ކޮވިޑް ޖެހިގެން ރާއްޖޭގައި ނިޔާވި މީހުންގެ އަދަދު 254ށް އަރައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ހުޅުމާލޭ މެޑިކަލް ފެސިލިޓީގައި ފަރުވާދެމުންދިޔަ މީހަކު އާދީއްތަ ދުވަހުގެ ހެނދުނު 06:29ގައި ނިޔާވެފައިވާ ކަމަށެވެ. ކޮވިޑް ޖެހިގެން ނިޔާވި މި މީހާއަކި އުމުރުން 77 އަހަރުގެ ދިވެހި އަންހެނެކެވެ.

ހެލްތު ޕްރޮޓެކްޝަން އެޖެންސީ(އެޗްޕީއޭ)ން އާންމު ކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު ޕޮޒިޓިވްވީ ފާއިތުވި 24 ގަޑިއިރަށް ބަލާއިރު 102 މީހުން ނެވެ. އެ 102 މީހުންގެ ތެރެއިން މާލެ ސަރަހައްދުން ޕޮޒިޓިވްވެފައިވަނީ 25 މީހުންނެވެ. އަތޮޅުތަކުން 72 މީހުން ޕޮޒިޓިވްވިއިރު ހިނގަމުންދާ ރިސޯޓްތަކުން ފަސް މީހުން ޕޮޒިޓިވް ވެފައިވެއެވެ.

މިއާއެކު ރާއްޖެއިން ކޮވިޑް-19ށް ޕޮޒިޓިވްވި މީހުންގެ އަދަދު ވަނީ 92،095ށް އަރާފައެވެ. މީގެތެރެއިން 90،103 މީހުން ވަނީ ބަލިން ރަނގަޅުވެފައެވެ. މިވަގުތު އެކްޓިވް ކޭހުގެ ގޮތުގައި 1،726 ކޭހެއް އަންނަނީ ގުނަމުންނެވެ. މީގެތެރެއިން 19 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.