ޕްރޮކިއުމަންޓްގެ މަސައްކަތްތައް އިލެކްޓްރޯނިކް ނިޒާމެއްގެ ތެރެއިން ކުރިއަށް ގެންދިއުމަށްޓަކައި އިލެކްޓްރޯނިކް ގަވަރމަންޓް ޕްރޮކިއުމަންޓް ސިސްޓަމަކަށް ދިއުމަކީ އެންމެ ބޮޑު އެއް އަމާޒު ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ޕްރޮކިއުމަންޓުތަކާ ގުޅިގެން ބީލަން ހުށަހެޅުމަށް ޚާއްސަ ޕޯޓަލްއެއް އިފްތިތާހުކުރުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރ އަމީރު ވިދާޅުވީ، އިލެކްޓްރޯނިކް ގަވަރމަންޓް ޕްރޮކިއުމަންޓް ސިސްޓަމަކަށް ދިއުމުގެ އަމާޒަށް ވާސިލްވުމަށް އެޅިގެންދާނެ އެންމެ ފުރަތަމަ ފިޔަވަޅަކީ މިފަދަ ޕޯޓަލްއެއް ގާއިމް ކުރެއްވުން ކަމަށެވެ.
އަދި އިލެކްޓްރޯނިކް ނިޒާމަކަށް ދިޔުމަށް ކުރެވެމުންދާ މި މަސައްކަތް ތަންފީޒުކުރުމަށް އެންމެ މުހިއްމީ ބީލަން ވެރިން ކަމަށާއި، ޕޯޓަލް ބޭނުންކުރުމުގައި ހުރި ދަތިތަކާއި އަދި ޕޯޓަލް އިތުރަށް ހަރުދަނާ ކުރުމަށް ކުރަންޖެހޭ ކަންތައް ދެނެގަތުމަށް އެ ފަރާތްތަކުގެ ޚިޔާލުތައް ވަރަށް މުހިއްމު ކަމަށެވެ. އިލެކްޓްރޯނިކް ނިޒާމަކަށް ބަދަލުވުމުގައި ދިމާވާ ދަތިތައް ހައްލު ކުރުމުގައި ފުރިހަމަ އެއްބާރުލުން ލިބޭނެކަމުގެ ފުރިހަމަ ޔަގީންކަން ދެއްވާކަމަށް މިނިސްޓަރ ވިދާޅުވިއެވެ.
ކޮންޓްރެކްޓަރުންގެ އެންމެ ބޮޑު އެއް ކަންބޮޑުވުމަކީ ދައުލަތުގެ އޮފީސްތަކަށް ހުށަހެޅޭ ބިލްތަކަށް ފައިސާ ލިބިމުގައި ދިމާވާ ދަތިތައް. މިކަމަށް ހައްލެއް ހޯދައިދިނުމުގެގޮތުން ދައުލަތުގެ ކޮންމެ އޮފީހަކަށްވެސް ބިލް ހުށަހެޅޭ ފުރަތަމަ ތާރީޚުން ފެށިގެން އަޅުގަނޑުމެންގެ މިނިސްޓްރީއަށް އެ ބިލް ޓްރެކް ކުރެވޭނެ ނިޒާމެއް ގާއިމުކުރުމުގެ މަޝްވަރާތައް ކުރިއަށްދާކަމުގެ އުފާވެރި ޚަބަރު މި ފުރުސަތުގައި ހިއްސާކޮށްލަން.ފިނޭންސް މިނިސްޓަރ އިބްރާހީމް އަމީރު
މިނިސްޓަރ ވިދާޅުވީ ޕްރޮކިއުމަންޓުތަކާ ގުޅިގެން ބީލަން ހުށަހެޅުމަށް ޚާއްސަ ޕޯޓަލްއަކީ ދައުލަތުގެ އޮފީސްތަކުގެ ޕްރޮކިއުމަންޓް ނިޒާމް އިލެކްޓްރޯނިކް ނިޒާމަކަށް ބަދަލުކުރުމަށް ކުރެވެމުންއަންނަ މަސައްކަތްތައް ހަގީގަތަކަށް ހެދުމަށްޓަކައި ކުރެވެމުންދާ މަސައްކަތުގައި ކުރިއަށް ފިޔަވަޅެއް އެޅުން ކަމަށެވެ. އަދި އިފްތިތާހު ކުރެވިގެން ދިޔައީ ދައުލަތުގެ އޮފީސްތަކުން ކުރިއަށްގެންދާ ޕްރޮކިއުމަންޓްތަކާ ގުޅިގެން ބަލައިގަނެވޭ ބިޑް، ޕްރޮޕޯސަލްތައް އިލެކްޓްރޯނިކް ނިޒާމެއްގެ ތެރެއިން ބަލައިގަތުމަށް ޑިވެލޮޕް ކޮށްފައިވާ ބީލަން ޕޯޓަލް ކަމަށެވެ.
