ލަންކާ މެޗުތަކާއެކު ޓީމު އެކުލަވާލަން ފަސޭހަވާނެ: މުންތޭ

މި މަހުގެ ފަހުކޮޅު ބަންގްލަދޭޝްގައި ފަށާ ސެންޓްރަލް ޒޯން ވޮލީބޯޅަ މުބާރާތުގެ ކުރިން ސްރީ ލަންކާއާ ދެކޮޅަށް ކުޅޭ މެޗުތަކާއެކު ގައުމީ ފިރިހެން ވޮލީބޯޅަ ޓީމު އެކުލަވާލަން ފަސޭހަވާނެ ކަމަށް ގައުމީ އަންހެން ވޮލީބޯޅަ ޓީމުގެ ކޯޗު މުމްތާޒް އަލީ (މުންތޭ) ބުނެފިއެވެ.

ސެންޓްރަލް ޒޯންމުބާރާތަށް ތައްޔާރުވުމަށް ރާއްޖޭގެ ގައުމީ ފިރިހެން ވޮލީބޯޅަ ޓީމުން މި މަހު ރާއްޖޭގައި ލަންކާގެ ގައުމީ ވޮލީބޯޅަ ޓީމާ ދެކޮޅަށް ތިން މެޗެއް ކުޅޭނެއެވެ. މިއީ މިދިޔަ ނޮވެމްބަރު މަހު ކުޅިވަރުގެ ދާއިރާއިން ރާއްޖެ އާއި ސްރީ ލަންކާ ގުޅިގެން މަސައްކަތްކުރުމަށް އެމްއޯޔޫއެއްގައި ސޮއިކުރުމަށް ވެވުނު އެއްބަސްވުމުގެ ދަށުން ލިބުނު ފުރުސަތެކެވެ.

"ރާއްޖެ.އެމްވީ" އަށް ދިން ޚާއްސަ އިންޓަވިއުއެއްގައި މުންތޭ ބުނީ ލަންކާގެ މިހާރުގެ ފެންވަރު ބުނަން ނޭނގޭ ކަމަށާއި، އެކަމަކު ރާއްޖޭގައި ކުޅޭ ރަހުމަތްތެރިކަމުގެ މެޗުތަކަށް ލަންކާއިން އަންނަނީ ސީނިއާ ބައެއް ކުޅުންތެރިންނާއެކު ޒުވާން ކުޅުންތެރިންގެ ޓީމެއް ކަމަށް މައުލޫމާތު ލިބިފައިވާ ކަމަށެވެ. އަދި މިހާރު ރާއްޖޭގެ ގައުމީ ޓީމަކީވެސް ޒުވާން ޓީމެއް ކަމަށާއި، އެހެންކަމުން ފެންވަރުގެ ގޮތުން އަޅާކިޔާނަމަ ދެ ޓީމަކީވެސް ހަމަހަމަ ދެ ޓީމު ކަމަށްވެސް ބުންޏެވެ.

މުންތޭ ބުނީ މި މެޗުތަކުގެ ސަބަބުން ގައުމީ ފިރިހެން ވޮލީބޯޅަ ޓީމުގެ ކޯޗު މުޙައްމަދު ސާޖިދު (ކާއްޓޭ) އަށް ގައުމީ ޓީމު އެކުލަވާލަން ފަސޭހަވާނެ ކަމަށެވެ. އަދި ގައުމީ ޓީމަކީ މިހާރު ވާދަވެރި ޓީމެއް ކަމަށާއި، އެގޮތުން މި ވަގުތުވެސް ކާއްޓޭއަށް ގައުމީ ޓީމުގެ ފުރަތަމަ ހައެއް ނަގަން އުނދަގޫވާނެ ކަމަށް ގަބޫލުކުރާ ކަމަށް ވަނީ ބުނެފައެވެ.

