ބޭފުޅުން ކޮޅެއް ވަކިވެގެން ދިއުމަކީ އަދާލަތު ޕާޓީގެ ފިކުރު ބަދަލުވާންޖެހޭ ކަމެއް ނޫން: އަލީ ޒާހިރު
އޭރުވެސް މިހާރުވެސް އަދާލަތު ހިންގަމުން ގެންދަނީ އެޕާޓީ އުފެއްދި މަގުސަދާއި، ރޫހާއި އެއްގޮތަށްކަމަށް ވިދާޅުވި
މާމިގިލީގައި ޖަލްސާގައި އަލީ ޒާހިރު ވާހަކަފުޅު ދައްކަވަނީ
އަދާލަތު ޕާޓީން ބޭފުޅުން ކޮޅެއް ވަކިވެގެން ދިއުމަކީ އެޕާޓީގެ ފިކުރު ބަދަލުވާން ޖެހޭ ސަބަބެއް ނޫން ކަމަށް އަދާލަތު ޕާޓީގެ ނައިބު ރައީސް އަލީ ޒާހިރު ވިދާޅުވެއްޖެއެވެ.
ގުޅިފައިވާ ޕާޓީތަކުން އދ. މާމިގިލީގައި ބޭއްވި ބިޔަ ޖަލްސާގައި އަލީ ޒާހިރު ވިދާޅުވީ ކޮންމެވެސް ޒާމާނެއްގައި ބަޔަކު އަދާލަތު ޕާޓީގައި އުޅުމަކީ އަބަދު އަދާލަތު ޕާޓީގެ ކަންކަމާއި މެދުގައި ގޮތްކިޔާ ބަސްބުނަން އޮތް ހައްގެއް ނޫންކަމަށެެވެ.
"އަދާލަތު ޕާޓީ އޭރުވެސް މިހާރުވެސް ހިންގަމުން ގެންދަނީ އެޕާޓީ އުފެއްދި މަގުސަދާއި، އުފެއްދި ރޫހާއި އެއްގޮތަށް" އޭނާ ވިދާޅުވިއެވެ.
އޭނާ ވިދާޅުވީ އެޕާޓީން އަމިއްލަފުޅަށް ވަކިވެގެން ދިޔަ ދެތިން ބޭފުޅެއްގެ މަގުސަދާއި ރޫހު ތަފާތުވުމަކީ، އެޕާޓީގެ މަގުސަދާއި ފިކުރު ބަދަލުވުން ނޫންކަމަށެވެ.އޭނާ ވިދާޅުވީ، އަދާލަތު ޕާޓީ އުފެއްދީ ވަރަށް މާތް މަގުސަދެއްގައި ކަމަށާއި މިއަދުވެސް އެޕާޓީ މަސައްކަތް ކުރަމުންދަނީ އެ ރޫހުގައިކަމަށެވެ.
އަލީ ޒާހިރު މިގޮތަށް ރައްދު ދެއްވީ މިހާރު ޕީޕީއެމްއާ ގުޅިވަޑައިގެން މަސައްކަތް ކުރައްވާ ޝޭހް މުހައްމަދު ދީދީ ދެއްކެވި ވާހަކަތަކަށެވެ. ބުދަ ދުވަހުގެ ރޭ ކުޑަހުވަދޫގައި ބޭއްވި ޖަލްސާއެއްގައި ދީދީ ވިދާޅުވީ އަދާލަތު ޕާޓީ މިއަދު ނަމެއްގައި އޮތަސް އެ ޕާޓީ ވަނީ ރޫޅިފައި ކަމަށެވެ. އެއީ އެ ޕާޓީގެ މުއައްސިސުންނާއި އުފެއްދި މީހުން މިހާރު އަދާލަތު ޕާޓީއާ އެކުގައި ނެތުމުން ކަމަށެވެ. އަލީ ޒާހިރު ވިދާޅުވީ މިއަދު މި ގައުމު ހަމަ މަގަށް އެޅުވުމަށް ގުޅިފައިވާ ޕާޓީތަކުން އެކައްޗެއް ކިޔާ ކަމަށާއި ހުރިހާ ޕާޓީތަކުގެ މަގުސަދަކީ އެއް މަގުސަދެއްކަމަށާއި، އެއީ މި ގައުމުގައި އިންސާފް ގާއިމްކޮށް ހަމަމަގަށް އެޅުވުންކަމަށެވެ.
ރައީސް އަބުދުﷲ ޔާމީނަށް ވަރަށް ބޮޑަށް ފާޑު ވިދާޅުވަމުން އަލީ ޒާހިރު ވިދާޅުވީ، ރައީސް އަބުދުﷲ ޔާމީން މިހާތަނަށް ޖެއްސެވި ހިސާބުތައް ގޯސްކަމަށެވެ. އެގޮތުން މަޖިލިސް މެޖޯރިޓީ ގެއްލި ކޯލިޝަން ރޫޅުމުން ޖެހި ހިސާބު ދިމާ ނުވާކަމަށާއި، ކާނަލް ނާޒިމް ޖަލަށްލައިގެން ޖެއްސެއްވި ހިސާބު ދިމާނުވާކަމަށާއި، އަދާލަތު ޕާޓީ އެމްޑިޕީއާއި އެކު ދުވަހަކު ވެސް މަސައްކަތް ކޮށްފާނެކަމަށް ގަބޫލު ނުކުރާނެ ކަމަށް ޖެއްސެވި ހިސާބުވެސް ގޯސްކަމަށެވެ. މީގެ އިތުރުން، ރައީސް މައުމޫނު އެމްޑީޕީއާއި ގުޅިގެން މަސައްކަތް ނުކުރާނެކަމަށް ދެކުނު ހިސާބުވެސް ދިމާނުވާކަމަށާއި، ގުޅިފައިވާ ޕާޓީތަކުން އެއް ކެންޑިޑޭޓަކު ނުނެރެވޭނެކަމަށް ނިންމާ ޖެއްސެވި ހިސާބުވެސް ގޯސްކަމަށެެވެ. އިބޫއަށް ކެންޑިޑެންސީ ނުލިބޭނެ ކަމަށް ރައީސް ޔާމީން ޖެއްސެވި ހިސާބު ވެސް ގޯސްކަމަށް އަލީ ޒާހިރު ވިދާޅުވިއެވެ.
އަލީ ޒާހިރު ވިދާޅުވީ ރައީސް އަބުދުﷲ ޔާމީންގެ ރަނިންގ މޭޓަކަށް ދިނީ އިލްމުވެރިއަކު ނެރުއްވާ ކަންކަން ފޮރުވޭނެ ކަމަށް ދެކި ޖެއްސެވި ހިސާބުވެސް މުޅިން ގޯސްކަމަށް އޭނާ ވިދާޅުވިއެވެ. އޭނާ ވިދާޅުވީ މިއަހަރުގެ ރިޔާސީ އިންތިޚާބު އަމިއްލަފުޅަށް ކާމިޔާބު ކުރެއްވޭނެ ކަމަށް ދެކި އެމަނިކުފާނު ޖައްސަވާ ހިސާބު ގޯސްކަމަށެވެ. އަދި މި އިންތިޚާބު ބޮޑު ތަފާތަކުން ކާމިޔާބު ކުރާނީ، ކޯލިޝަން ކެނޑިޑޭޓް އިބޫކަމަށް އޭނާ ވިދާޅުވިއެވެ.
