ރައީސް ޔާމީން ވަނީ ޕީޕީއެމްގެ ތެރެއިން ބަޣާވާތެއް ގެނެސްފައި: ސައުދު
10 ނޮވެމްބަރު 2017 | ހުކުރު 19:48ހުކުރު ދުވަހުގައި ކިޔާފައިވާ ޚުތުބާއަކީ ސިޔާސީ ޚުތުބާއެއް ކަމަށް ވިދާޅުވި
ސައުދު ހުސައިން
ރައީސް އަބްދުﷲ ޔާމީން ވަނީ ޕީޕީއެމްގެ ތެރެއިން ބަޣާވާތެއް ގެނެސްފައި ކަމަށް ވިލިނގިލީ ދާއިރާގެ މެމްބަރު ސައުދު ހުސައިން ވިދާޅުވެއްޖެއެވެ.
ގުޅިފައިވާ ޕާޓީތަކުން ރ.މަޑުއްވަރީގައި ބޭއްވި ޖަލްސާގައި ވާހަކަ ދައްކަވަމުން ސައުދު ވިދާޅުވީ މިއަދުގެ ޕީޕީއެމަށް ވަނީ ރައީސް ޔާމީން ބަޣާވާތެއް ގެނެސްފައި ކަމަށާއި ޕީޕީއެމް މިހާރު އެހިނގަނީ ޕީޕީއެމް އުފެއްދި މަޤްސަދާ ޚިލާފަށް ކަމަށެވެ.
ރައީސް ޔާމީންގެ ހައިސިއްޔަތެއް ވެސް ޕީޕީއެމްގައި ނެތް ކަމަށް ސައުދު ވިދާޅުވިއެވެ.
"ރައީސް ޔާމީން ވޯޓަކުން ހޮވިގެނެއް ނޫން ޕީޕީއެމްގަ އެހުރީ. އެއީ އެއްވެސް ހައިސިއްޔަތެއް ނެތް. އެއީ ޢާއްމު މެންބަރެއް،" ސައުދު ވިދާޅުވިއެވެ.
ސައުދު ވިދާޅުވީ ސައްތައިން ސައްތަ މުސްލިމް ޤައުމެއްގެ ގޮތުގައި މި ހުކުރު ދުވަހުގައި ކިޔާފައިވާ ޚުތުބާއަކީ ސިޔާސީ ޚުތުބާއެއް ކަމަށެވެ. މިއަދުގެ ޚުތުބާއިން ރައީސް ޔާމީން 2018 ގެ އިންތިޚާބަށް ޖެހިލުންވާ މިންވަރު ހާމަވެއްޖެ ކަމަށް އޭނާ ވިދާޅުވިއެވެ. އެގޮތަށް ސިޔާސީ ޚުތުބާ ނުހެއްދެވުމަށް އިސްލާމިކް މިނިސްޓަރަށް ސައުދު ގޮވާލެއްވި އެވެ.
ޕީޕީއެމް މެންބަރުން 2018 ގައި ރައީސް ޔާމީން އަޒުލު ކުރައްވާނެކަމަށާއި ނުހައްގުން ޖަލަށް ލީކަމުގައި ވީނަމަވެސް އެބޭފުޅުންގެ ރޫހު ނުކުމެ ޔާމީން ބަލި ކުރާނެކަމަށް ސައުދު ވިދާޅުވި އެވެ.
"ހާކިމާގެ އެކައުންޓަށް 1 މިލިއަން ޑޮލަރު ވަނީމާ ރައްޔިތުންނަށް ސުވާލު ކުރުމުގެ ފުރުސަތު ނޯންނާނެތޯ،" ސައުދު ވިދާޅުވިއެވެ.
