ބޭރު ދުނިޔޭގެ ކުރިމަތީގައި އަނެއްކާ ވެސް ދިވެހިންގެ އަގު ވެއްޓުނީ!

އިއްޔެއަކީވެސް ދިވެހި ސަރުކާރަށް ހަމަ އާދައިގެ ދުވަހަކެވެ. ދިވެހި ސަރުކާރަށް އާދައިގެ ދުވަހަކަށް ވާނީ ކޮރަޕްޝަންގެ މައްސަލައެއް ފެންމަތިވީމައެވެ. ދިވެހި ސަރުކާރަށް އާދައިގެ ދުވަހަކަށްވާނީ ބޭރު ދުނިޔޭގެ ކުރިމަތީގައި ދިވެހިންގެ އަގު ވައްޓާލެވުނީމައެވެ.

އިއްޔެގެ ނޫސްތަކުގެ ފަލަސުރުޚީތައް ބަލާލައި، ޓީވީ ރޭޑިއޯ ޗެނަލްތަކުގެ ޚަބަރުތައް ބެލި ދިވެސެއްނަމަ، ލަދުން ހަލާކުވާނެއެވެ. ދިވެއްސަކަށް ވީތީ ފަޚުރުވެރިވަމޭ ބުނެލާ ބީދައިން، އިއްޔެއަކީ ދިވެއްސަކަށް ވީތީ ލަދުގަންނަން ޖެހޭ ދުވަހަކެވެ. ސުރުޚީތަކުން ފެންނަނީ މިނިވަންކަމަށް ފަންސާސް އަހަރު ފުރުމުގެ މުނާސަބަތުގައި ބޭއްވި ހަރަކާތްތަކުގައި ކޮރަޕްޝަން އެކުލެވޭ ވާހަކައެވެ. ޤަވާޢިދާއި ޚިލާފަށް ޤާނޫނު ތަންފީޒުކުރަން ތިބޭ ފުލުހުން ޚަރަދުތަކެއް ކުރި ވާހަކައެވެ.

އެވާހަކަތައް އެއްފަރާތުގައި ބޭއްވުމަށް ފަހު އަޅުގަނޑު ދައްކާލަން މިއުޅެނީ ދިވެހިންގެ އަގު ބޭރު ދުނިޔޭގެ ކުރިމަތީގައި އަނެއްކާވެސް ވެއްޓުނު ލަދުވެތި ވާހަކަޔަށެވެ. އިނގިރޭސިވިލާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖޭމްސް ޑޯރިސް، ތިނަދުއަށް ވަޑައިގެން، އެރަށުގެ ކައުންސިލާއި ބައްދަލުކުރެއްވިތާ މާގިނަ ވަގުތެއް ނުވެ، ކައުންސިލް ތަކުގެ ބެލެނިވެރި ފަރާތްކަމަށްވާ ލޯކަލް ގަވަރމަންޓް އޮތޯރިޓީ އިން އަމުރު ނެރުނީ އެފަދަ ބައްދަލުވުމެއް ބޭއްވުމުގެ ކުރިން ހުއްދަ ހޯދަން ޖެހޭ ކަމަށެވެ. އެމްޑީޕީ މެޖޯރިޓީ އޮންނަ ކައުންސިލަކުން ބައިނަލްއެޤްވާމީ ފަރާތަކާއި ބައްދަލުކުރަން އެލްޖީއޭއިން ހުއްދަ ދީފާނެ ކަމަށް މީހަކު ބުނެފިއްޔާ އެއީ ޖޯކަކަށް ނުވެ ނުދާނެކަން ނުދަންނަ ދިވެއްސެއް މި ފަސްގަނޑުގައި ހުރިހެނެއް ހިއެއް ނުވެއެވެ.

