ބަޑި ބާއްވައިގެން ޤާސިމް ފްރޭމް ކުރަން އުޅޭ މައްސަލަ ބަލަމުން ނުދިއުމަކީ އެކަން ކުރިއަށް ގެންދާކަމަށް ބެލެވޭ ކަމެއް: ޖޭޕީ

ޖަލުގައި ބަންދުކޮށްފައިވާ ޖުމްހޫރީ ޕާޓީގެ ލީޑަރ ޤާސިމް އިބްރާހީމްއާ ގުޅުން އޮތް ތަނެއްގައި ދެ ބަޑި ބާއްވައިގެން އެމަނިކުފާނު ފްރޭމް ކުރުމަށް މަސައްކަތް ކުރަމުންދާ މައްސަލަ ކަމާ ބެހޭ ފަރާތްތަކުން ބަލަމުން ނުދިއުމަކީ އެކަން ކުރަމުންދާކަމަށް ބެލެވޭ ކަމެއް ކަމުގައި ޖުމްހޫރީ ޕާޓީން ބުނެފިއެވެ.

ޖުމްހޫރީ ޕާޓީން ބުދަދުވަހު ނެރުނު ބަޔާނެއްގައި ބުނެފައި ވަނީ އެޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާޙިމް ފްރޭމްކޮށް، އެމަނިކުފާނުގެ މައްޗަށް ޓެރަރިޒަމްގެ ދަޢުވާ ކުރުމަށްޓަކައި، ބަޔަކު މީހުން ރާވައިގެން މަސައްކަތްތަކެއް ކުރެވެމުންދާކަމުގެ މަޢުލޫމާތު ލިބި، އެމަނިކުފާނުގެ ވަކީލުންވަނީ ކަންބޮޑުވުން ފާޅުކޮށް، ދަޢުލަތުގެ ސަލާމަތީ ޚިދުމަތްތަކަމަށްވާ، މިނިސްޓްރީ އޮފް ޑިފެންސް އެންޑް ނޭޝަނަލަ ސެކިއުރިޓީ އަށާއި، މޯލްޑިވްސް ޕޮލިސް ސާރވިސް އަށް މައްސަލަ ލިއުމުން ހުށަހަޅާ އެކަން ސީރިއަސްކޮން ތަހްޤީގުކޮށް ދިނުމަށް އެދިފައި ކަމަށެވެ. އަދި އެ މައްސަލަ ބައްލަވައި ދެއްވުމަށް އެދި ދަޢުލަތުގެ ޕްރޮސެކިއުޓަރ ޖެނެރަލް އަށް ވެސް ވަނީ ހުށަހަޅާފައި ކަމަށެވެ.

މައްސަލަ ހުށައަޅާފައިވީނަމަވެސް މިހާތަނަށް އައިއިރު އެކަމާގުޅޭތުން އެއްވެސް ފަރާތަކުން ފިޔަވަޅެއް އަޅާފައި ނުވުމުން އެކަމަށް ކަންބޮޑުވާންޖެހެނީ މާޒީގައި ކަންކަން ހިނގާފައިވާ ގޮތްތަކުގެ ސަބަބުން އެފަދަ ހާލަތެއް ކުރިމަތިވިޔަ ނުދިނުމަށްޓަކައި، ކުރިޔާލާ އެކަންކަމަށް ސަމާލުވެ ހައްލެއް ހޯދުމަށް ބޭނުންވާތީ ކަމަށް ބަޔާނުގައި ބުނެފައިވެއެވެ. އަދި މިވަގުތުވެސް ޤަސިމް އިބްރާހިމް ހުންނެވީ މޯލްޑިވްސް ޕޮލިސް ސާރވިސް ގެ ބެލުމުގެ ދަށުގައި ޖަލު ބަންދެއްގައި ކަމަށްވެފައި، އަދި ޖަލުގެ ވެންޓިލޭޝަން ރަގަޅުކުރުމަށް ކުރިމިނަލް ކޯޓް އިން މޯލްޑިވްސް ޕޮލިސް ސާރވިސް ގެ މައްޗަށް، ފުރަތަމަ ހައްޔަރުކުރުމަށް ފަހު މުއްދަތު މަޖިލީހުގައި ފަނޑިޔާރު އަމުރުކުރީ ވެންޓިލޭޝަން ރަގަޅުކުރުމަށާއި، އަދި އެކަން ރަގަޅު ނުކުރެވޭނަމަ، ވެންޓިލޭޝަން ރަނގަޅު ތަނަކަށް ބަދަލުކުރުމަށް ކަމަށްވިއަސް އެކަން ރަނގަޅުކުރުމަކާ ނުލާ އަނެއްކާވެސް ހަމަ އެގޮޅީގައި ދޫނިދޫ ޖަލުގައި ހައްޔަރުކޮށްފައިވުމުން، އެ މަނިކުފާނާމެދު ޢަމަލުކުރައްވަމުން ގެންދަވަނީ އެއްގޮތަކަށް ވެސް ޤާނޫނީ ހުކޫމަތުގެ ތެރެއިން ކަމަށް ބެލުމުގެ ޖާގައެއް އޮތްކަމަކަށް އެޕާޓީން ނުދެކޭ ކަމަށެވެ.