އެއް މާލަމަކަށް ހާޒިރުވެ ބިޑް ހުށަހެޅުމުގެ މަސައްކަތް ކުރިއަށް ގެންދިއުމުގައި ހުރި ދަތިކަން އެންމެ ބޮޑަށް އިހުސާސް ކުރެވިގެން ދިޔައީ ކޮވިޑް-19ގެ ހާލަތާ ގުޅިގެން ކަމަށް ބުނުމަކީ ދޮގަކަށް ނުވާނެ. އިލެކްޓްރޯނިކް ނިޒާމެއްގެ ތެރެއިން ބީލަންތައް ބަލައިގަތުމުގެ އިންތިޒާމްތައް ހަމަޖައްސައިދިނުމަށްއެދި ބީލަންވެރިންނާއި އަދި ދައުލަތުގެ އޮފީސްތަކުން އެކަމުގެ ކަންބޮޑުވުންތައްވަނީ ތަކުރާރުކޮށް މި މިނިސްޓްރީއާ ހިއްސާކޮށްފަ. އެހެންނަމަވެސް އަޅުގަނޑުމެންގެ އެންމެ ބޮޑު އެއް އަމާޒަކަށް ވެގެން ދިޔައީ އިލެކްޓްރޯނިކް ނިޒާމަކުން ބިޑް ބަލައިގަތުމުގެ ކަންކަން ހަމަޖެއްސިގެންދާއިރު، ދައުލަތުގެ ޕްރޮކިއުމަންޓް ނިޒާމްގެ މަގުސަދު ހާސިލްވާނޭހެން، އަދި ފަސޭހަގޮތަކަށް ބީލަންވެރިންނަށް ޕްރޮޕޯސަލް ހުށަހެޅޭނެހެން މިކަންކުރުމުގެ މަގު ފަހިކޮށްދިނުން.ފިނޭންސް މިނިސްޓަރ އިބްރާހީމް އަމީރު
މިނިސްޓަރ ވިދާޅުވީ ލޯންޗުކުރެވުނު ޕޯޓަލް ފަރުމާކުރެވިފައިވަނީ ބީލަންވެރިން ހުށަހަޅާ ޕްރޮޕޯސަލްތަކުގެ ރައްކާތެރިކަން، ބިޑް ހުޅުވުމުގެ ވަގުތާހަމައަށް ހިފެހެއްޓޭނެގޮތަށް ކަމަށެވެ. އަދި، މި ޕޯޓަލް މެދުވެރިކޮށް ބިޑް ހުށަހެޅުމަށް ބޭރު ގައުމުތަކަށް ނިސްބަތްވާ ބީލަންވެރިންވެސް އިސްތިސްނާވެގެން ނުވާކަމަށެވެ. އަދި ކުރިއަށް އޮތްތަނުގައި އެންމެ ބޮޑު އެއް އަމާޒަކީ ފަންޑު ދޭ އެޖެންސީތަކުގެ ޕްރޮކިއުމަންޓްތަކުގައި މި ޕޯޓަލް މެދުވެރިކޮށް ބިޑް ހުށަހެޅޭނެ އިންތިޒާމް ހަމަޖެއްސުން ކަމަށާއި، އެކަމަށްޓަކައި މަސައްކަތް ކުރަމުންދާ ކަމަށް މިނިސްޓަރ ވިދާޅުވިއެވެ.
