1 ފެބްރުއަރީގެ އަމުރަކީ ޖުޑީޝަރީގެ ޝާހީ ބަޣާވާތެއް: ޔާމީނު
10 ޑިސެމްބަރު 2021 | ހުކުރު 18:03އޭރު 3 ސިޓީ އިންޑިއާގެ ޚާރިޖިއްޔާއިން ރާއްޖެއަށް ފޮނުވި ކަމަށް ވިދާޅުވި
ހުކުރު ދުވަހުގެރޭ އިދިކޮޅުން ބޭއްވި ކޮތަރުކޮށި ޖަލްސާގައި ރައީސް ޔާމީނު ވާހަކަ ދައްކަވަނީ
1 ފެބްރުއަރީގެ އަމުރު ނެރުމަކީ ޖުޑިޝަރީގެ ތެރެއިން ހިންގި ޝާހީ ބަޣާވާތެއްކަމަށް ކުރީގެ ރައީސް ޔާމީނު އަބްދުލްގައްޔޫމު ވިދާޅުވެއްޖެއެވެ.
ހުކުރު ދުވަހުގެ ރޭ އިދިކޮޅުން ބޭއްވި ކޮތަރުކޮށި ޖަލްސާގައި ވާހަކަ ދައްކަވަމުން ރައީސް ޔާމީނު ވިދާޅުވީ، އޭރު 3 ސިޓީ އިންޑިއާގެ ޚާރިޖިއްޔާއިން ރާއްޖެއަށް ފޮނުވި ކަމަށެވެ. އެގޮތުން 1 ފެބްރުއަރީގެ ޙުކުމް ތަންފީޒު ކުރުން ފަސްކުރާ ސަބަބެއް ނުވިސްނޭކަމަށް ބުނެ އިންޑިއާއިން އެ ކަންބޮޑުވުން ފާޅުކުރިކަމަށް ޔާމީނު ވިދާޅުވިއެވެ. އެއީ ރާއްޖޭގެ ދާޚިލީ ކަންކަމަށް ވަނުން ކަމަށް ވިދާޅުވިއެވެ.
ޔާމީނު ވިދާޅުވީ، ސުޕްރީމްކޯޓުގެ ޓިނު ނަގަން ޖެހުނީ އޭރު ކުއްލި ނުރައްކަލުގެ ޙާލަތުން މެނުވީ ޤާނޫނުތައް ސަސްޕެންޑު ނުކުރެވޭނެތީ ކަމަށެވެ. އެގޮތުން އޭރު ފަނޑިޔާރު އަބްދުﷲ ސައީދާއި އަލީ ޙަމީދުގެ ކޮރަޕްޝަން މައްސަލަތަކެއް ފެންމަތިވެގެން ދިޔަކަން ފާހަގަ ކުރައްވައި ރައީސް ޔާމީނު ވިދާޅުވީ، އެބޭފުޅުންނަށް އޭރު ފައިސާ ލިބިފައިވަނީ ކިހިނެއްކަންވެސް ސާފު ކުރެއްވި ކަމަށެވެ. އަދި ކޮރަޕްޝަން މައްސަލަތައް ބެލުން ލާޒިމުވެގެން ދިޔަ ކަމަށާއި، އޭރު މަނީ ލޯންޑަރިން ޤާނޫނެއް އޮތްނަމަ، އެ ޙާލަތު ރަނގަޅަށް ފެތޭނެކަމަށް ރައީސް ޔާމީނު ވިދާޅުވިއެވެ.
ސުޕްރީމްކޯޓުގެ ބެންޗުން ފާސްކޮށްގެން މެނުވީ އެއްވެސް ފަނޑިޔާރަކު ތަހުގީގީ އިދާރާއަކަށް ހާޒިރު ނުކުރެވޭނެކަމަށް އޭރު ފާސްކުރިކަން ފާހަގަ ކުރައްވައި ޔާމީނު ވިދާޅުވީ، އެއީ ސީދާ ޖޭއެސްސީގެ މަސައްކަތްތަކަށް ހުރަސްއެޅުން ކަމަށެވެ. ވީއިރު މި ކަންކަން ބެލުން އޭރު ލާޒިމުވެގެން ދިޔަ ކަމަށާއި، އެ މާއްދާ އުވާލުމަށްޓަކައި ކުއްލި ނުރައްކަލުގެ ޙާލަތު އިއުލާނު ކުރުމަށް މަޖުބޫރުވީކަމަށް ރައީސް ޔާމީނު ވިދާޅުވިއެވެ.
