ރައީސް ޔާމީންގެ ވެރިކަމުގައި ސަރުކާރު ހިއްސާވާ ކުންފުނިތަކުގެ މެންޑޭޓް އޮތީ އޮޅުވާލާފައި - ޔައުގޫބް
7 ޑިސެމްބަރު 2021 | އަންގާރަ 07:56ރައީސް ޔާމިނަކީ އެއްވެސް ވަރަކަށް ރައްޔިތުންނަށް ހެޔޮ އެދިގެން ވެރިކަން ކުރައްވާ ބޭފުޅެއް ނޫން
ޔައުގޫބް އަބްދުﷲ - ދާންދޫ ދާއިރާގެ މެމްބަރު
ރައީސް ޔާމީންގެ ސަރުކާރުގައި ކުންފުނިތަކުގެ މެންޑޭޓް އޮޅުވާލާފައިވާކަމަށް ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބް އަބްދުﷲ ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަފުޅު ދައްކަވަމުން ޔައުގޫބް ވިދާޅުވީ، ރައީސް ޔާމީންގެ ވެރިކަމުގައި، ކުންފުނިތައް ރަނގަޅަށް ހިންގާފައިވާކަމަށް އެމަނިކުފާނު ވިދާޅުވާއިރު، ސަރުކާރު ހިއްސާވާ ކުންފުނިތަކުގެ މެންޑޭޓް އޮޅުވާލައި، ހުރިހާ ކުންފުންޏަކަށް ބޯހިޔާވަހިކަން ހަވާލުކޮށްފައި އޮތް ކަމަށެވެ. އެޗްޑީސީ ފިޔަވައި އެހެން ކުންފުނި ތަކުގެ މެންޑޭޓްގައި ބޯހިޔާވަހިކަން ނޯންނާނެ ކަމަށް ޔައުގޫބް ވިދާޅުވިއެވެ.
ސަރުކާރު ހިއްސާވާ ކުންފުނިތަކަށް ބޯހިޔާވަހިކަމުގެ މަޝްރޫއުތައް ނުދިނުމަށް ރައްޔިތުންގެ މަޖިލީހުންވަނީ މިހާރު ނިންމާފައެވެ.
ރައީސް ޔާމީން ދެއްކެވި ވާހަކަފުޅުގައި، އެއްލައްކަ ހަތަރު ހާސް ވަޒީފާ އުފެއްވި ކަމަށް ވިދާޅުވި ވާހަކަފުޅަށް ރައްދު ދެއްވައި ޔައުގޫބް ވިދާޅުވީ، އެ އަދަދަށް ވަޒީފާ އުފެއްދެވި ނަމަ މިހާރު ރާއްޖޭގައި އޮންނާނީ، ވަޒީފާގެ ދަތިކަން ހައްލުވެފައި ކަމަށެވެ. ހިސާބު ޖެހުމުގައި އެ ސަރުކާރުގެ ބޭފުޅުންގެ މައްސަލަ އުޅޭ ކަމަށް ޔައުގޫބް ވިދާޅުވިއެވެ.
ރައީސް ޔާމިނަކީ އެއްވެސް ވަރަކަށް ރައްޔިތުންނަށް ހެޔޮ އެދިގެން ވެރިކަން ކުރައްވާ ބޭފުޅެއް ނޫން ކަމަށާއި، އޮތީ އެންމެ އެދުމެއްކަމާއި އެކަން ހާމަވެގެންދަނީ، ޖަލުން މިނިވަން ވުމާއެކު ފައިސާ ހޯދެވުމަށް އުޅުއްވުން ކަމަށް ޔައުޤޫބު ވިދާޅުވިއެވެ.
އިގްތިސާދީ ގޮތުން ފަހި ފަސް އަހަރު ނުވަތަ ހަތް އަހަރު ލިބިވަޑައިގެން ވެރިކަން ކުރެއްވިއިރު، ކުރެވުނު އެއްވެސް ކަމެއް ނެތް ކަމަށް ޔައުގޫބް ވިދާޅުވިއެވެ. ކުރެއްވި ކަމަކީ ދައުލަތުގެ ބަޖެޓުން ވައްކަމެވެ. ޔައުގޫބް ވިދާޅުވީ، ރައީސް ޔަމީނަކީ ވެރިކަން ކުރައްވަން ބޭނުންފުޅުވާ ބޭފުޅެއްވެސް ނޫން ކަމަށެވެ. ފުރަތަމަ ގައުމު ހިންގަން ހަވާލު ކުރެއްވީ، ނައިބު ރައީސާ ކަމަށާއި، ދެން އޭގެ ފަހުން ހަވާލުކުރެއްވީ، އެމަނިކުފާނުގެ އަނބިކަނބަލުންނާއެވެ. ރައީސް ޔާމީން ބޭނުންފުޅުވަނީ ކޮންމެވެސް ގޮތަކަށް ފައިސާ ހޯދައްވަން ކަމަށް ޔައުގޫބް ވިދާޅުވިއެވެ.
