ފެލިވަރާއި މަޑުއްވަރީގެ އައިސް ޕްލާންޓް ހުޅުވައިފި
10 ޑިސެމްބަރު 2021 | ހުކުރު 13:48އިތުރު އައިސްޕްލާންޓްތަކެއް ތަރައްގީކުރުމުގެ މަސައްކަތް ކުރިއަށްދޭ
ރ. މަޑުއްވަރީގައި ގާއިމްކޮށްފައިވާ އައިސް ޕްލާންޓް ހުޅުވުން
ފެލިވަރާއި ރ. މަޑުއްވަރީގައި ގާއިމްކޮށްފައިވާ އައިސް ޕްލާންޓް ރަސްމީކޮށް ހުޅުވައިފިއެވެ.
މި ދެ އައިސް ޕްލާންޓު ހުޅުވާފައިވަނީ މަސްވެރިންގެ ދުވަހާއި ގުޅިގެންނެވެ. ފެލިވަރުގައި ގާއިމްކޮށްފައިވާ އައިސް ޕްލާންޓް ހުޅުވައިދެއްވީ ފިނޭންސް މިނިސްޓަރ އިބްރާހިމް އަމީރެވެ. ރ. މަޑުއްވަރީގައި ގާއިމްކޮށްފައިވާ އައިސް ޕްލާންޓް ރަސްމީކޮށް ހުޅުވައިދެއްވީ އެންވަޔަރަންމެންޓް، ކްލައިމެޓް ޗޭންޖް އެންޑް ޓެކްނޮލޮޖީ މިނިސްޓަރ އައިމިނަތު ޝައުނާއެވެ.
މި ދެ އައިސް ޕްލާންޓުގެ އިތުރުން ހއ. ހޯރަފުށީގައި ގާއިމްކޮށްފައިވާ އައިސް ޕްލާންޓާއި، ކ. ގާފަރުގައި ގާއިމްކޮށްފައިވާ އައިސް ޕްލާންޓުވެސް ހުކުރު ދުވަހުގެ ހަވީރު ވަނީ ހުޅުވާފައެވެ. ކ. ގާފަރުގައި ޤާއިމްކޮށްފައިވާ އައިސް ޕްލާންޓް ހުޅުވައިދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހެވެ. ހއ. ހޯރަފުށީގައި ގާއިމްކޮށްފައިވާ އައިސް ޕްލާންޓް ހުޅުވައިދެއްވާފައިވަނީ ހައުސިންގ އެންޑް އިންފްރާސްޓްރަކްޗަރ މިނިސްޓަރ މުހައްމަދު އަސްލަމްއެވެ.
ފެލިވަރުގައި ގާއިމްކޮށްފައިވަނީ 50 ޓަނުގެ އައިސް ޕްލާންޓެކެވެ. ރ. މަޑުއްވަރިއާއި، ކ. ގާފަރާއި ހއ. ހޯރަފުށީގައި ގާއިމްކޮށްފައިވަނީ 25 ޓަނުގެ އައިސް ޕްލާންޓު ތަކެކެވެ.
ސަރުކާރުން ބުނީ މަސްވެރިންނަށް ދިމާވެފައިވާ އައިސް ލިބުމުގެ މައްސަލައަށް ހައްލެއް ހޯދުމަށް ރާއްޖޭގެ އެކި ކަންކޮޅު ތަކުގައި އައިސްޕްލާންޓް ގާއިމުކުރުމުގެ މަސައްކަތް އެކި ފިޔަވަހި ތަކަށް ބަހާލައިގެން ކުރިއަށްގެންދާ ކަމަށެވެ. މި ހަތަރު އައިސްޕްލާންޓްގެ އިތުރުންވެސް އެހެން އައިސްޕްލާންޓް ތަކެއްގެ މަސައްކަތް ކުރިއަށްދާ ކަމަށް ވެސް ސަރުކާރުން ބުނެއެވެ.
މި މަޝްރޫޢުތައް ނިމޭއިރު، މަސްވެރިންނަށް ދިމާވެފައިވާ އައިސް ލިބިމުގެ މައްސަލައަށް ހައްލެއް ލިބި، މަސްވެރިން ބާނާ މަސް ތާޒާކަންމަތީ ބެހެއްޓުމަށާއި ރަނގަޅަށް ސްޓޯރ ކުރުމުގެ އިތުރުން ރާއްޖެއިން އެކްސްޕޯޓް ކުރާ މަހުގެ ކޮލެޓީ ދެމެހެއްޓުމަށް މަގު ފަހިވެގެންދާނެ ކަމަށް ސަރުކާރުން ބުނެއެވެ. ފިޝަރީޒް މިނިސްޓްރީން ވަނީ މަސްވެރިންގެ ފޯރަމެއް ވެސް ވަރަށް ފަހުން ބާއްވާފައެވެ. މި ފޯރަމްގައި އައިސް ޕްލާންޓް ނެތުމުގެ މައްސަލައާއި މަސްވެރިންނަށް ދިމާވާ އެނޫންވެސް އެކި ގޮންޖެހުންތަކުގެ ވާހަކަ ވަނީ ހިއްސާކޮށްފައެވެ.
އެގޮތުން މައިގަނޑު ގޮތެއްގައި މަޝްވަރާކޮށްފައިވަނީ މަސްވެރިކަމުގައި ހުރި ގޮންޖެހުން ތަކަށެވެ. މަސްވެރިންނަށް ހަމަ އަގު ހޯދައިދިނުމުގައި ހުރި ގޮންޖެހުންތަކަށާއި، މަތީ އަގު ލިބޭ ލިބޭ ޕްރިމިއަމް މާކެޓުތަކަށް ރާއްޖޭގެ މަސް ވިއްކުމަށް އޮތް ފުރުސަތު ހަނިވަމުންދާ މައްސަލައިގެ މައްޗަށާއި، ތެލުގެ އަގު އުފުލުމާއި، މަސްވެރިކަން ކުރުމުގެ ޚަރަދު ނިސްބަތުން ބޮޑުވުމުގެ މައްޗަށެވެ. މީގެއިތުރުން މަހުގެ ކޮލިޓީ ނިސްބަތުން އަދިވެސް ދަށް ކަމަށާއި މަސްވެރިން ބާނާ މަހުގެ ނިސްބަތުން ބޮޑު މިންވަރެއް، މަތީ އަގު ލިބޭ ގޮތަށް ޕްރޮސެސް ނުކޮށް، ރޯ މެޓީރިއަލްގެ ގޮތުގައި އެކްސްޕޯޓް ކުރަން ޖެހިފައިވާތީ އެކަމުގެ މައްޗަށް ވެސް، ފޯރަމްގައި މަޝްވަރާ ކުރެވުނެވެ.
