ރައީސް ވިދާޅުވީ ރާއްޖޭގެ މިނިވަންކަމާއި ސިޔާދަތާއި އިސްތިގުލާލަކީ މަސްދޯނި ފަހަރަށް ވުރެ ޑްރަގް ބޯޓް ފަހަރު ގިނަވާން ދޫކޮށްލުމެއް ނޫންކަމަށް
10 ޑިސެމްބަރު 2021 | ހުކުރު 17:24ނުރައްކާތެރި އުދަބާނި، ރާއްޖޭގެ ހުރަހަށާއި ދިގަށް އެބަ ހިނގާ
ރާއްޖޭގެ ކަނޑުގެ ސަރަހައްދު ބޭނުންކޮށްގެން ބޮޑެތި ކުށްތައް ކުރުމަށް ޖާގަ ދެވެން ނެތް ކަމަށް ރައީސް ވިދާޅުވި
ރާއްޖޭގެ މިނިވަންކަމާ ސިޔާދަތާ އިސްތިގުލާލަކީ މަސްދޯނި ފަހަރަށްވުރެ ޑްރަގްބޯޓް ފަހަރު ގިނަވާން ދޫކޮށްލުމެއް ނޫންކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް ވިދާޅުވީ, ރާއްޖޭގެ ކަނޑުގެ ސަރަހައްދު ބެލެހެއްޓުމަކީ ބޮޑެތި ކުށްކުރާ މީހުން ރުހޭނެ ކަމެއް ނޫން ކަމަށެވެ. މަސްވެރިންގެ ދުވަހުގެ ޚާއްސަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ, ދިވެހި ރާއްޖެއަކީ, އިންޑިއާ ކަނޑުގައި އޮތް ކަނޑުގެ ސަރަހައްދު ބޮޑު ޖަޒީރާ ގައުމެއް ކަމަށާއި, ބަދަލުވަމުންދާ ދުނިޔޭގެ އޮއިވަރާ، ކާރޫބާރޫގެ ތެރޭން އުފެދެމުންދާ ނުރައްކާތެރި އުދަބާނި، ރާއްޖޭގެ ހުރަހަށާ ދިގަށް އެބަ ހިނގާ ކަމަށެވެ. ބައިނަލްއަގްވާމީ ބޮޑެތި ޑްރަގް ނެޓްވޯރކް ތަކުން، އަބަދާ އަބަދު ހަރަކާތް ތެރިވާ ކަމަށާއި, ޓެރަރިޒަމާއި އެހެނިހެން ވަގު ވިޔަފާރިއާ، ހަތިޔާރުގެ ޣައިރު ގާނޫނީ މުޢާމަލާތަށް މިބިޔަ ކަނޑުގައި ޖާގަ އޮންނަ ކަމަށް ރައީސް ވިދާޅުވިއެވެ.
ރައީސް ވިދާޅުވީ, ރާއްޖޭގެ ކަނޑުގެ ސަރަޙައްދު ބެލެހެއްޓުމުގައި، އަވަށްޓެރި ގައުމުތަކާ ގުޅުން ބަދަހި ކުރުމަކީ މިފަދަ ކުށްތައް ކުރާ މީހުން ރުހޭނެ ކަމެއް ނޫން ކަމަށެވެ. ދިވެހިރާއްޖޭގެ ސަރަހައްދު، އެއްގަމާ ކަނޑާ ވައިގެ މަގުން ބެލެހެއްޓޭނެ ވަރުގެ މަދަދެއް ރާއްޖެއަށް ލިބުމަކީ ކުށްވެރިންނަށް ކެތްވާވަރުގެ ކަމެއް ނޫން ކަމަށް ރައީސް ވިދާޅުވިއެވެ. ދިވެހި ދައުލަތުގެ ދަށުގައިވާ އެއްގަމާ ކަނޑާ ވައިގެ ސަރަހައްދު އެފަދަ ނޭދެވޭ ބޭނުންތަކަށް ދުލެއް ނުކުރެވޭނެ ކަމަށް ރައީސް ވިދާޅުވިއެވެ.
ރާއްޖޭގެ ކަނޑުގެ ސަރަހައްދުގައި ޑްރަގްބޯޓް ފަހަރު ގިނަވާން ސަރުކާރުން ދޫކޮށް ނުލާނެ ކަމަށާއި ޖާގަވެސް ނުދެއްވާނެ ކަމަށް ރައީސް ވިދާޅުވިއެވެ.
