ކޮވިޑް ޖެހިގެން ރާއްޖޭގައި ނިޔާވި މީހުންގެ އަދަދު 255ށް އަރައިފި
ނިޔާވީ އުމުރުން 79 އަހަރުގެ ދިވެހި ފިރިހެނެއް
އައްޑޫ ސިޓީގެ ރަށްތަކުގެ ތެރެއިން ހިތަދޫ
ކޮވިޑް ޖެހިގެން ރާއްޖޭގައި ނިޔާވި މީހުންގެ އަދަދު 255ށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ އައްޑޫ ކޮވިޑް މެނޭޖްމެންޓް ފެސިލިޓީގައި ފަރުވާދެމުންދިޔަ މީހަކު ހޯމަ ދުވަހުގެ ހެނދުނު 09:30ގައި ނިޔާވެފައިވާ ކަމަށެވެ. ކޮވިޑް ޖެހިގެން ނިޔާވި މި މީހާއަކި އުމުރުން 79 އަހަރުގެ ދިވެހި ފިރިހެނެކެވެ.
ހެލްތު ޕްރޮޓެކްޝަން އެޖެންސީ(އެޗްޕީއޭ)ން އާންމު ކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރަށް ތެރޭގައި ރާއްޖެއިން ކޮވިޑަށް ޕޮޒިޓިވްވީ 116 މީހުންނެވެ. އެ 116 މީހުންގެ ތެރެއިން މާލެ ސަރަހައްދުން ޕޮޒިޓިވްވެފައިވަނީ 25 މީހުންނެވެ. އަތޮޅުތަކުން 81 މީހުން ޕޮޒިޓިވްވިއިރު ހިނގަމުންދާ ރިސޯޓްތަކުން ހަ މީހުން ޕޮޒިޓިވް ވެފައިވެއެވެ.
މިއާއެކު ރާއްޖެއިން ކޮވިޑް-19ށް ޕޮޒިޓިވްވި މީހުންގެ އަދަދު ވަނީ 92،211ށް އަރާފައެވެ. މީގެތެރެއިން 90،205 މީހުން ވަނީ ބަލިން ރަނގަޅުވެފައެވެ. މިވަގުތު އެކްޓިވް ކޭހުގެ ގޮތުގައި 1،739 ކޭހެއް އަންނަނީ ގުނަމުންނެވެ. މީގެތެރެއިން 19 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.
