އިދިކޮޅު ފަރާތްތަކުން ކުރަނީ ބަޣާވާތެއް، މަސީހުގެ އިތުބާރު ނެތްކަމަށް ފާހެއް ނުކުރެވޭނެ: ޕީޕީއެމް
މަސީހުގެ އިތުބާރު ނެތްކަމުގެ މައްސަލަ ފަސޭހަ ނާކާމިޔާބު ކޮށްލާނެ ކަމަށް ވިދާޅުވި އެވެ.
ޕީޕީއެމްގެ ޕާލިމެންޓްރީ ގްރޫޕްގެ ލީޑަރު ނިހާން
އިދިކޮޅު ފަރާތްތަކުން ކުރަނީ ބަޣާވާތެއްކަމަށާއި ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ ފާސް ނުކުރެވޭނެ ކަމަށް ޕީޕީއެމްއިން ހޯމަ ދުވަހުގެ ރޭ ބުނެފި އެވެ.
"މި ބަޣާވަތް ފަސޭހަ ކަމާއެކު ނާކާމިޔާބު ކޮށްލާނ،" ރައީސް އަބްދުﷲ ޔާމީނާއެކު ބޭއްވި ޕީޕީއެމްގެ ޕާލިމެންޓްރީ ގްރޫޕްގެ ބައްދަލުވުމަށް ފަހު ނޫސްވެރިންނާ ވާހަކަ ދައްކަވަމުން، ޕީޕީއެމްގެ ޕާލިމެންޓްރީ ގްރޫޕްގެ ލީޑަރު އަހްމަދު ނިހާނު ވިދާޅުވި އެވެ.
ޕީޕީއެމްގެ އޮފީސް ކުރިމަތީގައި ނޫސްވެރިންނާ ވާހަކަ ދައްކަވަމުން ޕީޕީއެމްގެ ޑެޕިއުޓީ ލީޑަރު އަދި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވީ ވިޕްލައިނާ ހިލާފުވެވަޑައިގަންނަވާ މެމްބަރުންނަށް މަޖިލީހުގެ ގޮނޑި ގެއްލޭ ގޮތަށް، ބަންޑާރަ ނައިބު ސުޕްރީމް ކޯޓަށް ހުށަހަޅުއްވާފައިވާ މައްސަލައަކީ ދިވެހި ރައްޔިތުންގެ ހައްގުގައި ހުށަހަޅުއްވާފައިވާ މައްސަލައެއް ކަމަށާއި އަމިއްލަ މަސްލަތަށްޓަކައި ރައްޔިތުންގެ ހައްގު ވިއްކައެއް ނުލެވޭނެ ކަމަށެވެ.
"ދިވެހި ގައުމަށްޓަކައި ވާންޖެހެނު ކޮންމެ ގުރުބާނީއެއް ވާނަން،" އަބްދުއްރަހީމް ވިދާޅުވި އެވެ.
އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވީ މިއަދަކީ ދިވެހިރައްޔިތުން ވަރަށް ބޮޑު ކަންބޮޑުވުން ހުރި ކަމެއް ހިނގައި ދިޔަ ކަމެއް ކަމަށާއި ޕީޕީއެމްގެ މެމްބަރުން އެ ޕާޓީން ވަކިވެވަޑައިގަތީ ފައިސާގެ ނުފޫޒުން ކަމަށެވެ.
އަޅުގަނޑުމެން ހުރިހާ މެމްބަރުން ވަރަށް ސާބިތު ކަމާއެކު ރައީސް ޔާމީންގެ ފަހަތްޕުޅުގައި ތިއްބެވި ކަމަށާއި 2018 ގެ އިންތިހާބު ވެސް ކާމިޔާބު ކުރައްވާނެ ކަމަށް ފަލާހު ވިދާޅުވި އެވެ.
މިހާރު ހިނގަމުންދާ ކަންކަން ހިނގަމުންދަނީ މި ސަރުކާރުގެ ކުށެއް އޮވެގެން ނޫން ކަމަށް ވެސް އޭނާ ވިދާޅުވި އެވެ.
ރައީސް ޔާމީނަށް ހިތްވަރު ލިބޭ ގޮތަށް ރަށްރަށުގައި އެއްވުންތަކާއި ސައިކަލް ބުރުވެސް ޖެހުމަށް ފަލާހު ވިދާޅުވި އެވެ.
މިހާރު ސުޕްރީމް ކޯޓަށް ހުށަހެޅިފައިވާ މައްސަލައަށް ޕީޖީ ގްރޫޕުން ތާއިދު ކުރައްވާ ކަމަށް ފާހަގަ ކުރައްވަމުން ފަލާހު ވެސް ވިދާޅުވީ، މަސީހުގެ އިތުބާރު ނެތްކަމުގެ މައްސަލަ ފާސް ނުވާނެ ކަމަށެވެ.
ފަލާހު ވިދާޅުވީ މިހާރު ހިންގަމުންދާ ކަންކަމަކީ ގާސިމް އިބްރާހިމްގެ ވިޔަފާރިން ހިންގަމުންދާ ބަޣާވާތެއް ކަމަށެވެ.
"ރައީސް ނަޝީދާއި ގާސިމް އިބްރާހިމް އާއި މައުމޫން އަބްދުލް ގައްޔޫމް ކުރައްވާ ކަންކަން ކާމިޔާބެއް ނުވާނެ،" ފަލާހް ވިދާޅުވި އެވެ.
މަސީހުގެ އިތުބާރު ނެތްކަމުގެ މައްސަލައިގައި ސޮއިކުރެއްވި ޕީޕީއެމްގެ 11 މެމްބަރުންގެ ތެރެއިން 10 މެމްބަރަކު ވަނީ ޕީޕީއެމްއިން ވަކިވެވަޑައިގެންފަ އެވެ.
