މެންޗެސްޓާ ސިޓީއަށް ކުޅެމުން އަންނަ އާޖެންޓީނާގެ އިތުބާރު ފޯވާޑް ސާޖިއޯ އަގުއޭރޯ އެ ޓީމު ދޫކޮށްލާނެކަމުގެ އިޝާރާތެއް ދީފިއެވެ.

މިދިޔަ އަހަރުގެ ފެބްރުއަރީ މަހުން ފެށިގެން އަގުއޭރޯ އަންނަނީ ސިޓީ ދޫކޮށްލާނެކަމުގެ އެކި ސިގްނަލްތައް ދެމުންނެވެ. އެގޮތުން ސިޓީގެ ކޯޗުގެ ގޮތުގައި ޕެޕް ގާޑިއޯލާ ހަވާލުވުމަށްފަހު އެނާއަށް ޓީމުގައި ލިބެންޖެހޭ ހައްގު މަގާމު ނުލިބޭ ކަމަށް ބުނެ އޭނާ ހިތްހަމަނުޖެހުން ފާޅުކޮށްފައިވާ ކަމަށް މީޑިއާތަކުން ބުނެއެވެ. ގާޑިއޯލާ ވަނީ މިފަދަ އިޝާރާތެއް މީގެކުރިން ވެސް ކޮށްފައެވެ. އޭނާ ބުނެފައިވަނީ ކުޅުންތެރިންނާއި ކޯޗާއި ދެމެދު އޮންނަ ގުޅުމަކީ ވަރަށް މުހިންމު ގުޅުމެއް ކަމަށެވެ.

މިއީ މިދިޔަ ސީޒަނުގައި ވެސް އަގުއެރޯ ޖެއްސި 'ސްޓަންޓް' ތަކުރާރުކުރުން ކަމަށް މީޑިއާތަކުން ބުނެފައިވެއެވެ. އޭނާ އެ ކްލަބް ދޫކޮށްލާނެ ކަމުގެ އިޝާރާތެއް ދިނުމާއެކު މިދިޔަ ސީޒަނުގައި ސިޓީގެ ޗެއާމަން ޚަލްދޫން އަލް މުބާރަކް ވަނީ އޭނާ އެ ޓީމުގެ މަޑުކުރުވުމަށް ގިނަ މަސައްކަތްތަކެއް ކޮށްފައެވެ. އޭނާ ވަނީ އަގުއޭރޯއާ ވަކިން ބައްދަލުކޮށް އޭނާ ޓީމުގައި މަޑުކުރުމަށް އެދިފައެވެ.

އަންގާރަ ދުވަހު އަމިއްލަ ދަނޑުގައި ވޮޓްފޯޑް އަތުން 3-1 ގެ ނަތީޖާއަކުން ސިޓީ މޮޅުވި މެޗަށްފަހު ވާހަކަދައްކަމުން އަގުއޭރޯ ބުނީ އެނާ ސިޓީގައި މަޑުކުރެވޭނީ 2020 ވަނަ އަހަރާ ހަމަޔަށް ކަމަށާއި އެ އަހަރު އޭނާގެ ކޮންޓްރެކްޓް ހަމަވާނެ ކަމަށެވެ. އޭނާ ބުނީ އުއްމީދަކީ ކޮންޓްރެކްޓް ހަމަވަންދެން ސިޓީގެ ކުޅުންތެރިޔެއްގެ ގޮތުގައި ދެމިހުރުން ކަމަށާއި މި ސީޒަން ނިމެންދެން ޓީމުގައި ރަނގަޅު ކުޅުމެއް ދެއްކުމަށް މަސައްކަތް ކުރާނެ ކަމަށެވެ. ހަމައެހެންމެ އެޔަށްފަހު ޓީމުގައި މަޑުކުރުމާމެދު ގޮތެއް ނިންމާނެ ކަމަށް އަގުއޭރޯ ހާމަކުރިއެވެ.

އެހެން ނަމަވެސް އޭނާ ބުނީ ޕްލޭނަކީ ކްލަބް ބަދަލުކުރުން ނޫން ކަމަށާއި އޭނާ ސިޓީގައި މިވަގުތު ހުރީ ވަރަށް ހިތްހަމަޖެހިގެން ކަމަށެވެ. އޭނާ ބުނީ ކްލަބުގައި މަޑުކުރުމާމެދު އެންމެ ފަހުގެ ނިންމުން ނިންމާނީ ކްލަބުގެ މެނޭޖްމަންޓުން ކަމަށާއި ކްލަބުގެ މެނޭޖްމަންޓުގެ ނިންމުންތަކަށް ފުރިހަމައަށް އިހުތިރާމު ކުރާނެ ކަމަށެވެ. އަދި ގާޑިއޯލާއާ އޭނާއާ ދެމެދު އޮތީ ރަނގަޅު ގުޅުމެއް ކަމަށްވެސް އޭނާ ބުނެފައިވެއެވެ.

އަގުއޭރޯ މިގޮތަށް ވާހަކަ ދައްކާފައިވާއިރު ގާޑިއޯލާގެ އިރުޝާދުގެ ދަށުން ސިޓީ މިހާތަނަށް ކުޅުނު މެޗުތަކުގައި 49 ލަނޑާއެކު އެ ޓީމަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔަކީ އަގުއޭރޯއެވެ. އަދި އެ ޓީމުގެ ކުރިޔަށް ކުޅެން ގެނައި ބްރެޒިލްގެ ގެބްރިއެލް ޖީސަސްއަށް އަނިޔާވުމާއި ގުޅިގެން އަގުއޭރޯއަށް ވަނީ އަނެއްކާވެސް ފުރަތަމަ އެގާރައިން ޖާގައެއް ގެރެންޓީ ވެފައެވެ.

ސިޓީގެ ތާރީހުގައި ވެސް އެންމެ ގިނަ ލަނޑު ޖަހާފައިވާ އަގުއޭރޯ ވަނީ އެ ޓީމަށް ކުޅުނު 276 މެޗުގައި 185 ލަނޑު ޖަހައިދީފައެވެ. އޭނާ ވަނީ އެ ޓީމާއެކު ދެ ފަހަރެއްގެ މަތިން އިނގިރޭސި ޕްރިމިއާ ލީގު ކާމިޔާބުކޮށް ދެ ފަހަރެއްގެ މަތިން އިނގިރޭސި ލީގު ކަޕް ވެސް ކާމިޔާބުކޮށްފައެވެ. އަދި އޭނާ ވަނީ ދެފަހަރެއްގެ މަތިން ސިޓީއިން ހޮވާ އަހަރުގެ އެންމެ މޮޅު ކުޅުންތެރިޔާގެ މަގާމު ހޯދާފައެވެ.