ޖޭޕީން ބުނީ ކޯޓުގެ ޢަމުރާ އެއްގޮތަށް އެކަންކަން ރަނގަޅު ނުކޮށްހުރިއިރު އަދި އެމަނިކުފާނު ފުރޭމްކުރުމަށް ބަޔަކު ރާވަމުންދާކަމުގެ މަޢުލޫމާތު ލިބިގެން އެކަން ކަމާބެހޭ ދަޢުލަތުގެ އިދާރާތަކަށް އަންގާ ތަހްޤީގު ކޮށްދިނުމަށް އެދި އެމަނިކުފާނުގެ ފަރާތްޕުޅުން ޤާނޫނީ ވަކީލުން އެދިފައި ވުމާއި، އަދި އެކަން ޢަމަލީ ގޮތެއްގައި ކުރަމުންދާކަން އެނގިފައި ނެތުމުން، ޖަލުގެ ހައްޔަރުގައި އެ މަނިކުފާނު ހުންނަވާ ހުންނެވުމުގައި ފާއިތުވާ ކޮންމެ ވަގުތަކީ އެފަދަ ކަމެއް ބަޔަކު ރާވައިގެން ނުހިންގާނެ ކަމުގެ އެއްވެސް ޔަޤީން ކަމެއް ނެތް ވަގުތުތަކެއް ކަމުގެ ނުތަނަވަސްކަން އުފެދި އެކަމާ ނުހަނު ކަންބޮޑުވުން އޮތްކަމުގައި ދެކޭ ކަމަށެވެ.

ޖޭޕީގެ ބަޔާނުގައި ބުނެފައިވާ ގޮތުގައި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީ ގެ 51 ވަނަ މާއްދާގެ (އ) ގައި "އެމީހަކު ކުށެއްކޮށްފިކަން، އެކަށީގެންވާ މިންވަރެއްގެ ޝައްކެއްނެތި، ޝަރީއަތުގައި ސާބިތުނުކުރެވޭ ނަމަ އެ މީހަކީ ކުށެއްނެތް މީހަކު ކަމުގައި ބެލުމުގެ ހައްޤު ލިބިގެންވާ" ކަމަށެވެ. އެހެންކަމުން ޤާސިމް އިބްރާހިމް މި ވަގުތު ޖަލުގެ ހައްޔަރުގައި ބަހައްޓާފައި ވަނީ އެމަނިކުފާނުގެ މައްޗަށް ސާބިތުވެފައިވާ ކުށެއްގެ ހުކުމް ތަންފީޒް ކުރުމަށް ކަމަށް ނުވާތީއާއި، އަދި މޯލްޑިވްސް ޕޮލިސް ސަރވިސް އިން އެދުނު ހުރިހާ ހާލަތެއްގައި ތަހްޤީގަށް ފުރިހަމަ އެއްބާރުލުންދީފައި ވުމާއެކު، އެ މަނިކުފާނު ވަގުތުން މިނިވަން ކޮށްދިނުމަށް ރާއްޖޭގެ އެކިއެކި ކަންކޮޅުތަކުގައި ގޮވާލަމުންދާ ގޮވާލުންތަކަށް ސަރުކާރުން އަޅާނުލުމަކީ އެ ޕާޓީން އިންތިހާއަށް ކަންބޮޑުވާކަމެއްކަމަށެވެ.

ޖޭޕީން ބުނީ އެ ޕާޓިގެ ލީޑަރ އަދި ރައްޔިތުންގެ މަޖިލީހުގެ މާމިނގިލި ދާއިރާގެ މެންބަރު އޮނަރަބުލް ޤާސިމް އިބްރާހިމްގެ ރައްކާތެރިކަމާއި، އަދި އެމަނިކުފާނު ހުންނެވި ޖަލުގޮޅީގެ ސަލާމަތީ ކަންކަން ކަށަވަރު ކުރުމާއި، ބަޔަކު ރާވައިގެން ފުރޭމްކުރުމަށް ކުރަމުންދާ މަސައްކަތަށް އެއްވެސް ޖާގައެއް ނުލިބޭނެ ކަމުގެ ޔަޤީންކަން ކަށަވަރުކޮށްދިނުމަށް ކަމާބެހޭ ދަޢުލަތުގެ އެންމެހާ ފަރާތްތަކަށް އެ ޕާޓީން އިލްތިމާޞްކުރާ ކަމަށެވެ.