މާއިޒުގެ ވާހަކައިން ދިވެހިން ރޮއްވާލައިފި: "މިހާލު ޖެހުމުން ތިބޭފުޅުންނަށްވެސް ރޮވޭނެ، އަސަރު ކުރާނެ"

ސަރުކާރުން ބޭއްވި ރިވެލި އެވާރޑް ޖަލްސާގައި ނުކުޅެދުންތެރިކަން ހުންނަ ކުދިންގެ ޝުއޫރުތައް ހިއްސާކުރަމުން އިހަވަންދޫ ސުކޫލުގެ ޑައިމަންޑް ކްލާހުގެ ދަރިވަރު މުހައްމަދު މާއިޒު ވަނީ ދިވެހިން ރޮއްވާލާފައެވެ. ހިތްތަކަށް ފުން އަސަރުތަކެއް ކުރުވި އެ ސްޕީޗުގައި މާއިޒު ވަނީ މުހިއްމު އެތައް ކަމަކަށް އަލިއަޅުވާލާފައެވެ.

ނުކުޅެދުންތެރިކަން ހުންނަ މީހުންނާއި މި ދާއިރާގައި މަސައްކަތްކުރާ އެކިއެކި ފަރާތްތަކުގެ މަސައްކަތުގެ އަގު ވަޒަންކުރުމުގެ ގޮތުން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއާއި، ނުކުޅެދުންތެރިކަން ހުންނަ މީހުންގެ ހައްގުތައް ހިމާޔަތްކުރާ ކައުންސިލް ގުޅިގެން ދޭ އެވާރޑުން ތައުލީމީ ދާއިރާއިން އޭނާ ވަނީ އެވާރޑް ހާސިލުކޮށްފައެވެ. އެ ރެއަކީ މާއިޒުގެ ހަޔާތުގައިވެސް އައި ނުހަނު އުފާވެރި ރެއެއްކަން ބަޔާންކޮށްދެމުން އޭނާ ބުނީ މިއީ ފުރަތަމަ ފަހަރަށް އެވާރޑެއް ހާސިލުކުރާ ފަހަރު ކަމަށެވެ. މާއިޒު ވަނީ މިފަދަ އެވާރޑެއް ދެއްވި ކަމަށްޓަކައި ރާއްޖޭގެ ލޮބުވެތި ރައީސުލްޖުމްހޫރިއްޔާއަށް ޝުކުރު އަދާ ކުރާކަމަށް ބުނެފައެވެ.

ލޯތްބާއި އޯގާތެރިކަމަކީ ކޮންމެ އިންސާނަކަށްވެސް ބޭނުންވާނެ އެއްޗެއްކަމާއި އެއީ ދިރިއުޅުމުގައި ނުހަނު މުހިއްމު އެއްޗެއްކަން ފާހަގަކޮށް މާއިޒުގެ ވާހަކަ ކުރިއަށް ގެންދިޔައިރު، ޖަލްސާގެ ހާޒިރީންގެ ލޯތައްވެސް ވަނީ ފެންކަޅިވެފައެވެ. ލޯތްބާއި އޯގާތެރިކަމާ ނުލައި އެއްވެސް އިންސާނަކަށް ނޫޅެވޭނެކަން ބަޔާންކޮށް މާއިޒު ބުނީ، މީހުންގެ ލޯތްބާއި އަޅާލުމާއި އިހުތިރާމަކީ އިންސާނަކަށް އެންމެ ބޭނުންވާނެ ކަންކަން ކަމަށެވެ. ނުކުޅެދުންތެރިކަން ހުންނަ ފަރާތްތަކަށްވެސް ހަމަ އެވަރަށް ނޫނީ އެއަށްވުރެ ބޮޑަށް އެ ލޯތްބާއި އިހުތިރާމް ބޭނުންވާކަން މާއިޒު ފާހަގަކުރިއެވެ. އެ ލޯތްބާއި އަޅާލުން މިއަދު ލިބެމުންދާކަމުގެ އިހުސާސް ކުރެވޭކަމަށް ވެސް އޭނާ ބުންޏެވެ.

ކޮންމެ ކުއްޖަކީވެސް ތައުލީމު ބޭނުންވާނެ ކުދިންކަން ފާހަގަކޮށް މާއިޒު ބުނީ، ކޮންމެ ކުއްޖަކުވެސް ސުކޫލަށްގޮސް ކިޔަވަން ބޭނުންވާނެ ކަމަށެވެ. ޚުދު އޭނާއަކީވެސް ސުކޫލަށް ގޮސް އުޅުނު ކުއްޖެއް ކަމާއި، ނުކުޅެދުންތެރިކަން ހުންނަ ކުދިންނަށް އަދިވެސް ގޮންޖެހުންތަކެއް ހުރިކަމަށް މާއިޒު ބުނެއެވެ.

ދެން މާއިޒު ދެއްކީ މިސްކިތްތަކުގެ ވާހަކައެވެ. މިސްކިތަށް ގޮސް ނަމާދުކޮށްލާހިތްވާ ވާހަކައެވެ. ނަމަވެސް ނުކުޅެދުންތެރިކަން ހުންނަ ކުދިންނަށް އެކަމުގައިވެސް ގިނަގުނަ ގޮންޖެހުންތަކެއް ހުރިކަން ހިތާމައާއެކު އޭނާ ފާހަގަކުރިއެވެ.

