އޮބަމަޔަންގގެ އަގު 50 މިލިއަން ޕައުންޑަށްވުރެ ބޮޑުވާނެ: ޑޯޓްމުންޑް
22 ޖެނުއަރީ 2018 | ހޯމަ 04:05އޮބަމަޔަންގގެ ޓްރާންސްފަރ އާ ގުޅޭ ރަސްމީ ވާހަކަތައް ފެށުމަށް ތައްޔާރުވެފައިވާ ކަމަށް މީޑީއާ ރިޕޯޓްތައް ބުނޭ
ޑޯޓްމުންޑަށް ކުޅޭ ގެބޯންގެ ފޯވާޑް ޕިއޭ އެމެރިކް އޮބަމަޔަންގ: އޭނާ ހޯދުމަށް އާސެނަލް އިން ދަނީ މަސައްކަތް ކުރަމުން
ޕިއޭ އެމެރިކް އޮބަމަޔަންގގެ ސޮއި ހޯދުމަށް އާސެނަލް އިން 50 މިލިއަން ޕައުންޑަށްވުރެ ބޮޑު އަގެއް ދައްކަން ޖެހޭނެ ކަމަށް އޭނާ ކުޅޭ ޖަރުމަނުގެ ބޮރޫޝިއާ ޑޯޓްމުންޑް އިން ބުނެފި އެވެ.
ޑޯޓްމުންޑަށް ކުޅޭ ގެބޯންގެ ބައިނަލްއަޤްވާމީ ފޯވާޑް ގެންދިއުމަށް އާސެނަލް އިން ޝައުގުވެރިވާ ކަމަށް ރިޕޯޓްތައް ބުނެއެވެ.
އާސެނަލްގެ ކޯޗު އާސެން ވެންގާ ވެސް ވަނީ އޮބަމަޔަންގ އާސެނަލް އަށް ފިޓުވާނު ވާނެ ކަމަށް ބުނެފައެވެ.
ވެންގާގެ މި ވާހަކަތަކާއެކު ޑޯޓްމުންޑްގެ ސްޕޯޓިންގ ޑިރެކްޓަރ މައިކަލް ޒޯކް ވަނީ، އެކްލަބުގެ ކުޅުންތެރިޔަކާއި ބެހޭ ގޮތުން އާއްމުކޮށް ވާހަކަ ދެއްކުމަކީ އިހްތިރާމް ކުޑަ ކުރުމުގެ އަމަލެއް ކަމަށް ބުނެ ވެންގާ އަށް ހުކުރު ދުވަހު ފާޑޫ ކިޔާފައެވެ.
އެހެންނަމަވެސް އޮބަމަޔަންގގެ ޓްރާންސްފަރ އާ ގުޅޭ ގޮތުން ދެ ކްލަބުން މިހާރު ރަސްމީ ވާހަކަތައް ފެށުމަށް ތައްޔާރުވެފައިވާ ކަމަށް މީޑީއާ ރިޕޯޓްތައް ބުނެއެވެ.
އޮބަމަޔަންގގެ ޓްރާންސްފަރގެ ކަންކަމުގައި ޑޯޓްމުންޑާއެކު ވާހަކަތައް ބޭއްވުމަށް އާސެނަލްގެ ޗީފް އެގްޒެކެޓިވް އިވާން ގަޒިޑިސް ވަނީ ޖަރުމަނަށް ގޮސްފައެވެ.
ޑޯޓްމުންޑްގެ ޗީފް އެގްޒެކެޓިވް އޮފިސަރ ހާންސް ޔޯޚިމް ވަޓްޒްކޭ އާ ހަވާލާދީ ޖަރުމަނުގެ ނޫހަކުން ވަނީ، ކުޅުންތެރިޔާގެ ޓްރާންސްފަރގެ ކަންތައްތަކާއި ގުޅޭ ގޮތުން އާސެނަލްގެ ފުރަތަމަ ހުށަހެޅުން އެކްލަބަށް ލިބިފައިވާކަން ހާމަކޮށްފައެވެ. އެހެންނަމަވެސް އޮބަމަޔަންގ އަށް އާސެނަލް އިން ހުށަހެޅި އަގު ވަޓްޒްކޭ ހާމަކޮށްފައެއްނުވެއެވެ.
ރިޕޯޓްތައް ބުނާ ގޮތުން އޮބަމަޔަންގ އަށް އާސެނަލް އިން ހުށަހަޅާފައި ވަނީ 50 މިލިއަން ޔޫރޯ އެވެ. އެހެންނަމަވެސް ޑޯޓްމުންޑްގެ އޮފިޝަލުން އެ އަގަށް ހިތްހަމަނުޖެހޭ ކަމަށާއި، އޭނާގެ ޓްރާންސްފަރ ފީ އަށް 60 މިލިއަނާއި 70 މިލިއަން ޔޫރޯ އާ ދެމެދުގެ އަގަކަށް ޑޯޓްމުންޑް އިން ޑިމާންޑް ކުރާ ކަމަށް ރިޕޯޓްތައް ބުނެއެވެ.
އޮބަމަޔަންގ އަށް ޑޯޓްމުންޑް އިން ހުށަހަޅި އަގަށް އާސެނަލް އިން އެއްބަސްވެއްޖެނަމަ، އޭނާ ވެގެންދާނީ އާސެނަލްގެ އެންމެ އަގު ބޮޑު ޓްރާންސްފަރ އަށެވެ. މީގެ ކުރިން އާސެނަލްގެ ރެކޯޑް ޓްރާންސްފަރ އަކީ މިދިޔަ ހޫނު މޫސުމުގައި ފްރާންސްގެ ލިޔޯން އިން 46.5 މިލިއަން ޕައުންޑުގެ އަގަކަށް އެކްލަބާއި ގުޅުނު ފްރާންސްގެ ފޯވާޑް އެލެގްޒެންޑަރ ލަކަޒެޓް އެވެ.
ޑޯޓްމުންޑްގައި މޮޅު ކުޅުމެއް ދައްކަމުން އައި ފޯވާޑާއި ކްލަބާއި ދެމެދު މިސީޒަނުގައި މައްސަލަތަކެއް ކުރިމަތިވެފައިވެއެވެ. މިސީޒަނުގައި އަޚުލާގީ މައްސަލަތަކާއި ގުޅިގެން ދެ ފަހަރެއްގެ މަތިން ޑޯޓްމުންޑްގެ ސްކޮޑުން އޭނާ ބާކީކޮށްފައިވާއިރު، ހުކުރު ދުވަހު ހާތާ ބާލިން އާ ދެކޮޅަށް ކުޅެ 1-1 ން އެއްވަރުވި މެޗަށް ނެގި ސްކޮޑުގައިވެސް އޭނާ ހިމަނާފައެއްނުވެއެވެ.
މިސީޒަނުގައި އޮބަމަޔަންގ ކުޅުނު 23 މެޗުގައި ޑޯޓްމުންޑަށް 21 ލަނޑު ޖަހައިދީފައިވެއެވެ.
ބައެއް ރިޕޯޓްތައް ބުނާ ގޮތުން އޮބަމަޔަންގ މިހާރު ވަނީ އޭނާގެ އަމިއްލަ ކަންކަމުގައި އާސެނަލް އާއެކު އެއްބަސްވުމަކަށް އައިސްފައެވެ.
