ވައިކަރަދޫގައި ހިނގި އަލިފާނުގެ ހާދިސާއެއްގައި ޓީޗަރަކަށް ސީރިއަސް އަނިޔާތަކެއް
7 ޑިސެމްބަރު 2021 | އަންގާރަ 10:49މިހާދިސާގައި ފިހިފައިވަނީ ވައިކަރަދޫ ސްކޫލްގައި މަސައްކަތްކުރާ ފިރިހެން ޓީޗަރެއް
ވައިކަރަދޫގައި އަލިފާނުގެ ހާދިސާ ހިނގި ގެ
ހދ. ވައިކަރަދޫގެ ގެއެއްގައި ގޭސް ލީކުވެ، އަލިފާނުގެ ހާދިސާއެއް ހިނގައި، ޓީޗަރަކަށް ސީރިއަސް އަނިޔާތަކެއް ލިބިއްޖެެއެވެ.
މި ހާދިސާ ހިނގައިފައިވަނީ ހެނދުނު 08:00 ހާއިރެވެ.
ހާދިސާއާ ގުޅޭ މައުލޫމާތު ދެއްވަމުން ވައިކަރަދޫ ކައުންސިލްގެ ރައީސް އަބްދުﷲ ޒަމީރު ވިދާޅުވީ މި ހާދިސާގައި ގެއަށް މާ ބޮޑު ގެއްލުމެއް ލިބިފައިނުވިނަމަވެސް ޓީޗަރަށް ލިބުނު އަނިޔާތައް ސީރިއަސްކަމަށެވެ. އެގޮތުން ޓީޗަރުގެ މޫނާއި ދެ އަތް ވަރަށް ބޮޑަށް ފިހިފައިވާކަމަށް ޒަމީރު ވިދާޅުވިއެވެ. ފިހުނު މީހާއަކީ ވައިކަރަދޫ ސްކޫލުގައި އިނގިރޭސި ކިޔަވައިދޭ ފިރިހެން ޓީޗަރެއް ކަމަށް މައުލޫމާތު ދެއްވައެވެ.
ޒަމީރު ވިދާޅުވި ގޮތުގައި އަލިފާން ރޯވާން މެދުވެރިވީ ގޭސް ލީކުވެފައި ހުރުމުން އެ ޓީޗަރު އެކަން ރަނގަޅު ކުރުމަށް އުޅުމުގެ ތެރޭގައެެވެ. އޮޅުމެއްގެ ތެރޭގައި އުނދުން ރޯކުރެވި ބިންމަތީގައި ލީކުވެފައި ހުރި ގޭހުގައި ހުޅުހިފީކަމަށް ޒަމީރު ވިދާޅުވިއެވެ.
މި ހާދިސާގައި އަނިޔާވި ޓީޗަރަށް މިހާރު އަންނަނީ ކުޅުދުއްފުށީ ރީޖަނަލް ހޮސްޕިޓަލުގައި ފަރުވާ ދެމުންނެވެ.