މާއިޒުގެ އުއްމީދަކީ، އަދި އެދުމަކީވެސް ނުކުޅެދުންތެރިކަން ހުންނަ ކުދިންނަށް އެފަދަ ފުރުސަތުތައް ފަހިވެގެން ދިއުމެވެ. އުއްމީދަކީ މިސްކިތަށްގޮސް، އެހެން ކުދިން ފަދައިން ނަމާދުކޮށްލައި އުޅެވޭނެ އިންތިޒާމު ހަމަޖެހިގެން ދިއުންކަން އުނދަގުލާއެކު މާއިޒު ފާހަގަކުރިއިރު، ޖަލްސާގެ ހާޒިރީންނަށްވެސް މާއިޒުގެ ވާހަކައިގައި ހުރި ވޭނާއި އަސަރު އިހުސާސްވާ ކަހަލައެވެ.

މައިންބަފައިން ވެދެއްވާ ގުރުބާނީ ދުވަހަކުވެސް ހަނދާނުން ނުފިލާނެ ކަމަށް މާއިޒު ބުނެއެވެ. އެ މައިންބަފައިން ވަމުންދަނީ ނުހަނު މަތިވެރި ގުރުބާނީއެއް ކަމަށް މާއިޒު ދެކެއެވެ. އެ މައިންބަފައިން ކޮށްދޭ ކަންކަމުގެ އަގު އަދާކޮށް ނުދެވޭނެކަމަށް ހިތުގެ އަޑިން ގަބޫލު ކުރެއެވެ. ޚުދު މިއަދު ނުކުޅެދުންތެރިކަން ހުންނަ ކުދިން އެ ހާސިލުކުރި ކާމިޔާބީގެ ޙަގީގީ މޭސްތިރިންނަކީވެސް އެ ލޮބުވެތި މައިންބަފައިންކަން ފަޚުރާއެކު މާއިޒު ފާހަގަކުރިއެވެ. މާއިޒު ވަނީ މައިންބަފައިންގެ ޚިދުމަތަށް ހިތުގެ ޚާލިސް ޝުކުރު އަދާކޮށްފައެވެ.

"ޝުކުރިއްޔާ މަންމާ، ޝުކުރިއްޔާ ބައްޕާ"މާއިޒު ބުންޏެވެ.

މާދަމާ ކަންތައް ވާނީ ކިހިނެއްކަން އެނގޭނީ ކާކަށްތޯ ސުވާލު އުފައްދަމުން މާއިޒް ދެން ބުނީ، މާދަމާ ކަންތައް ވާނެ ގޮތެއް އެއްވެސް މީހަކަށް ބުނެދެން ނޭނގޭނެ ކަމަށެވެ. ހިނގާ ބިނގާވެ އުޅޭ އިންސާނާވެސް މާދަމާ ގޮނޑިއެއްގައި އިންނަން ނުޖެހޭނެކަން ޔަގީންކަމާއެކު އެނގެނީ ކިތައް މީހުންނަށްތޯ މާއިޒު ސުވާލު ކުރިއެވެ. އެފަދަ ދުވަހެއް އައިސްފިނަމަ، ނުކުޅެދުންތެރިކަން ހުންނަ ކުދިން އުފުލާ ވޭނާއި ބުރައިގެ ކޮންމެވެސް މިންވަރެއް އިހުސާސް ކުރެވޭނެކަމަށް މާއިޒު ބުންޏެވެ. ވީއިރު، އެހެން މީހުންވެސް ލޯތްބާއި އޯގާތެރިކަން ބޭނުންވާ ފަދައިން، އެކުދިންނަށްވެސް މިއަދު އެ އަޅާލުން ބޭނުންވާކަން އާދޭހާއެކު މާއިޒް ފާހަގަކުރިއެވެ.

"އޭރުން ތިބޭފުޅުންނަށްވެސް ރޮވޭނެ، އަސަރު ކުރާނެ، އިހުސާސް ކުރެވޭނެ، އެކަމަކު އޭރު ހުންނާނީ ވަގުތު ފާއިތުވެފައި "ފެންކަޅިވެފައި އިނދެ މާއިޒު ބުންޏެވެ.

ދުޅަހެޔޮ ސިއްހަތަކީ މާތް ﷲ ދެއްވި ކިހާ ފުރިހަމަ ނިއުމަތެއްކަން ހަނދާން ކޮށްދެމުން މާއިޒު ވަނީ އޭގެ ބޭނުން ހެޔޮ ގޮތުގައި ހިފުމަށް ހަނދާން ކޮށްދީފައެވެ. އޭރުން ތިމާއަށްވެސް އެފަދަ ހާލަތެއް މެދުވެރިވެގެންދާ ދުވަހު، ތިމާއަށްވެސް އެހެން މީހުންގެ ލޯތްބާއި ފިރުމުން ލިބިގެންދާނެ ކަމަށް މާއިޒު ދެކެއެވެ. ކޮންމެއަކަސް މާއިޒުގެ ކުރު، އަދި މާނަފުން މެސެޖުތަކުން މިވަނީ ދިވެހިންގެ ހިތްތައް ރޮއްވާލާފައެވެ.