ދައުލަތުގެ ޕްރޮކިއުމަންޓް ނިޒާމު ހަރުދަނާކުރުމަށްޓަކައި، ޕްރޮކިއުމަންޓާއި ގުޅޭ ސިޔާސަތު ހަދާ ފަރާތާއި އެ ސިޔާސަތުތައް ތަންފީޒުކުރާ ފަރާތްވަނީ ވަކިކުރެވިފައި. މިގޮތުން، ޕްރޮކިއުމަންޓްއާ ގުޅޭ ސިޔާސަތުތައް އެކުލަވާލައި، އެ ސިޔާސަތުތައް ތަންފީޒުކުރާ މިންވަރު ދެނެގަނެ މޮނިޓަރ ކުރުމަށްޓަކައި، ޕްރޮކިއުމަންޓް ޕޮލިސީ ބޯޑުވަނީ އެކުލަވާލެވިފަ. ނިޒާމު ހަރުދަނާ ކުރުމުގެ ގޮތުން ސްޓޭޓް އިންޓަރނަލް އޮޑިޓް ކޮމެޓީ އުފައްދާ މަސައްކަތް ވާނީ ފުޅާ ކޮށްފައި. ބީލަމުގެ މައްސަލަ ބަލާ ކޮމެޓީއާއި މާލިއްޔަތު މައްސަލަ ބަލާ ކޮމެޓީ އުފައްދައި، ބޮޑެތި ބާރުތަކެއް ވާނީ ދީފައި. އެއާއެކު މިއަދު އެކޮމެޓީތަކަށް އެތައް މައްސަލައެއް ހުށަހެޅި، އެ ހުށަހެޅިފައިވާ މައްސަލަތައް ބަލައި ފިޔަވަޅުދަނީ އަޅަމުން.ފިނޭންސް މިނިސްޓަރ އިބްރާހީމް އަމީރު
މިނިސްޓަރ ވިދާޅުވީ ހަމަ އެކަނި މިފަދަ މެކޭނިޒަމްތައް ގާއިމުކުރުމުން ނިޒާމު ހަރުދަނާ ވެގެންދާނެކަމަށް ގަބޫލުކޮށްގެން ނުވާނެ ކަމަށެވެ. އަދި އެކުލަވާލާފައިވާ ނިޒާމު ހަރުދަނާ ސިފައެއްގައި ތަންފީޒުކުރުމަށް އެންމެ މުހިއްމު އެއްބަޔަކީ އެ ނިޒާމްތެރޭގައި ހަރަކާތްތެރިވާ ފަރާތްތައް ކަމަށާއި، މީގެތެރޭގައި ޕްރޮކިއުމަންޓްގައި މަސައްކަތްކުރާ ފަރާތްތަކުގެ އިތުރުން ބީލަންވެރިންނާއި އަދި ކޮންޓްރެކްޓަރުންވެސް ހިމެނޭ ކަމަށެވެ.
މީގެ އިތުރުން ޕްރޮކިއުމަންޓްގައި މަސައްކަތްކުރާ އެންމެހައި މުވައްޒަފުންނަކީ، ޕްރޮކިއުމަންޓާއި އޭގެ ސިޔާސަތުތަކުގެ މުހިއްމުކަން ދަނެގެން އެ މަސައްކަތް ކުރާ ބަޔަކަށް ހެދުމަށްޓަކައި، މޯލްޑިވްސް ނޭޝަނަލް ޔުނިވަރސިޓީއާ ގުޅިގެން ޕްރޮކިއުމަންޓްގެ މަސައްކަތުގައި ހަރަކާތްތެރިވާ ފަރާތްތަކަށް ޚާއްސަ ޓްރެއިނިންގ ޕްރޮގްރާމެއް އެކުލަވާލުމުގެ މަސައްކަތް ކުރަމުންދާކަމަށް މިނިސްޓަރ ވިދާޅުވިއެވެ. އަދި އަންނަ އަހަރުގެ ޖަނަވަރީ މަހު މި ޓްރެއިނިންގ ޕްރޮގްރާމް ވުޖޫދަށް ގެނެސް، އެ އަހަރުގެ ފުރަތަމަ ދެ ކުއާޓަރ ނިމުމުގެ ކުރިން ދައުލަތުގެ އެކި އޮފީސްތަކުގެ ޕްރޮކިއުމަންޓްގެ މަސައްކަތުގައި ހަރަކާތްތެރިވާ 1200އަށްވުރެ ގިނަ މުވައްޒަފުން މި ޓްރެއިނިންގ ޕްރޮގްރާމް ފުރިހަމަ ކުރުމަކީ އަމާޒެއް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ 2019 ވަނަ އަހަރު ފުރަތަމަ ފަހަރަށް ދިވެހިރާއްޖޭގައި ބޭއްވުނު ބީލަންވެރިންގެ މަހާސިންތާގައި ބީލަންވެރިން އެދުނު އެންމެ ބޮޑު އެދުމަކީ ދައުލަތުގެ ކުންފުނިތަކުގެ ޕްރޮކިއުމަންޓްތަކުގެ މައްސަލަތައް ހައްލުކޮށްދިނުން ކަމަށެވެ. އެގޮތުން، ސަރުކާރު ކުންފުނިތަކުން އެކުންފުންޏެއްގެ އަމިއްލަ ޕްރޮކިއުމަންޓް ޕޮލިސީތަކަށް އަމަލުކުރަމުން އަންނަ އައުން ނިމުމަކަށްގެނެސް، ސަރުކާރު ހިއްސާވާ ކުންފުނިތަކުން އަމަލުކުރުމަށްޓަކައި ޕްރޮކިއުމަންޓް ޕޮލިސީ ގައިޑްލައިން އެކުލަވާލައި އެ ގައިޑްލައިނާ އެއްގޮތަށް އަމަލުކުރުމަށް އެކުންފުނިތަކަށް އަންގާފައިވާނެ ކަމަށް މިނިސްޓަރ ވިދާޅުވިއެވެ.
