ 180 މިލިޔަން ޔޫރޯ ކަމަށް ރިޕޯޓުތައް ބުނެއެވެ.

ޑޯޓްމުންޑާއެކު ތަފާތު މޮޅު ކުޅުމެއް ހާލަންޑް ދައްކަމުން އަންނައިރު، އޭނާ ވަނީ މިހާތަނަށް ޑޯޓްމުންޑަށް ކުޅެދިން 72 މެޗުގައި 74 ލަނޑު ޖަހާފައެވެ. އަދި މިދިޔަ ސީޒަނުގެ ޖަރުމަން ކަޕް ހާލަންޑް ކާމިޔާބުކުރިއިރު، އޭނާ ވަނީ މިދިޔަ އަހަރު ހޮވި ޔޫރަޕިއަން ގޯލްޑަން ބޯއި އެވޯޑުވެސް ހޯދާފައެވެ.