މުންތޭ އިތުރަށް ބުނީ ގައުމީ ޓީމުގައި ހިމެނޭ ޒުވާން ކުޅުންތެރިންނަކީ ހަމައެކަނި ޒުވާން ވެގެން ނަގާ ކުޅުންތެރިންތަކެއް ނޫން ކަމަށާއި، އޭގެ ބަދަލުގައި ޒުވާން ކުޅުންތެރިންނަކީ ގައުމީ ސްކޮޑުގައި ހިމެނޭނެ ފެންވަރު ހުރި ކުޅުންތެރިންތަކެއް ކަމަށެވެ. އަދި އެކަން ފަރިތަކުރުންތަކަށް ބަލާލިކަމުގައި ވިޔަސް ފެންނާނެ ކަމަށްވެސް ވަނީ ބުނެފައެވެ.

މުންތޭ ބުނީ ސެންޓްރަލް ޒޯން މުބާރާތައް ގައުމީ ޓީމުން ނުކުންނައިރު މިހާރު ގައުމީ ޓީމުގެ އަމާޒަކަށްވާނީ މުބާރާތް ކާމިޔާބުކުރުން ކަމަށާއި، ރާއްޖެއަކީ މިހާރު ބަންގްލަދޭޝް އާއި ލަންކާފަދަ ޓީމުތަކަށް ދޫދޭނެ ޓީމެއް ނޫން ކަމަށެވެ.

މި އަހަރުގެ ސެންޓްރަލް ޒޯން މުބާރާތަށް ތައްޔާރުވުމުގެ ލަންކާއާ ދެކޮޅަށް ރާއްޖޭން އެކުވެރިކަމުގެ ތިން މެޗެއް ކުޅޭއިރު، މީގެ ކުރިން 2019 ވަނަ އަހަރުވެސް ކުޅިވަރާ ބެހޭ ވަޒީރު އަޙްމަދު މަޚްލޫފުގެ ދައުވަތަކަށް ސެންޓްރަލް ޒޯން މުބާރާތުގެ ކުރިން ލަންކާއަށް ދައުވަތުދީގެން މާލޭގައި ވަނީ ތިން މެޗެއް ކުޅެފައެވެ.

މި ފަހަރުގެ މެޗުތައް ކުޅުމަށް އަންނަ ބުދަ ދުވަހު ލަންކާ ޓީމު ރާއްޖެ އަންނައިރު، މެޗުތައް ކުޅުމަށް ހަމަޖެހިފައިވަނީ މި މަހު 9 އާއި، 10 އަދި 12 ވަނަ ދުވަހުއެވެ. އަދި އެ ތިން މެޗުގެ ތެރެއިން ރަސްމީ ބޮޑު މެޗެއްގެ ގޮތުގައި ހަމަޖައްސާފައިވަނީ މި މަހުގެ 12 ވަނަ ދުވަހު ކުޅޭ މެޗެވެ.

މި މަހުގެ 21 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށް ބަންގްލަދޭޝްގައި ބާއްވާ މުބާރާތުގައި ގައުމީ ފިރިހެން ވޮލީ ޓީމުގެ އިތުރުން އަންހެން ޓީމުވެސް ވާދަކުރާނެއެވެ. ފިރިހެން ޓީމުގެ ކޯޗު ކާއްޓޭގެ އިރުޝާދުގެ ދަށުން 15 ކުޅުންތެރިންގެ ސްކޮޑެއް މިހާރު ފައިނަލް ކޮށްފައިވާއިރު، ސެންޓްރަލް ޒޯން މުބާރާތަށް ދާނީ 12 ކުޅުންތެރިންގެ ސްކޮޑެކެވެ. އެހެންކަމުން މިހާރު އެކުލަވާލި ސްކޮޑުން އަދި ތިން ކުޅުންތެރިއަކު ބާކީވާނެއެވެ.

މި މަހު ސެންޓްރަލް ޒޯން ވޮލީބޯޅަ މުބާރާތް ބަންގާޅުގައި ބާއްވާއިރު، ފިރިހެން މުބާރާތުގައި ވާދަކުރާ ގައުމުތަކަކީ ރާއްޖެ އާއި، ނޭޕާލާއި، ސްރީ ލަންކާ އާއި، އުޒްބެކިސްތާން އަދި ބަންގްލަދޭޝެވެ. އަދި އަންހެން މުބާރާތުގައި ރާއްޖެ އާއެކު ވާދަކުރާނީ ކިރްގިސްތާނާއި، ނޭޕާލާއި، އުޒްބެކިސްތާން އަދި ބަންގްލަދޭޝެވެ.