ބޭރުގެ ސަފީރުން ރާއްޖޭގެ ކައުންސިލްތަކާއި، ޖަމްއިއްޔާ ޖަމާޢާތްތަކާއި ބައްދަލުކުރައްވަނީ ސިއްރު ވާހަކަތަކެއް ދައްކާކަށެއް ނޫނެވެ. އެބޭފުޅުން ރާއްޖޭގައި ކަންކުރަންވީ ގޮތް ވިދާޅުވަނީއެއް ނޫނެވެ. އެބޭފުޅުން އަޑުއައްސަވަނީ ރާއްޖޭގެ ޙާލަތުގެ ވާހަކައެވެ. ހަމައެކަނި ކައުންސިލަރުންގެ ވާހަކަތަކެއް ނޫނެވެ. ހޯމަ ދުވަހު އެލްޖީއޭއިން ބޮޑެތި އިންޒާރު ނެރުނުއިރު، ސަފީރު ޑޯރިސް ބައްދަލުކުރެއްވީ ހަމައެކަނި ތިނަދޫ ކައުންސިލަރުންނާ އެއް ނޫނެވެ. ޑޯރިސް ވަނީ އެރަށުގައި ތިއްބެވި ޕީޕިއެމްގެ އިސް ބޭފުޅުންނާއިވެސް ބައްދަލު ކުރައްވާފައެވެ. މަނާކުރަންޏާ މަނާކުރަންވީ ރަސްމީ ހައިސިއްޔަތެއް ނެތް، އާއްމު ރައްޔިތުން ބޭރުގެ ޑިޕްލޮމެޓުންނާއި ބައްދަލުކުރުމެއް ނޫންތޯއެވެ؟ ޔުނިޓަރީ ދައުލަތެއްގެ ސިފަ ރައްކާތެރިކުރަނީ ތިހެނެއް ނޫނެވެ.

ސަރުކާރުން ބިރުގަނެގެން އުޅެނީ އިންޑިއާ އެމްބެސެޑަރ އަކިލޭޝް މިޝްރާ އާއި އިނގިރޭސި އެމްބެސެޑަރ ޖޭމްސް ޑޯރިސް މިހާރު ބައެއް ރަށްރަށާއި އަތޮޅު ކައުންސިލަރުންނާއި ބައްދަލުކުރައްވާތީއެވެ.

މި ބޭބޭފުޅުން ރާއްޖޭގެ ކައުންސިލަރުންނާއި ބައްދަލުކުރެއްވީ ސަރުކާރުން މޭކަރައިގެން އުޅޭއިރު، ދިވެހި އެމްބެސެޑަރުން ބޭރު ޤައުމުތަކުގައި ތިއްބަވާ ބޭބޭފުޅުންނާއި ބައްދަލުކުރެއްވީމާ އެޤައުމުތަކުން މައްސަލަ ޖައްސާތޯއެވެ؟ ޕީޕީއެމްއިން ބަޔަކު މާގިނައިން ނުދިޔަޔަސް ބޮޑު ޖަގަހައެއް ހަދައިގެން ލަންކާގައި އެކުރާ މަސައްކަތަކާއި ލަންކާ ސަރުކާރުން ބެހޭތޯއެވެ؟ ޑިޕްލޮމަސީ ދަސްކުރައްވާށެވެ. ޗައިނާއިން ގެންގުޅޭ ޑިޕްލޮމަސީނަމަވެސް ދަސްކުރައްވާށެވެ.

އެމްބެސެޑަރ އަކިލޭޝް މިޝްރާ ކައުންސިލަރުންނާއި ބައްދަލުކުރެއްވީމާ ސަރުކާރަށް ހަޖަމްނުވާއިރު، އިންޑިއާއިން ދީފައި އޮތް ހެލިކޮޕްޓަރެއްގައި ބަލި މީހުން އުފުލާ، ބަލި މީހަކު ގެންނަ ކޮންމެ ފަހަރަކު އެވާހަކަ އިޝްތިހާރުކޮށް ހަދަން ދިވެހި ސަރުކާރުން ލަދެއް ނުގަނޭހެއްޔެވެ؟ ފެންފޮދެއް ނުލިބޭއިރަށް ގުޅަން ޖެހެނީ އިންޑިއާއަށެވެ. ޕެނަޑޯލް ގުޅައެއް ހުސްވީމަވެސް އިންޑިއާއަށެވެ.