01 ފެބްރުއަރީގެ ކޯޓު އަމުރަކީ ކަނޑައެޅިގެން ޤާނޫނީ ގޮތުން އުފެދިފައި އޮތް ސަރުކާރެއް ވައްޓާލާ، ރައީސް ޔާމީންގެ ވެރިކަން ނިމުމަކަށް ގެނައުމަށް ބަޔަކު ރާވައިގެން ކުރަން އުޅުނު ބަޣާވާތެއްކަމަށް އިދިކޮޅު ކޯލިޝަންގެ ބޭފުޅުން މިހާރު ވިދާޅުވެއެވެ.
ޖަލްސާގައި އިތުރަށް ވާހަކަ ދައްކަވަމުން ރައީސް ޔާމީނު ވިދާޅުވީ، އިންޑިއާއާ ދެކޮޅަށް ޕީޕީއެމްއިން އަޑުފުލާތީ އެ ޤައުމުން ކަންބޮޑުވާ ކަމަށެވެ. އެގޮތުން އެއްވެސް ބަޔަކަށް ލިބޭ މެހެމާންދާރީ ހިސާބަށްވުރެ އިތުރުވެގެން ނުވާނެކަމަށް ޔާމީނު ވިދާޅުވިއެވެ. ޔާމީނު ވަނީ އިންޑިއާއަށްވެސް މެސެޖެއް ދެއްވާފައެވެ. އެގޮތުން އިންޑިއާގެ އިސްތިއުމާރީ ބާރުގެ ސަބަބުން ރާއްޖެއަށް މަލިކުވެސް ގެއްލިގެން ދިޔަކަން ފާހަގަ ކުރައްވައި ރައީސް ޔާމީނު ވިދާޅުވީ، އިންޑިއާގެ އަސްކަރިއްޔާއިން ޖެހޭނީ ރާއްޖެ ދޫކޮށް ދާން ކަމަށެވެ. އަދި ޤައުމު ދިފާއު ކުރުމަށް ކުރަންޖެހޭ ކޮންމެ ކަމެއް ކުރަންޖެހޭކަން ފާހަގަ ކުރައްވައި ރައީސް ޔާމީނު ވިދާޅުވީ، މިހާރު ރާއްޖޭގައި އޮތީ "ހިންދޫ-ވަތަނީ" ސަރުކާރެއް ކަމަށެވެ.
ރައީސް ޔާމީނު ވިދާޅުވީ ނެއިބަރހުޑް ފަރސްޓް ޕޮލިސީގެ ޙަޤީޤީ މާނައަށް ވިސްނާލަން ޖެހޭ ކަމަށެވެ. އަދި އިންޑިއާއިން ރާއްޖޭގެ ދާޚިލީ ކަންކަމާ ބެހޭކަމަށްވެސް ރައީސް ޔާމީނު ވިދާޅުވިއެވެ.
މި ޖަލްސާގައި ވާހަކަ ދައްކަވަމުން މަހިބަދޫ ދާއިރާގެ މެމްބަރު އަހުމަދު ތޯރިޤު ވިދާޅުވީ، އިންޑިއާއިން ރާއްޖެއަށް ނުފޫޒު ފޯރުވާ ކަމަށާއި، ރާއްޖެ އިސްތިއުމާރު ކުރަމުންދާ ކަމަށެވެ. އަދި ޔާމީނު މިނިވަންވުމާއެކު، މި ސަރުކާރު ނިމުމަކަށް އައިސްފައިވާކަން އިންޑިއާއަށްވެސް އެނގޭނެ ކަމަށް ތޯރިޤު ވިދާޅުވިއެވެ.
ފަނޑިޔާރުގެ އިސްލާޙު ކުރުމަށް މި ސަރުކާރުން ކުރަމުންދާ މަސައްކަތްތަކަށް ފާޑު ވިދާޅުވަމުން ތޯރިޤު ވަނީ ޖޭއެސްސީގެ ކޮމްޕޮޒިޝަން އެކުލަވާލާފައިވާ ގޮތާއި ގުޅިގެން އެޖެންޑާ 19 ގައި ބަޔާންކޮށްފައިވާ ވައުދުތައް ނުފުދޭކަމަށް ވިދާޅުވެފައެވެ.
